ന്യൂഡൽഹി: ഭക്ഷ്യവസ്തുക്കളുടെ വിലയിലുണ്ടായ കുതിച്ചുചാട്ടത്തെ തുടർന്ന് രാജ്യത്തെ ചില്ലറ പണപ്പെരുപ്പം കുത്തനെ ഉയർന്നു.
ഉപഭോക്തൃ വിലസൂചിക (സിപിഐ) അടിസ്ഥാനമാക്കിയുള്ള ഒക്‌ടോബറിലെ ചില്ലറ പണപ്പെരുപ്പം രണ്ടു വർഷത്തെ ഏറ്റവും ഉയർന്ന നിരക്കായ 6.09 ശതമാനത്തിലെത്തി. സെപ്റ്റംബറിൽ 5.54 ശതമാനത്തിലെത്തിലായിരുന്നു. ദേശീയ സ്റ്റാറ്റിസ്റ്റിക്സ് ഓഫിസ് പുറത്തുവിട്ട കണക്കുകൾ പ്രകാരം 2024 ഒക്ടോബറിന് (6.21%) ശേഷമുള്ള ഏറ്റവും ഉയർന്ന പണപ്പെരുപ്പ നിരക്കാണിത്.
രണ്ടു വർഷത്തിനിടെ ആദ്യമായാണ് റിസർവ് ബാങ്ക് ഓഫ് ഇന്ത്യയുടെ ഉയർന്ന പരിധിയായ ആറു ശതമാനത്തിനു മുകളിൽ പണപ്പെരുപ്പമെത്തിയത്. ആർബിഐയുടെ ലക്ഷ്യമായ നാലു ശതമാനത്തിനു മുകളിലാണ് തുടർച്ചയായ അഞ്ചാം മാസവും പണപ്പെരുപ്പം തുടരുന്നത്.
രാജ്യത്ത് ഉപഭോക്തൃവിലകൾ തുടർച്ചയായി വർധിക്കുന്ന പന്ത്രണ്ടാമത്തെ മാസമാണിത്. വിലക്കയറ്റം അളക്കാൻ ഉപയോഗിക്കുന്ന ഉത്പന്നങ്ങളുടെ പട്ടിക പരിഷ്കരിച്ചുകൊണ്ട് ഇന്ത്യ 2026 ഫെബ്രവരി 12ന് ചില്ലറ പണപ്പെരുപ്പത്തിന്‍റെ അടിസ്ഥാന വർഷം 2012ൽനിന്ന് 2024 ആയി പുതുക്കിയിരുന്നു.
ഏറ്റവും പുതിയ കണക്കുകൾ പ്രകാരം, ചില്ലറ വിലക്കയറ്റം തുടർച്ചയായ ഒന്പതാം മാസവും വർധിച്ചിരിക്കുന്നു. 2026 ജനുവരിയിൽ 2.74 ശതമാനമായിരുന്നു ഈ നിരക്ക്, ഇപ്പോൾ ഇരട്ടിയിലധികമായി ഉയർന്നു.
സവാള വിലയിൽ വർധന
ഭക്ഷ്യ പണപ്പെരുപ്പത്തിലുണ്ടായ വൻ കുതിപ്പാണ് പ്രധാനമായും നിരക്കുകൾ ഉയർത്തിയത്. സെപ്റ്റംബറിലെ 7.74 ശതമാനത്തിൽനിന്ന് 8.94 ശതമാനമായി ഭക്ഷ്യപണപ്പെരുപ്പം ഉയർന്നു. വർഷാരംഭം മുതൽ സവാളയുടെ വില ഇരട്ടിയായി വർധിച്ചു. ഇറച്ചി, പാൽ, മുട്ട തുടങ്ങിയ താരതമ്യേന വിലവ്യതിയാനം കുറഞ്ഞ പ്രോട്ടീൻ സന്പുഷ്ടമായ ഭക്ഷ്യവസ്തുക്കൾക്കും വിലകൂടിയിട്ടുണ്ട്.
സെപ്റ്റംബറിൽ 108.09 ശതമാനത്തിലെത്തിയ സവാളയുടെ വിലക്കയറ്റം ഒക്‌ടോബറിൽ 116.22 ശതമാനം രേഖപ്പെടുത്തി. വെളുത്തുള്ളി ( 54.62 %നിന്ന് 60.74 %), നാരങ്ങ (36.41 %നിന്ന് 47.30 %) എന്നിവയുടെ വിലയും ഉയർന്ന നിലയിൽ തുടരുന്നു. എന്നാൽ ഇഞ്ചിയുടെ വിലക്കയറ്റം സെപ്റ്റംബറിലെ 62.85 ശതമാനത്തിൽനിന്ന് 48.32 ശതമാനമായി കുറഞ്ഞിട്ടുണ്ട്. ഉരുളക്കിഴങ്ങ്, കോളിഫ്ളവർ, തേങ്ങ, വഴുതനങ്ങ, കാബേജ് എന്നിവയുടെ വിലക്കയറ്റത്തിൽ ഇടിവുണ്ടായിട്ടുണ്ട്.
ഗ്രാമീണ മേഖലയിൽ വിലക്കയറ്റം രൂക്ഷം
നഗരങ്ങളേക്കാൾ ഗ്രാമീണ മേഖലയെയാണ് വിലക്കയറ്റം രൂക്ഷമായി ബാധിച്ചത്. നഗരങ്ങളിൽ പണപ്പെരുപ്പം സെപ്റ്റംബറിൽ 4.88 ശതമാനത്തിൽനിന്ന് 5.41 ശതമാനമായും ഗ്രാമീണ മേഖലയിൽ 6.08 ശതമാനത്തിൽനിന്ന് 6.63 ശതമാനമായും കുതിച്ചുയർന്നു. ഭക്ഷ്യോത്പന്നങ്ങൾ അടിസ്ഥാനമാക്കിയുള്ള പണപ്പെരുപ്പത്തിലും ഗ്രാമീണമേഖല മുന്നിലാണ്. 8.06 ശതമാനത്തിൽനിന്ന് 9.09 ശതമാനത്തിലും നഗരങ്ങളിൽ 7.18 ശതമാനത്തിൽനിന്ന് 8.68 ശതമാനത്തിലും ഉയർന്നു.
കേരളം ദേശീയ നിരക്കിനു മുകളിൽ
50 ലക്ഷത്തിലധികം ജനസംഖ്യയുള്ള വലിയ സംസ്ഥാനങ്ങളിൽ 7.29 ശതമാനം പണപ്പെരുപ്പവുമായി തമിഴ്നാടാണ് പട്ടികയിൽ ഒന്നാമത്. തെലങ്കാന (7.26 %), ആന്ധ്രാപ്രദേശ് (7.25 %), മധ്യപ്രദേശ് (7.19 %), ഒഡീഷ (7.17 %) എന്നിവയാണ് തൊട്ടുപിന്നിലുള്ള സംസ്ഥാനങ്ങൾ. കേരളത്തിന്േ‍റത് (6.22 %) ദേശീയ നിരക്കിനേക്കാൾ മുകളിലാണ്.
Deepika
Corehub Solutions
E-paper LOGIN
LOGIN