ചെന്നൈ: വി.എസ്. ബാബു എംഎൽഎയുടെ വിയോഗത്തോടെ കൊളത്തൂർ മണ്ഡലം വീണ്ടും ഉപതെരഞ്ഞെടുപ്പിലേക്ക് നീങ്ങുകയാണ്. കഴിഞ്ഞ നിയമസഭാ തെരഞ്ഞെടുപ്പിൽ അതികായനായ എം.കെ.സ്റ്റാലിനെ അട്ടിമറിച്ചാണ് ടിവികെ സ്ഥാനാർഥിയായ വി.എസ്. ബാബു നിയമസഭയിലെത്തിയത്. ഇതോടെ തമിഴ്നാട് രാഷ്ട്രീയത്തിലെ ഏറ്റവും ശ്രദ്ധേയമായ ഉപതെരഞ്ഞെടുപ്പുകളിലൊന്നായി കൊളത്തൂർ മാറുമെന്നുറപ്പാണ്. എന്നാൽ ഈ ഉപതെരഞ്ഞെടുപ്പിനെ ഇത്രയേറെ ശ്രദ്ധേയമാക്കുന്ന മറ്റൊരു കാര്യമുണ്ട്.
പരാജയത്തിന്റെ മുറിവുണങ്ങുംമുമ്പ് അതേ മണ്ഡലത്തിൽ വീണ്ടും ജനവിധി തേടാൻ എം.കെ. സ്റ്റാലിൻ തയാറാകുമോ? ഡിഎംകെ സ്ഥാനാർഥിയായി സ്റ്റാലിൻ തന്നെ വീണ്ടും മത്സരരംഗത്തെത്തിയാൽ കൊളത്തൂരിൽ എന്തായിരിക്കും സംഭവിക്കുക?. 2011 മുതൽ തുടർച്ചയായി മൂന്ന് തവണ സ്റ്റാലിനെ നിയമസഭയിലെത്തിച്ച മണ്ഡലമാണ് കൊളത്തൂർ. കഴിഞ്ഞ നിയമസഭാ തെരഞ്ഞെടുപ്പിൽ വി.എസ്. ബാബുവിലൂടെ ടിവികെ നടത്തിയ അട്ടിമറി ഡിഎംകെയ്ക്ക് മാത്രമല്ല, സ്റ്റാലിന്റെ വ്യക്തിപരമായ രാഷ്ട്രീയ പ്രതിച്ഛായയ്ക്കും വലിയ തിരിച്ചടിയായിരുന്നു.
8,795 വോട്ടുകളുടെ ഭൂരിപക്ഷത്തിലാണ് ബാബു സ്റ്റാലിനെ പരാജയപ്പെടുത്തിയത്. തമിഴ്നാട് രാഷ്ട്രീയത്തിൽ വിജയ് തരംഗം സൃഷ്ടിച്ച തെരഞ്ഞെടുപ്പിലെ ഏറ്റവും ശ്രദ്ധേയമായ ഫലങ്ങളിലൊന്നായിരുന്നു ഇത്. ഉപതെരഞ്ഞെടുപ്പിൽ സ്റ്റാലിൻ കളത്തിലിറങ്ങിയാൽ എങ്ങനെയും അദ്ദേഹത്തെ വിജയിപ്പിക്കാനായിരിക്കും ഡിഎംകെ ശ്രമിക്കുക. അതേസമയം സ്റ്റാലിനെ തോൽപ്പിക്കാൻ ആവനാഴിയിലെ അവസാന അമ്പും ടിവികെ പ്രയോഗിക്കുമെന്ന് ഉറപ്പായതിനാൽ കൊളത്തൂരിൽ തീപാറുന്ന പോരാട്ടത്തിനായിരിക്കും തമിഴകം സാക്ഷ്യം വഹിക്കാൻ പോകുന്നത്.