പതഞ്ജലി: ഉത്തരാഖണ്ഡ് ലൈസൻസിംഗ് അഥോറിറ്റിയെ ശകാരിച്ച് സുപ്രീംകോടതി : Deepika.com National News |

Click here for detailed news of all items

പതഞ്ജലി: ഉത്തരാഖണ്ഡ് ലൈസൻസിംഗ് അഥോറിറ്റിയെ ശകാരിച്ച് സുപ്രീംകോടതി

Wednesday, May 1, 2024 3:02 AM IST

ന്യൂഡൽഹി: പതഞ്ജലി മരുന്നുകൾക്കു ലൈസൻസ് നൽകിയ ഉത്തരാഖണ്ഡ് സ്റ്റേറ്റ് ലൈസൻസിംഗ് അഥോറിറ്റി (എസ്എൽഎ)യെ ശകാരിച്ചു സുപ്രീംകോടതി. പതഞ്ജലിയുടെ കോടതി അലക്ഷ്യവുമായി ബന്ധപ്പെട്ട കേസ് പരിഗണിക്കവേയാണ് ജസ്റ്റീസുമാരായ ഹിമ കോഹ്‌ലി, അഹ്സനുദീൻ അമാനുള്ള എന്നിവരുൾപ്പെട്ട ബെഞ്ച് എസ്എൽഎയെ ശാസിച്ചത്.

തെറ്റിദ്ധരിപ്പിക്കുന്ന പരസ്യം നൽകി മരുന്നിറക്കിയ പതഞ്ജലിക്കെതിരേ വർഷങ്ങളായി നടപടി സ്വീകരിക്കാത്തതിൽ എട്ടു ദിവസത്തിനുള്ളിൽ എസ്എൽഎ മറുപടി നൽകണമെന്നും കോടതി പറഞ്ഞു.

എസ്എൽഎ കഴിഞ്ഞ ദിവസം സത്യവാങ്മൂലം നൽകിയിരുന്നു. ഏപ്രിൽ 15 മുതൽ പതഞ്ജലിയുടെ 14 ഉത്പന്നങ്ങൾ നിരോധിച്ചതായി എസ്എൽഎ തിങ്കളാഴ്ച സമർപ്പിച്ച സത്യവാങ്മൂലത്തിൽ പറയുന്നു.

അതേസമയം, മാപ്പപേക്ഷ പ്രസിദ്ധീകരിച്ചെന്നു പറയുന്ന പത്രങ്ങളുടെ യഥാർഥ പേജ് ഹാജരാക്കാൻ പതഞ്ജലിയുടെ അഭിഭാഷകരോടു കോടതി നിർദേശിച്ചു.

കൊറോണോയിൽ എന്ന മരുന്ന് കോവിഡിനുള്ളതാണെന്നു വ്യാജപ്രചാരണം നടത്തിയാണ് പതഞ്ജലി ഇറക്കിയത്. ഇത്തരം പരസ്യങ്ങൾ പ്രസിദ്ധീകരിച്ചത് നിയമവിരുദ്ധമാണെന്ന് ആരോപിച്ചാണ് ഐഎംഎ സുപ്രീം കോടതിയെ സമീപിച്ചത്.

കേസിൽ ബാബാ രാംദേവും ആചാര്യ ബാലകൃഷ്ണയും പരസ്യമായി മാപ്പു പറയണമെന്നു സുപ്രീംകോടതി നേരത്തെ നിർദേശിച്ചിരുന്നു. മാപ്പ് പറയാൻ വൈകിയതിനെത്തുടർന്നാണ് ഇരുവർക്കുമെതിരേ കോടതിയലക്ഷ്യ കേസ് ഫയൽ ചെയ്തത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.