ന്യൂഡൽഹി: പൂർണമായും എഥനോളിൽ ഓടുന്ന ഒരു കാർ ഒക്ടോബറിൽ പുറത്തിറക്കുമെന്ന് കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരി അറിയിച്ചു. ഈ വാഹനത്തിന് പെട്രോളിന്റെ ആവശ്യം തീരെ ഉണ്ടാകില്ലെന്നും അദ്ദേഹം കൂട്ടിച്ചേർത്തു.
ലിറ്ററിന് ഏകദേശം 25 രൂപ വിലയുള്ള ഇന്ധനം ഉപയോഗിക്കുന്ന പെട്രോൾ കാറിന് തുല്യമായിരിക്കും ഈ കാറിന്റെ പ്രവർത്തനച്ചെലവ് എന്ന് ഗഡ്കരി പറഞ്ഞു. ഡൽഹിയിൽ നടന്ന ഒരു പരിപാടിയിൽ സംസാരിക്കവെയാണ് കേന്ദ്രമന്ത്രി ഇക്കാര്യം പറഞ്ഞത്.
സർക്കാരിന്റെ ഇ20 എഥനോൾ ബ്ലെൻഡിംഗ് നയത്തെച്ചൊല്ലിയും വാഹന എൻജിനുകളിൽ ഇത് ഉണ്ടാക്കുന്ന പ്രത്യാഘാതങ്ങളെക്കുറിച്ചും പാർലമെന്റിലും സോഷ്യൽ മീഡിയയിലും കഴിഞ്ഞ ഏതാനും മാസങ്ങളായി നടക്കുന്ന വിമർശനങ്ങൾക്ക് മറുപടി നൽകുകയായിരുന്നു അദ്ദേഹം.
പെട്രോളിന് പകരം 100 ശതമാനം എഥനോളിൽ പ്രവർത്തിക്കുന്ന ടൊയോട്ടയുടെ ’ഇന്നോവ ഫ്ലെക്സ്-ഫ്യൂവൽ’ കാറിന്റെ ലോഞ്ചിനായി ഒക്ടോബറിൽ തന്നെ ക്ഷണിച്ചിട്ടുണ്ടെന്ന് ഗഡ്കരി പറഞ്ഞു. ഓടുന്നതിനിടയിൽ ഈ കാർ 60 ശതമാനം വൈദ്യുതി ഉത്പാദിപ്പിക്കുമെന്നും അദ്ദേഹം അവകാശപ്പെട്ടു.
“ലോകത്തിലെ 19 രാജ്യങ്ങളിൽ എഥനോൾ ഉപയോഗിക്കുന്നുണ്ട്, നിലവിൽ ഇന്ത്യയിലെ ഒരു വാഹനത്തിൽ നിന്നും ഇതിനെക്കുറിച്ച് പരാതികളൊന്നും വന്നിട്ടില്ല.”ഗഡ്കരി പറഞ്ഞു.
എഥനോൾ കലർന്ന ഇന്ധനങ്ങളെക്കുറിച്ച് പരാതികളില്ല
ഇന്ത്യയിൽ ഇതുവരെ എഥനോൾ കലർന്ന ഇന്ധനം ഉപയോഗിക്കുന്ന വാഹനങ്ങളിൽ നിന്ന് പരാതികളൊന്നും ലഭിച്ചിട്ടില്ലെന്നും ഗഡ്കരി വ്യക്തമാക്കി. ഇ20 പെട്രോൾ മൈലേജിനെയും എൻജിന്റെ പ്രവർത്തനത്തെയും ബാധിക്കുമെന്ന തരത്തിൽ പൊതുജനങ്ങൾക്കിടയിലും ജനപ്രതിനിധികൾക്കിടയിലും ആശങ്ക ഉയരുന്നതിനിടെയാണ് അദ്ദേഹത്തിന്റെ പ്രതികരണം.
വാഹന നിർമാതാക്കൾ, ഓട്ടോമൊബൈൽ അസോസിയേഷനുകൾ, ഉപഭോക്തൃ ഗ്രൂപ്പുകൽ എന്നിവരിൽനിന്ന് ഇ20 ഉപയോഗിക്കുന്നതുമൂലം മൈലേജ്, എൻജിന്റെ കാര്യക്ഷമത, പരിപാലനച്ചെലവ് എന്നിവയെ ബാധിക്കുന്നതിനെക്കുറിച്ച് വ്യാപകമായതോ സ്ഥിരീകരിക്കാവുന്ന തരത്തിലുള്ളതോ ആയ പരാതികൾ ലഭിച്ചിട്ടില്ലെന്ന് സർക്കാർ നേരത്തേ വ്യക്തമാക്കിയിരുന്നു. എൻജിന്റെ ഈടുനിൽപ്പും സമഗ്രികളുടെ അനുയോജ്യതയും സംബന്ധിച്ച് നടത്തിയ ലബോറട്ടറി പഠനങ്ങളും ഫീൽഡ് ട്രയലുകളും ചൂണ്ടിക്കാണിച്ചാണ് സർക്കാർ ഇതിനെ പിന്തുണയ്ക്കുന്നത്.
മറ്റ് ഫ്ലെക്സ്-ഫ്യുവൽ വാഹനങ്ങൾ
ഇന്ത്യക്കായി ഇത്തരത്തിലൊരു വാഹനം ആദ്യം ആസൂത്രണം ചെയ്തത് ടൊയോട്ടയുടെ ഇന്നോവ മാത്രമല്ല. ജൂണിൽ മാരുതി സുസുകി രാജ്യത്തെ ആദ്യത്തെ ഫ്ലെക്സ്-ഫ്യുവൽ പാസഞ്ചർ കാർ പുറത്തിറക്കിയിരുന്നു. ഇ20 മുതൽ പൂർണമായും എഥനോൾ വരെയുള്ള എഥനോൾ-പെട്രോൾ മിശ്രിതങ്ങളിൽ ഓടാൻ തക്കവണ്ണമാണ് ഫ്ലെക്സ്-ഫ്യുവൽ വാഹനങ്ങൾ രൂപകൽപ്പന ചെയ്തിരിക്കുന്നത്.
ബൈക്ക് ടാക്സികൾക്കും പ്രോത്സാഹനം
എഥനോൾ പ്രഖ്യാപനത്തോടൊപ്പം ബൈക്ക് ടാക്സി സേവനങ്ങളുടെ വ്യാപക ഉപയോഗത്തിനും ഗഡ്കരി ആഹ്വാനം ചെയ്തു. പുതിയ നിക്ഷേപങ്ങളൊന്നും കൂടാതെ തന്നെ ഇരുചക്രവാഹന ഉടമകൾക്ക് അധിക വരുമാനം നേടാൻ ആപ്പ് അധിഷ്ഠിത പ്ലാറ്റ്ഫോമുകൾ സഹായിക്കുമെന്ന് അദ്ദേഹം പറഞ്ഞു.
ഗ്രാമപ്രദേശങ്ങളിലെ നിലവിൽ ഇരുചക്രവാഹനങ്ങളുള്ളവർക്കായി ഈ സൗകര്യം തുറന്നുകൊടുക്കാൻ സംസ്ഥാന ഗതാഗത മന്ത്രിമാരോട് ആവശ്യപ്പെട്ടിട്ടുണ്ടെന്നും ഇത് നടപ്പിലാക്കിയാൽ കോടിക്കണക്കിന് ആളുകൾക്ക് തൊഴിൽ ലഭിക്കുമെന്നും അദ്ദേഹം അവകാശപ്പെട്ടു.
Deepika
E-paper LOGIN
LOGIN
