മാരിടൈം യൂണിവേഴ്സിറ്റിയിൽ എംബിഎ അഡ്മിഷനു പ്രവേശന പരീക്ഷ
കേന്ദ്ര ഗവണ്മെന്റിനു കീഴിൽ ചെന്നൈ ആസ്ഥാനമായുള്ള ഇന്ത്യൻ മാരിടൈം യൂണിവേഴ്സിറ്റി എംബിഎ അഡ്മിഷനു പൊതു പ്രവേശന പരീക്ഷ നടത്തുന്നു. ജനുവരി നാലിനു പതിനൊന്നു മുതൽ രണ്ടു വരെയാണു പ്രവേശന പരീക്ഷ. ഡിസംബർ 10 വരെ ഓണ്ലൈനായി അപേക്ഷ സമർപ്പിക്കാം. ഡിസംബർ 20 മുതൽ ഹാൾടിക്കറ്റുകൾ ഡൗണ്ലോഡ് ചെയ്യാം. പരീക്ഷാ ഫലം ജനുവരി പത്തിനു പ്രസിദ്ധീകരിക്കും.
ഇന്റർനാഷണൽ ട്രാൻസ്പോർട്ടേഷൻ ആൻഡ് മാനേജ്മെന്റ്, പോർട്ട് ആൻഡ് ഷിപ്പിംഗ് മാനേജ്മെന്റ് എന്നീ സ്പെഷലൈസേഷനോടു കൂടിയതാണു എംബിഎ കോഴ്സ്. കൊച്ചി, വിശാഖപട്ടണം, ചെന്നൈ, കോൽക്കത്ത കാന്പസുകളിലാണ് പ്രോഗ്രാം നടത്തുന്നത്. രണ്ടു വർഷമാണു കോഴ്സിന്റെ കാലാവധി.
അപേക്ഷാ ഫീസ് 1000 രൂപ. സംവരണ വിഭാഗങ്ങൾക്ക് 700 രൂപ. ക്വാണ്ടിറ്റേറ്റീവ് എബിലിറ്റി, ഡാറ്റാ ഇന്റർപ്രറ്റേഷൻ, വെർബൽ എബിലിറ്റി, ലോജിക്കൽ റീസണിംഗ് എന്നിവയിൽ 120 മൾട്ടിപ്പിൾ ചോയ്സ് മാതൃകയിലുള്ളതാണു പ്രവേശന പരീക്ഷ. നെഗറ്റീവ് മാർക്ക് ഇല്ല.
കൊച്ചി, ബംഗളൂരു, ഭോപ്പാൽ, ചെന്നൈ, ഗോഹട്ടി, ഹൈദരാബാദ്, ജയ്പുർ, കോൽക്കത്ത, ലക്നോ, മുംബൈ, ന്യൂഡൽഹി, പാറ്റ്ന എന്നിവിടങ്ങളിലാണു പരീക്ഷാ കേന്ദ്രങ്ങൾ. ഒരാൾക്കു മൂന്നു സെന്ററുകൾ വരെ തെരഞ്ഞെടുക്കാം.
50 ശതമാനം മാർക്കോടെ ബിരുദം നേടിയവർക്ക് അപേക്ഷിക്കാം. കൂടാതെ പത്ത്, പന്ത്രണ്ട് ക്ലാസുകളിൽ ഇംഗ്ലീഷിന് 50 ശതമാനം മാർക്ക് നേടിയിരിക്കണം. ഒരു വർഷം ഏകദേശം രണ്ടു ലക്ഷം രൂപയാണ് ഫീസ്.
വെബ്സൈറ്റ്: www.imu.ac.in.