പോപ്പുലർ ഫ്രണ്ടുമായി കോണ്‍ഗ്രസ് കൈകോർത്തെന്നു മോദി : Deepika.com National News |

Click here for detailed news of all items

പോപ്പുലർ ഫ്രണ്ടുമായി കോണ്‍ഗ്രസ് കൈകോർത്തെന്നു മോദി

Monday, April 29, 2024 3:50 AM IST

ന്യൂഡൽഹി: വയനാട്ടിൽ രാഹുൽ ഗാന്ധിയുടെ വിജയത്തിനായി പോപ്പുലർ ഫ്രണ്ടുമായി കോണ്‍ഗ്രസ് കൈകോർത്തെന്ന ആരോപണവുമായി പ്രധാനമന്ത്രി നരേന്ദ്ര മോദി.

ദക്ഷിണ ഗോവയിലെ തെരഞ്ഞെടുപ്പ് റാലിയിലായിരുന്നു പ്രധാനമന്ത്രിയുടെ പരാമർശം. കർണാടകയിൽ കോണ്‍ഗ്രസ് അധികാരത്തിൽ വന്നതു മുതൽ സംസ്ഥാനത്തെ ക്രമസമാധാന നില വഷളായെന്നും മോദി ആരോപിച്ചു.

ബംഗളൂരുവിലെ കഫേയിൽ ബോംബ് സ്ഫോടനമുണ്ടായപ്പോഴും കോണ്‍ഗ്രസ് സർക്കാർ അത് കാര്യമായി എടുത്തില്ല. സിലിണ്ടർ സ്ഫോടനം എന്നുപോലും അവർ ആദ്യം വിശേഷിപ്പിച്ചു. തീവ്രവാദത്തെ പിന്തുണച്ച ദേശവിരുദ്ധ സംഘടനയായ നിരോധിത പിഎഫ്ഐയെ വോട്ടിനുവേണ്ടി കോണ്‍ഗ്രസ് പിന്തുണയ്ക്കുകയാണ്- മോദി ആരോപിച്ചു.

കോണ്‍ഗ്രസിന്‍റെ രാജകുമാരന്‍റെ വിദേശയാത്രകൾ ഒരു എക്സ്റേ മെഷീൻ കൊണ്ടുവരാനാണെന്നും മോദി പരിഹസിച്ചു. കോണ്‍ഗ്രസ് അധികാരത്തിലെത്തിയാൽ രാജ്യത്തിന്‍റെ എക്സ്റേ എടുക്കും. വസ്തുവകകൾ, ബാങ്ക് ലോക്കറുകൾ, ഭൂമികൾ, വാഹനങ്ങൾ, സ്ത്രീകളുടെ ആഭരണങ്ങൾ, സ്വർണം, മംഗല്യസൂത്രം എന്നിവ എക്സ് റേ ചെയ്യും. എല്ലാ വീടുകളും റെയ്ഡ് ചെയ്യുകയും നിങ്ങളുടെ സ്വത്തുക്കൾ പിടിച്ചെടുക്കുകയും ചെയ്യും. അങ്ങനെ പിടിച്ചെടുക്കുന്ന സന്പത്ത് കോണ്‍ഗ്രസിന്‍റെ വോട്ട് ബാങ്കിനു വിതരണം ചെയ്യും. കോണ്‍ഗ്രസ് അപകടകരമായ വോട്ട് ബാങ്ക് രാഷ്‌ട്രീയമാണ് നടത്തുന്നതെന്നും മോദി കുറ്റപ്പെടുത്തി.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.