ബോളിവുഡ് താരകേന്ദ്രമായ ബാന്ദ്രയില്‍ 119 കോടിയുടെ ഫ്ലാറ്റ് സ്വന്തമാക്കി താരദമ്പതികളായ രണ്‍വീര്‍ സിംഗും ദീപിക പാദുക്കോണും. ബോളിവുഡ് നടീനടന്‍മാരുടെ പ്രിയങ്കരമായ സ്ഥലങ്ങളിലൊന്നാണ് ബാന്ദ്ര. മുംബൈ ബാന്ദ് സ്റ്റാന്‍റിലെ സാഗര്‍ റേഷം എന്ന കെട്ടിടത്തിലാണ് അപ്പാര്‍ട്ട്‌മെന്‍റ് സ്ഥിതി ചെയ്യുന്നത്.
16,17,18,19 നിലകള്‍ സമന്വയിപ്പിച്ചുകൊണ്ടുള്ള ക്വാഡ്രപ്ലക്‌സ് അപ്പാര്‍ട്ട്‌മെന്‍റാണ് ഇരുവരും സ്വന്തമാക്കിയിരിക്കുന്നതെന്നാണ് റിപ്പോര്‍ട്ടുകള്‍. ഷാരുഖ് ഖാന്‍റെ മന്നത്ത് ബംഗ്ലാവിനും സല്‍മാന്‍ ഖാന്‍റെ ഗാലക്‌സി അപ്പാര്‍ട്ട്‌മെന്‍റിനും അടുത്തായി വരും ഇരുവരുടെയും പുതിയ വസതി.
രണ്‍വീര്‍ സിംഗും പിതാവ് ജഗ്ജീത് സിംഗ് ഭവാനിയും ചേര്‍ന്ന് ഇതേ കെട്ടിടത്തില്‍ തന്നെ 118.94 കോടിയുടെ ഫ്ലാറ്റ് സ്വന്തമാക്കിയിട്ടുണ്ട്. നിര്‍മാണം നടന്നു വരികയാണ്. 11266 ചതുരശ്ര അടി കാര്‍പെറ്റ് ഏരിയായും 1300 ചതുരശ്ര അടി എക്‌സ്‌ക്ലൂസിവ് ടെറസും ഈ ആഡംബര വസതിക്കുണ്ട്.
കൂടാതെ 19 പാര്‍ക്കിംഗ് സ്ലോട്ടുകളും ഇതിനൊപ്പം വരും. സ്ഥലമിടപാടിനായി 7.13കോടി രൂപയുടെ സ്റ്റാമ്പ് ഡ്യൂട്ടി അടച്ചിട്ടുണ്ട്. രണ്‍വീറിന്‍റെ മീഡിയ കമ്പനിയുടെ പേരിലാണ് അപാര്‍ട്‌മെന്‍റ് രജിസ്റ്റര്‍ ചെയ്തിരിക്കുന്നത്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.