വെല്ലിംഗ്ടൺ: ന്യൂസിലൻഡിൽ ഇന്നലെ നടന്ന പൊതുതെരഞ്ഞെടുപ്പിൽ ആർക്കും വ്യക്തമായ ഭൂരിപക്ഷം ലഭിച്ചില്ല. പ്രധാനമന്ത്രി ക്രിസ്റ്റഫർ ലക്സണിന്‍റെ നേതൃത്വത്തിലുള്ള മധ്യ-വലതുപക്ഷ നാഷണൽ പാർട്ടിയും പ്രതിപക്ഷനേതാവ് ക്രിസ് ഹിപ്കിൻസിന്‍റെ ലേബർ പാർട്ടിയും തമ്മിൽ കടുത്ത പോരാട്ടമാണു നടന്നത്.
നാഷണൽ പാർട്ടി 42 സീറ്റ് നേടി ഏറ്റവും വലിയ ഒറ്റകക്ഷിയായെങ്കിലും കേവലഭൂരിപക്ഷത്തിന് 19 സീറ്റുകൾ കൂടി തികയ്ക്കേണ്ടതുണ്ട്. നാഷണൽ പാർട്ടിയുടെ മുൻ സഖ്യകക്ഷികളായ എസിടി (13 സീറ്റ്), ന്യൂസീലൻഡ് ഫസ്റ്റ് (12 സീറ്റ്) എന്നിവരുടെ പിന്തുണ ചേർത്താൽ വലതുപക്ഷ സഖ്യത്തിന് നേരിയ മുൻതൂക്കമുണ്ട്.
മറുവശത്ത് 36 സീറ്റുകൾ നേടിയ ലേബർ പാർട്ടി തോൽവി സമ്മതിക്കാൻ തയാറായിട്ടില്ല. വരും ദിവസങ്ങളിൽ സഖ്യസർക്കാർ രൂപീകരണ ചർച്ചകൾ നടക്കുമെന്ന് ലേബർ നേതാവ് ക്രിസ് ഹിപ്കിൻസ് വ്യക്തമാക്കി.
ഗ്രീൻസ് (16 സീറ്റ്), ദ ഓപ്പർച്യൂണിറ്റി പാർട്ടി (7 സീറ്റ്), തദ്ദേശീയരുടെ അവകാശങ്ങൾക്കായി പ്രവർത്തിക്കുന്ന തേ പാത്തി മാവോറി (5 സീറ്റ്) എന്നിവരാണ് സഭയിലെത്തിയ മറ്റു പ്രമുഖ കക്ഷികൾ.
വിലക്കയറ്റവും തൊഴിലില്ലായ്മയുമായിരുന്നു തെരഞ്ഞെടുപ്പിലെ പ്രധാന പ്രചാരണ വിഷയങ്ങൾ. ഔദ്യോഗിക ഫലം ഈമാസം 27ന് മാത്രമായിരിക്കും പുറത്തുവരിക. അതുവരെയുള്ള ദിവസങ്ങളിൽ ക്രിസ്റ്റോഫർ ലക്സണിന്‍റെ നേതൃത്വത്തിലുള്ള കാവൽ സർക്കാരായിരിക്കും രാജ്യം ഭരിക്കുക.
Deepika
Corehub Solutions
E-paper LOGIN
LOGIN
