Business
ന്യൂഡൽഹി: വൈ ഫൈ കോളിംഗ് എന്നറിയപ്പെടുന്ന വോയ്സ് ഓവർ വൈ ഫൈ (VoWiFi) രാജ്യവ്യാപകമാക്കിയതായി ബിഎസ്എൻഎൽ അറിയിച്ചു. സെല്ലുലർ നെറ്റ്വർക്കുകളുടെ സഹായമില്ലാതെ വൈ ഫൈ നെറ്റ്വർക്കിലൂടെ വോയ്സ് കോളുകൾ നടത്താനും സന്ദേശങ്ങൾ അയയ്ക്കാനും കഴിയുന്ന സംവിധാനമായ വൈ ഫൈ കോളിംഗ് രാജ്യത്തെ എല്ലാ ഉപഭോക്താക്കൾക്കും ലഭ്യമായെന്ന് ബിഎസ്എൻഎൽ അറിയിച്ചു.
ദുർബലമായ മൊബൈൽ സിഗ്നലുള്ള പ്രദേശങ്ങളിൽ വ്യക്തവും വിശ്വസനീയവുമായ കണക്ടിവിറ്റി ഉറപ്പാക്കാൻ വോയ്സ് ഓവർ വൈ ഫൈ ഉപഭോക്താക്കളെ സഹായിക്കുന്നുണ്ട്.മിക്ക സ്മാർട്ട്ഫോണുകളിലും വോയ്സ് ഓവർ വൈ ഫൈ സംവിധാനം ലഭ്യമാണ്.
ഉപഭോക്താക്കൾക്ക് അവരുടെ ഫോണുകളിൽ വൈ ഫൈ കോളിംഗ് ഓപ്ഷൻ പ്രവർത്തനക്ഷമമാക്കിയാൽ മതി.സഹായത്തിനായി ഉപഭോക്താക്കൾക്ക് അടുത്തുള്ള ബിഎസ്എൻഎൽ ഉപഭോക്തൃ സേവനകേന്ദ്രം സന്ദർശിക്കാമെന്നും അല്ലെങ്കിൽ 18001503 ഹെൽപ്ലൈനിൽ ബന്ധപ്പെടാമെന്നും ബിഎസ്എൻഎൽ അറിയിച്ചു.
Business
പരവൂർ: പൊതുമേഖല ടെലികോം കന്പനിയായ ഭാരത് സഞ്ചാർ നിഗം ലിമിറ്റഡ് (ബിഎസ്എൻഎൽ) 3 ജി സേവനങ്ങൾ അവസാനിപ്പിക്കുന്നു. ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ലെങ്കിലും ഇതിനുള്ള നടപടികൾ ആരംഭിച്ചുകഴിഞ്ഞു.
4 ജി സേവനങ്ങൾ രാജ്യവ്യാപകമായി അവതരിപ്പിച്ചതിനു പിന്നാലെയാണ് 3 ജി സേവനങ്ങൾ അവസാനിപ്പിക്കാൻ ബിഎസ്എൻഎൽ തീരുമാനിച്ചിട്ടുള്ളത്.
രാജ്യത്തു നിലവിൽ 9,74,81 4 ജി ടവറുകൾ ബിഎസ്എൻഎൽ സ്ഥാപിച്ചിട്ടുണ്ട്. ഇതിന്റെ എണ്ണം വർധിപ്പിക്കാനും നീക്കം തുടങ്ങിയിട്ടുണ്ട്. ബിഎസ്എൻഎല്ലിനു രാജ്യത്ത് 3 ജി ടവറുകൾ 58,919 എണ്ണമുണ്ട്. 3 ജി സേവനം നൽകുന്നതിനായി ബിഎസ്എൻഎല്ലുമായി സഹകരിക്കുന്ന ചൈനീസ് കമ്പനിയുമായുള്ള കരാർ ഉടൻ അവസാനിപ്പിക്കാനാണു തീരുമാനം. 3 ജി സേവനം അവസാനിപ്പിക്കുന്നതുമായി ബന്ധപ്പെട്ട നടപടികൾ സ്വീകരിക്കാൻ എല്ലാ സർക്കിളുകൾക്കും നിർദേശം നൽകിയിട്ടുണ്ട്.
