കവി ജോയി കളത്തിലാൻ അന്തരിച്ചു : Deepika.com Kerala News |

Click here for detailed news of all items

കവി ജോയി കളത്തിലാൻ അന്തരിച്ചു

Tuesday, April 30, 2024 1:56 AM IST

കൈനകരി: വിശുദ്ധ ബൈബിളിലെ പഴയനിയമവും പുതിയ നിയമവും മഹാകാവ്യമായി രചിച്ച കവി ജോയി കളത്തിലാൻ (ജോയി ജോസഫ്-91) അന്തരിച്ചു. ആലപ്പുഴ കൈനകരി കളത്തിൽ പരേതരായ ജോസഫ്-മറിയാമ്മ ദന്പതികളുടെ മകനാണ്. സംസ്‌കാരം നാളെ രാവിലെ 10.30ന് കൈനകരി സെന്‍റ് മേരീസ് പള്ളിയിൽ.

കുട്ടനാട്ടിലെ കലാ-സാംസ്കാരിക- കായിക രംഗങ്ങളിൽ വ്യക്തിമുദ്ര പതിപ്പിച്ച ജോയി മികച്ചൊരു കർഷകൻ കൂടിയായിരുന്നു. ബൈബിളിനെ അടിസ്ഥാനമാക്കി അദ്ദേഹം രചിച്ച ഖണ്ഡകാവ്യമാണ് വേദഘോഷം. 2013ൽ യേശുവിന്‍റെ ജീവചരിത്രം ശ്രീയേശുഘോഷം എന്ന പേരിൽ മഹാകാവ്യമാക്കി. നിരവധി ക്രിസ്ത്യൻ ഭക്തിഗാനങ്ങളും കഥാപ്രസംഗങ്ങളും നാടകങ്ങളും രചിച്ചു.

വള്ളംകളി മത്സരങ്ങളിൽ ക്യാപ്ടനായും തുഴച്ചിൽകാരനായുമൊക്കെ അദ്ദേഹം നിറഞ്ഞു നിന്നു. ദീപിക പത്രത്തിന്‍റേയും ദീപിക ബാലജനസഖ്യത്തിന്‍റേയും വളർച്ചയ്ക്ക് നേതൃത്വം നല്കാനും അദ്ദേഹത്തിനായി.

ഭാര്യ: ലീലാമ്മ എടത്വ ചേന്നങ്കരി ഇരുപത്തഞ്ചിൽ കുടുംബാംഗം. മക്കൾ : സോവി , സാബു (കാർമൽ പോളി ടെക്‌നിക് പുന്നപ്ര), സിസി (സെന്‍റ് ഫിലോമിനാസ് എൽപിഎസ് ആർപ്പൂക്കര), ജേക്കബ് (സെനഗൽ), എലിസബത്ത് . മരുമക്കൾ: റോസി അരിക്കുടി, ലിസമ്മ വലിയവീട്ടിൽ (എച്ച്എം സെന്‍റ് നിക്കോളാസ് എൽപിഎസ് കരുമാടി), എൽ.ജെ. ചാവറ (റിട്ട. അധ്യാപിക സെന്‍റ് ജോസഫ് യുപി സ്‌കൂൾ മാന്നാനം), തേജോ തെരേസാ പോങ്ങന്തറ തത്തംപള്ളി, ആന്‍റോ ജോസ് പുത്തൻപുരയ്ക്കൽ (അബുദാബി). പരേതനായ ഫാ. സിറിയക് കളത്തിൽ (ചങ്ങനാശേരി അതിരൂപതാ മുൻ ചാൻസിലർ), സിസ്റ്റർ ക്രിസ്പിൻ എസ്ഡി (പ്രൊവിൻഷ്യൽ ഹൗസ് ചെത്തിപ്പുഴ), സിസ്റ്റർ മറിയാമ്മ ജെ. കളത്തിൽ എഫ്എംഎം ലൂർദുപുരം, സിസ്റ്റർ ജെസി എസ്ഡി (സെനിറ്ററി ഹോം എലിക്കുളം) എന്നിവർ സഹോദരങ്ങളാണ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.