വാഷിംഗ്ടൺ ഡിസി: അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ അടുത്ത മാസം ഇന്ത്യ സന്ദർശിക്കും. വാഷിംഗ്ടണിൽ വെച്ച് ഇന്ത്യൻ വിദേശകാര്യ സെക്രട്ടറി വിക്രം മിസ്രിയുമായി നടത്തിയ കൂടിക്കാഴ്ചയ്ക്ക് പിന്നാലെയാണ് ഈ സന്ദർശന പ്രഖ്യാപനം. മൂന്ന് ദിവസത്തെ ഔദ്യോഗിക സന്ദർശനത്തിനായി അമേരിക്കയിലെത്തിയതായിരുന്നു വിക്രം മിസ്രി.
വൈറ്റ് ഹൗസിൽ വെച്ച് നടന്ന കൂടിക്കാഴ്ചയിൽ വ്യാപാരം, പ്രതിരോധം, നിർണായക ധാതുക്കൾ, ക്വാഡ് സഖ്യം തുടങ്ങിയ സുപ്രധാന മേഖലകളിലെ സഹകരണം ഇരു നേതാക്കളും വിലയിരുത്തി. വൈറ്റ് ഹൗസിൽ നടന്ന ചർച്ചയിൽ ഇന്ത്യയിലെ യു.എസ് അംബാസഡർ സെർജിയോ ഗോറും പങ്കെടുത്തു. ചർച്ചകൾ ഏറെ ഗുണപരമായിരുന്നുവെന്നും അടുത്ത മാസം മാർക്കോ റൂബിയോയുടെ ഇന്ത്യ സന്ദർശനത്തിനായി കാത്തിരിക്കുകയാണെന്നും അദ്ദേഹം എക്സിലൂടെ അറിയിച്ചു.