2025 സെപ്റ്റംബർ വരെയുള്ള കണക്കുകൾപ്രകാരം 9.23 കോടി മൊബൈൽ വരിക്കാരാണ് ബിഎസ്എൻഎല്ലിനുള്ളത്. ഇതിൽ ഏഴു കോടി പേർ ഇപ്പോഴും 3 ജി സേവനങ്ങളാണ് ഉപയോഗിക്കുന്നത്. ഇത്രയും പേർക്കും ബിഎസ്എൻഎൽ ഓഫീസിലെത്തി 4 ജി സിമ്മുകൾ എടുക്കുന്നതിനുള്ള അവസരം നൽകും.
അതേസമയം ബിഎസ്എൻഎല്ലിന്റെ അധിക 4 ജി സൈറ്റുകളും 5 ജി അപ്ഗ്രേഡും ഉണ്ടാകുമെന്നാണ് അധികൃതർ നൽകുന്ന സൂചന. സമീപഭാവിയിൽത്തന്നെ 23,000 നാലാം തലമുറ (4 ജി) സൈറ്റുകൾകൂടി പുറത്തിറക്കും. കൂടാതെ സ്വകാര്യമേഖലയിലെ കമ്പനികളുമായി മത്സരിക്കുന്നതിന് അടുത്ത തലമുറ (5 ജി) സാങ്കേതിക വിദ്യയിലേക്ക് നെറ്റ്വർക്കുകളെ അപ്ഗ്രേഡ് ചെയ്യും.
ഇതുകൂടാതെ സ്വകാര്യ കമ്പനികളുമായി 5 ജി സേവനം പങ്കിടാനും ബിഎസ്എൻഎൽ ആലോചിക്കുന്നുണ്ട്.
Business
പരവൂർ: സ്വകാര്യ ഓപ്പറേറ്റർമാരെ അമ്പരിപ്പിച്ച് ബിഎസ്എൻഎൽ വീണ്ടും പുതിയ പ്രീപെയ്ഡ് പ്ലാൻ അവതരിപ്പിച്ചു. 50 ദിവസത്തേയ്ക്ക് 347 രൂപയാണ് പുതിയ പ്ലാനിന്റെ നിരക്ക്. ഈ പ്ലാനിൽ ഉപയോക്താക്കൾക്ക് പ്രതിദിനം രണ്ട് ജിബി ഡാറ്റ, അൺലിമിറ്റഡ് കോളിംഗ്, ദിവസേന 100 സൗജന്യ എസ്എംഎസുകൾ എണിവ ഉൾപ്പെടെ നിരവധി ആനുകൂല്യങ്ങൾ വാഗ്ദാനം ചെയ്യുന്നു.
നിലവിൽ രാജ്യത്തെ പ്രമുഖ ടെലികോം സേവന ദാതാക്കളിൽ ആരും ഇത്തരത്തിൽ 50 ദിവസം കാലാവധിയുള്ള പ്ലാനുകളൊന്നും നൽകുന്നില്ല. ഈ പ്ലാൻ അനുസരിച്ച് ഉപയോക്താക്കൾക്ക് പ്രതിദിനം ഏഴ് രൂപയിൽ താഴെ മാത്രമേ ചെലവ് വരുന്നുള്ളൂ എന്നതാണ് ബിഎസ്എൻഎൽ ഏറ്റവും വലിയ സവിശേഷതയായി എടുത്തുകാട്ടുന്നത്.
സ്വകാര്യ കമ്പനികളിൽ ഭൂരിഭാഗവും 56 ദിവസത്തെ പ്രീപെയ്ഡ് പ്ലാനുകളാണ് അവതരിപ്പിച്ചിട്ടുള്ളത്. ഇത് ബിഎസ്എൻഎലിന്റെ ഇപ്പോഴത്തെ ഓഫറിനേക്കാൾ ഇരട്ടിയോളം ചെലവേറിയതുമാണ്. ബിഎസ്എൻഎൽ അവരുടെ 50 ദിവസത്തെ പ്രീപെയ്ഡ് പ്ലാനിന്റെ വിശദാംശങ്ങൾ സമൂഹ മാധ്യമമായ എക്സിലൂടെയാണ് കഴിഞ്ഞ ദിവസം പങ്കുവച്ചത്.
