തിരൂരങ്ങാടി: ദേശീയപാത 66ല് കൊളപ്പുറത്ത് ഓടിക്കൊണ്ടിരിക്കെ കാര് തീപിടിച്ച് നശിച്ചു. യാത്രക്കാര് അദ്ഭുതകരമായി രക്ഷപ്പെട്ടു. ചെറുമുക്ക് ജീലാനി നഗര് സ്വദേശി കോഴിക്കാട്ടില് കരീമിന്റെ ഭാര്യയും മകനും മരുമകളുമാണ് കാറിലുണ്ടായിരുന്നത്. കോഴിക്കോട് മെഡിക്കല് കോളജ് ആശുപത്രിയിലെ ചികിത്സ കഴിഞ്ഞ് മടങ്ങുന്നതിനിടെയായിരുന്നു അപകടം.
പിന്നില് വരികയായിരുന്ന കാറിലുള്ളവരാണ് തീ പടരുന്നത് ആദ്യം കണ്ടത്. ഇവര് വിവരമറിയിച്ചതിനെ തുടര്ന്ന് യാത്രക്കാര് ഉടന് പുറത്തിറങ്ങിയതിനാല് വന് ദുരന്തം ഒഴിവായി. കൂരിയാട്ടെ സ്വകാര്യ വാട്ടര് സര്വീസ് ജീവനക്കാരും നാട്ടുകാരും ചേര്ന്നാണ് തീയണച്ചത്. കാര് പൂര്ണമായും കത്തിനശിച്ചു. ഷോര്ട്ട് സര്ക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം.