National
അയോധ്യ: അയോധ്യയിലെ രാമക്ഷേത്രത്തിനുലഭിച്ച കോടിക്കണക്കിനു രൂപ തട്ടിയെടുത്തതുമായി ബന്ധപ്പെട്ട കേസ് അന്വേഷിക്കുന്ന പ്രത്യേകസംഘത്തിനു തിരിച്ചടിയായി സിസിടിവി ദൃശ്യങ്ങളിലെ തിരിമറി.
ക്ഷേത്രത്തിൽ സ്ഥാപിച്ചിരുന്ന സിസിടിവിയിലെ ദൃശ്യങ്ങൾ മായ്ച്ചു കളയാൻ ശ്രമിച്ചതായി സംശയമുണ്ടെന്ന് പ്രത്യേകസംഘം സൂചന നൽകി. വെറും 45 ദിവസത്തെ ദൃശ്യങ്ങൾ മാത്രം ലഭ്യമാകുന്ന രീതിയിലാണ് സിസിടിവി ക്രമീകരിച്ചിരിക്കുന്നത്. ഇതും കൂടുതൽ തെളിവു കണ്ടെത്തുന്നതിനു തടസമാവുകയാണ്.
ക്ഷേത്രത്തില് ലഭിച്ച സംഭാവനകളില് ക്രമക്കേട് നടന്നുവെന്ന ആരോപണത്തെത്തുടര്ന്ന് ശ്രീ രാം ജന്മഭൂമി തീര്ഥ ട്രസ്റ്റിന്റെ അഭ്യര്ഥന പ്രകാരം കഴിഞ്ഞ 13നാണ് സംസ്ഥാന സര്ക്കാര് അന്വേഷണത്തിനു പ്രത്യേകസംഘത്തെ നിയോഗിച്ചത്.
സിസിടിവി ദൃശ്യങ്ങള് നശിപ്പിക്കാന് ശ്രമിച്ചതിന്റെ വിവരങ്ങള് അന്വേഷണസംഘം ശേഖരിച്ചിട്ടുണ്ട്. ക്ഷേത്രം ജീവനക്കാരുടെ മൊഴികളില് ഒട്ടേറെ വൈരുദ്ധ്യങ്ങള് നിലനില്ക്കുകയാണെന്നും അന്വേഷണസംഘം വ്യക്തമാക്കി.
അതേസമയം ആഭ്യന്തര കണക്കെടുപ്പ് തുടരുകയാണെന്നും ഇതുവരെ ക്രമക്കേട് ശ്രദ്ധയില്പ്പെട്ടിട്ടില്ലെന്നുമാണ് ശ്രീരാമജന്മഭൂമി ട്രെസ്റ്റ് പറയുന്നത്.
രണ്ട് ഭാരവാഹികൾ സംശയനിഴലിൽ
അയോധ്യ: രാമക്ഷേത്രത്തിലെ കൊള്ളയിൽ ക്ഷേത്രം ട്രസ്റ്റിലെ രണ്ട് ഭാരവാഹികൾ സംശയനിഴലിൽ. പ്രാഥമികാന്വേഷണത്തിനുശേഷം പ്രത്യേകസംഘമാണ് ഈ നിഗമനത്തിൽ എത്തിയത്. മൂന്നംഗ അന്വേഷണസമിതി കഴിഞ്ഞദിവസം അയോധ്യയിൽനിന്ന് ലക്നോയിലെത്തി. ഇന്ന് മുഖ്യമന്ത്രി യോഗി ആദിത്യനാഥിന് പ്രാഥമിക റിപ്പോർട്ട് നൽകാനും ആലോചനയുണ്ട്.