ഈ പ്ലാനിൽ സൗജന്യ ദേശീയ റോമിംഗും ഉപയോക്താക്കൾക്ക് ലഭിക്കും. ഇത് കൂടാതെ ബിഐടിവി ആപ്പിലൂടെ ഉപയോക്താക്കൾക്ക് 350 ലധികം ലൈവ് ടിവി ചാനലുകൾ കാണാനും അവസരമുണ്ട്. വൈവിധ്യമാർന്ന ജനപ്രിയ സ്ട്രീമിംഗ് ആപ്പുകൾ ആസ്വദിക്കാനും അനുവദിക്കുന്ന സേവനമായ ബിഐടിവിയിലേക്ക് സൗജന്യ ആക്സസ് ആണ് ബിഎസ്എൻഎൽ നൽകുന്നത്.
ഈ വർഷം അവസാനമോ അടുത്ത വർഷം ആദ്യമോ ബിഎസ്എൻഎലിന്റെ 5-ജി സേവനം രാജ്യത്ത് ഉപയോക്താക്കൾക്ക് ലഭ്യമായി തുടങ്ങും. രാജ്യത്ത് ഉടനീളമുള്ള ടെലികോം സർക്കിളുകളിലേക്ക് ഈ സേവനം വ്യാപിപ്പിക്കുന്നതിന് മുമ്പ് ഡൽഹിയിലും മുംബൈയിലും പൈലറ്റ് പ്രോജക്ടായി മെയ്ഡ് ഇൻ ഇന്ത്യ 5-ജി സേവനം ഉടൻ ആരംഭിക്കാനുള്ള നടപടികൾ പുരോഗമിക്കുകയാണ്.
ഇതിന്റെ മുന്നോടിയായാണ് രാജ്യത്ത് ഉടനീളം കൂടുതൽ ഉപയോക്താക്കളെ ആകർഷിക്കുന്നതിനായി ഏറ്റവും ചെലവ് കുറഞ്ഞ പ്രീപെയ്ഡ് പ്ലാനുകളുമായി ബിഎസ്എൻഎൽ രംഗത്ത് വന്നിട്ടുള്ളത്. ക്രിസ്മസ്-പുതുവത്സരം പ്രമാണിച്ച് ഇതിലും ആകർഷകമായ പ്ലാനുകൾ അവതരിപ്പിക്കാനുള്ള തയാറെടുപ്പിലുമാണ് ബിഎസ്എൻഎൽ.
Business
കൊച്ചി: ബിഎസ്എൻഎലിൽ മുതിർന്ന പൗരന്മാർക്കായി ഒരു വർഷം കാലാവധിയുള്ള സമ്മാൻ പ്രീപെയ്ഡ് മൊബൈൽ പ്ലാൻ ആരംഭിച്ചു.
1,812 രൂപയുടെ ഈ പ്ലാനിൽ 365 ദിവസത്തെ കാലാവധിയോടെ പരിധിയില്ലാത്ത കോളുകളും ദിവസേന 2 ജിബി ഡാറ്റയും 100 എസ്എംഎസും ലഭിക്കും.
ഇതിനുപുറമെ ഒടിടി സേവനങ്ങളും 500 ലൈവ് ചാനലുകളുമുള്ള ബിഐ ടിവി പ്രീമിയം സബ്സ്ക്രിപ്ഷനും ആറു മാസത്തേക്ക് സൗജന്യമാണ്. ഈ പ്ലാൻ പുതിയ കണക്ഷനുകൾക്കും മൊബൈൽ നമ്പർ പോർട്ട് ചെയ്യുന്നവർക്കും നവംബർ 18 വരെ ലഭിക്കും.