ഡിട്രോയിറ്റ്: അമേരിക്കയിലെയും കാനഡയിലെയും വിശ്വാസികളുടെ പ്രാർഥനാ കൂട്ടായ്മയായ ഇന്റർനാഷണൽ പ്രെയർ ലൈനിന്റെ (ഐപിഎൽ) 653-ാമത് ഓൺലൈൻ പ്രാർഥനാ യോഗം സമാപിച്ചു.
ക്രിസ്മസ് ആഗമനകാലത്തിന്റെ ആത്മീയ ചൈതന്യത്തിൽ നടന്ന യോഗത്തിൽ ടെക്സസിലെ ലബ്ബക്കിൽ നിന്നുള്ള വചന പണ്ഡിതനും സുവിശേഷ പ്രസംഗീകനുമായ റവ. ജെയിംസ് കെ. ജോൺ മുഖ്യസന്ദേശം നൽകി.
ലോകത്തെ മാറ്റിമറിച്ച ഒരു കൂടിക്കാഴ്ച (Mary's Discoveries – An Encounter That Changed the World) എന്ന വിഷയത്തെ ആസ്പദമാക്കിയാണ് അദ്ദേഹം വചനപ്രഭാഷണം നിർവഹിച്ചത്.
ആചാരങ്ങളിൽനിന്ന് അനുഭവത്തിലേക്ക് പ്രവേശിക്കുവാൻ വിശുദ്ധ കന്യകമറിയത്തിന് സാധിച്ചതുപോലെ, വിശ്വാസികളുടെ ജീവിതത്തിലും ദൈവവുമായുള്ള ഒരു വ്യക്തിപരമായ അനുഭവം ഉണ്ടാകണമെന്ന് അദ്ദേഹം ഓർമിപ്പിച്ചു.
ഗബ്രിയേൽ ദൂതന്റെ പ്രത്യക്ഷത, ദൈവത്തിന്റെ ശാശ്വതമായ പദ്ധതികൾ, വാഗ്ദാനങ്ങളുടെ വിശ്വസ്തത, അപരിമിതമായ ദൈവശക്തി എന്നിവയെക്കുറിച്ചുള്ള ആഴമേറിയ ചിന്തകൾ യോഗത്തിൽ പങ്കുവച്ചു.
ശാശ്വതമായ ദൈവികപദ്ധതികളെക്കാൾ താത്കാലികമായ ലോകസുഖങ്ങൾക്ക് നാം പ്രാധാന്യം നൽകുമ്പോൾ നമ്മുടെ ജീവിതക്രമം തന്നെ മാറിപ്പോകുന്നു. ഇവിടെയാണ് മറിയം നമുക്ക് ഒരു മാതൃകയാകുന്നതെന്ന് അച്ചൻ കൂട്ടിച്ചേർത്തു.
സി.വി. സാമുവൽ (ഡിട്രോയിറ്റ്, മിഷിഗൺ) യോഗത്തിന് ആമുഖവും സ്വാഗതവും കേരളത്തിൽ നിന്നും അമേരിക്കയിൽ കുടിയേറി 53 വർഷം പൂർത്തീകരിക്കുന്ന ഐപിഎൽ കോഓർഡിനേറ്റർ ടി. എ. മാത്യുവിന് (ഹൂസ്റ്റൺ) ആശംസകളും നേർന്നു.
ജോൺ മാത്യു അമ്പോറ്റി (ഡാളസ്, ടെക്സസ്) പ്രാരംഭ പ്രാർഥനയ്ക്കും സിസിലറ്റ് ജെയിംസ് (ലബ്ബോക്ക്, ടെക്സസ്) വേദപാഠ വായനയ്ക്കും നേതൃത്വം നൽകി. എം.വി. വർഗീസ് (അച്ചൻകുഞ്ഞ്, ന്യൂയോർക്ക്) മധ്യസ്ഥ പ്രാർഥനയ്ക്ക് നേതൃത്വം വഹിച്ചു.
ടി.എ. മാത്യു (ഹൂസ്റ്റൺ, ടെക്സസ്) നന്ദിയും അറിയിച്ചു. ഹൂസ്റ്റൺ സോവേഴ്സ് ഹാർവെസ്റ്റ് ഇവാഞ്ചലിക്കൽ ചർച്ചിലെ റവ. കെ.ബി. കുരുവിളയുടെ സമാപന പ്രാർഥനയോടും ആശീർവാദത്തോടും കൂടി യോഗം പര്യവസാനിച്ചു.
ഷിജു ജോർജ് (ഹൂസ്റ്റൺ), ജോസഫ് ടി. ജോർജ് രാജു (ഹൂസ്റ്റൺ) എന്നിവർ പ്രാർഥനാ യോഗത്തിന് സാങ്കേതിക സഹായങ്ങൾ നൽകി.