ക്ഷേത്രം ട്രസ്റ്റിലെ ഏതാനും പേരെ നീക്കണമെന്ന് 70 പേജുള്ള റിപ്പോർട്ടിൽ പ്രത്യേകസംഘം നിർദേശിച്ചതായി പറയപ്പെടുന്നു. രാമക്ഷേത്രം ട്രസ്റ്റിന്റെ ചീഫ് എക്സിക്യൂട്ടീവ് ഓഫീസറായി മുതിർന്ന ഐഎഎസ് ഉദ്യോഗസ്ഥനെ നിയോഗിക്കണമെന്നതാണ് മറ്റൊരു നിർദേശം.
National
ന്യൂഡൽഹി: ഇരുന്പോ ഉരുക്കോ ഇല്ലാതെ 1,800 കോടി രൂപ ചെലവിൽ നിർമിച്ച അയോധ്യയിലെ രാമക്ഷേത്രത്തിനു ആയിരം വർഷത്തെ കാലാവധി. നാലായിരത്തിലധികം തൊഴിലാളികളും കരകൗശല വിദഗ്ധരും രാപകലില്ലാതെ അഞ്ചു വർഷംകൊണ്ടു നിർമിച്ച ക്ഷേത്രത്തിന് കാലാവസ്ഥ, പ്രകൃതിദുരന്തങ്ങൾ, സമയം എന്നിവയെ 1,000 വർഷത്തേക്കെങ്കിലും അതിജീവിക്കാൻ കഴിയുമെന്ന് ശ്രീരാമ ജന്മഭൂമി തീർഥക്ഷേത്ര ട്രസ്റ്റ് വ്യക്തമാക്കി.
2020ൽ തുടങ്ങിയ ക്ഷേത്രമിർമാണം പൂർത്തിയാക്കിയതിന്റെ പ്രതീകമായാണു പ്രധാനമന്ത്രി നരേന്ദ്ര മോദി കഴിഞ്ഞ ചൊവ്വാഴ്ച പതാക ഉയർത്തൽ ചടങ്ങ് നടത്തിയത്.
ലോക്സഭ തെരഞ്ഞെടുപ്പിനുമുന്പായി കഴിഞ്ഞ വർഷം ജനുവരി 22ന് പ്രധാനമന്ത്രി മോദി അയോധ്യയിലെ രാമക്ഷേത്രത്തിലെ പൂജയും ഉദ്ഘാടനവും നിർവഹിച്ചിരുന്നു. വിശാല ഓഡിറ്റോറിയവും മൊത്തം ലാൻഡ്സ്കേപ്പിംഗും ചുറ്റുമതിലുകളും ഉൾപ്പെടെയുള്ള ക്ഷേത്രസമുച്ചയത്തിന്റെ നിർമാണം അടുത്ത വർഷം അവസാനത്തോടെയാകും പൂർത്തിയാകുക.
ക്ഷേത്രനിർമാണത്തിനുള്ള പ്രാരംഭ സംഭാവനയായി 3,000 കോടി രൂപ ലഭിച്ചിരുന്നു. ഇതിൽ 1,800 കോടിയാണു ക്ഷേത്രത്തിനായി ചെലവഴിച്ചത്. റൂർക്കിയിലെ കേന്ദ്ര കെട്ടിട നിർമാണ ഗവേഷണ ഇൻസ്റ്റിറ്റ്യട്ട് (സെൻട്രൽ ബിൽഡിംഗ് റിസർച്ച് ഇൻസ്റ്റിറ്റ്യൂട്ട്- സിഎസ്ഐആർ, സിബിആർഐ), മദ്രാസ്, ഡൽഹി, മുംബൈ, ഗോഹട്ടി ഐഐടികൾ, ബംഗളൂരുവിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ആസ്ട്രോഫിസിക്സ് എന്നിവിടങ്ങളിൽനിന്നുള്ള എൻജിനിയർമാരുടെയും ശാസ്ത്രജ്ഞരുടെയും പിന്തുണയോടെയാണ് ഇരുന്പും ഉരുക്കുമില്ലാതെ ആയിരം വർഷം നിലനിൽക്കുന്ന ക്ഷേത്രം നിർമിച്ചത്.
പ്രധാനമന്ത്രി മോദിയുടെ മുൻ പ്രിൻസിപ്പൽ സെക്രട്ടറിയും യുപി കേഡർ ഐഎഎസ് ഉദ്യോഗസ്ഥനുമായിരുന്ന നൃപേന്ദ്ര മിശ്രയാണ് ശ്രീരാമ ജന്മഭൂമി തീർഥ ക്ഷേത്ര ട്രസ്റ്റിന്റെ നിർമാണ സമിതി ചെയർമാൻ. ആകെ 70 ഏക്കറിലാണു രാമക്ഷേത്ര സമുച്ചയം വ്യാപിച്ചുകിടക്കുന്നത്. ഇതിൽ 2.7 ഏക്കറിൽ പ്രധാന ക്ഷേത്രസമുച്ചയം ഉൾപ്പെടെ 20 ഏക്കറാണു നിർമാണങ്ങൾക്കായി ഉപയോഗിച്ചത്. ശേഷിച്ച 50 ഏക്കറിൽ 30 ഏക്കർ ചെറുവനം ഉൾപ്പെടെ ഹരിത മേഖലയാക്കും. നാലു കിലോമീറ്റർ ചുറ്റളവിലാണു ക്ഷേത്രസമുച്ചയത്തിന്റെ മതിൽക്കെട്ട്.
National
ന്യൂഡൽഹി: അയോധ്യയിലെ രാമക്ഷേത്രത്തിന്റെ ഗോപുരത്തിൽ പ്രധാനമന്ത്രി നരേന്ദ്രമോദി കാവി പതാക ഉയർത്തി. ആർഎസ്എസ് മേധാവി മോഹൻ ഭാഗവത്, യുപി മുഖ്യമന്ത്രി യോഗി ആദിത്യനാഥ് തുടങ്ങിയവർ ചടങ്ങിൽ പങ്കെടുത്തു.
പ്രധാന ക്ഷേത്രത്തിൽ പ്രാർഥന നടത്തി ആരതി ഉഴിഞ്ഞ ശേഷമാണ് മോദി പതാക ഉയർത്തിയത്. പത്തടി ഉയരവും 20 അടി നീളവുമുള്ളതാണു പതാക.
"നൂറ്റാണ്ടുകൾ പഴക്കമുള്ള മുറിവാണ് ഇന്ന് ഉണങ്ങിയത്. നമ്മൾ ശ്രീരാമഭഗവാനിൽ നിന്ന് പഠിക്കണം. അദ്ദേഹത്തിന്റെ വ്യക്തിത്വം മനസിലാക്കണം. അദ്ദേഹത്തിന്റെ സ്വഭാവഗുണങ്ങൾ സ്വാംശീകരിക്കണം, 2047ൽ രാജ്യം സ്വാതന്ത്രത്തിന്റെ നൂറാം വാർഷികം ആഘോഷിക്കുമ്പോൾ ഒരു വികസിത രാഷ്ട്രം കെട്ടിപ്പടുക്കണം. ഇന്ത്യയുടെ അടുത്ത ആയിരം വർഷത്തേക്കുള്ള അടിത്തറ നമ്മൾ ശക്തമാക്കണം'– മോദി പറഞ്ഞു.
191 അടി ഉയരത്തിലുള്ള ഗോപുരത്തിലാണ് പ്രധാനമന്ത്രി പതാക ഉയർത്തിയത്. ത്രികോണാകൃതിയിലുള്ള പതാകയിൽ നടുക്ക് സൂര്യ അടയാളവും അതിനുള്ളിൽ ഓം ചിഹ്നവും ആലേഖനം ചെയ്തിട്ടുണ്ട്. ആത്മാഭിമാനം, ഐക്യം, സാംസ്കാരിക തുടർച്ച എന്നിവയെ പ്രതിനിധീകരിക്കുന്നതാണ് പതാക.