വാഷിംഗ്ടൺ ഡിസി : ടെക് ഭീമനായ മൈക്രോസോഫ്റ്റിന്റെ ഔട്ട്ലുക്ക് ഉൾപ്പടെയുള്ള സേവനങ്ങൾ ആഗോളതലത്തിൽ തടസപ്പെട്ടത് സർക്കാരുകളെയും വൻകിട കോർപറേറ്റ് സ്ഥാപനങ്ങളെയും കടുത്ത പ്രതിസന്ധിയിലാക്കി.
വ്യാഴാഴ്ച ആരംഭിച്ച സാങ്കേതിക തകരാർ ഇന്നലെയും തുടർന്നതോടെ ലോകമെമ്പാടുമുള്ള ലക്ഷക്കണക്കിന് ഉപയോക്താക്കൾക്ക് ഇമെയിലുകൾ അയയ്ക്കാനോ സ്വീകരിക്കാനോ സാധിക്കാതെയായി.
ഔട്ട്ലുക്ക് ഇ മെയിൽ, മൈക്രോസോഫ്റ്റ് ടീംസ്, കോപൈലറ്റ് ഉൾപ്പടെയുള്ള സേവനങ്ങൾ തടസപ്പെട്ടതോടെ വിവിധ രാജ്യങ്ങളിലെ സർക്കാർ സ്ഥാപനങ്ങളുടെയും ബാങ്കുകളുടെയും വൻകിട കമ്പനികളുടെയും ദൈനംദിന പ്രവർത്തനങ്ങൾ താറുമാറായി.
ഡിജിറ്റൽ ആശയവിനിമയ സംവിധാനങ്ങൾ നിശ്ചലമായതോടെ ചില സ്ഥാപനങ്ങൾക്ക് ഇടപാടുകൾ പൂർത്തിയാക്കാൻ പഴയകാലത്തെ ഫാക്സ് സംവിധാനത്തെപ്പോലും ആശ്രയിക്കേണ്ടിവന്നു.
സാങ്കേതിക തകരാർ നീണ്ടതോടെ ലോകത്തിന്റെ വിവിധ ഭാഗങ്ങളിൽ ഉപയോക്താക്കൾക്ക് ഇ മെയിലുകൾ അയയ്ക്കാനോ സ്വീകരിക്കാനോ സാധിക്കാത്ത സാഹചര്യമുണ്ടായി. ഔദ്യോഗിക ആശയവിനിമയത്തിനും ഓൺലൈൻ യോഗങ്ങൾക്കും ആശ്രയിക്കുന്ന സേവനങ്ങൾ നിലച്ചത് സ്ഥാപനങ്ങളുടെ പ്രവർത്തനങ്ങളെ സാരമായി ബാധിച്ചു.
ഡൗൺഡിറ്റക്ടറിന്റെ കണക്കനുസരിച്ച് ആദ്യ മണിക്കൂറുകളിൽ 74 രാജ്യങ്ങളിൽനിന്നായി 1.30 ലക്ഷത്തിലേറെ പരാതികളാണു ലഭിച്ചത്. ഔട്ട്ലുക്കിന്റെ പ്രവർത്തനത്തെക്കുറിച്ചുള്ള പരാതികൾ സാധാരണ നിലയേക്കാൾ 2,000 ഇരട്ടിയിലേറെയായി ഉയർന്നു.
മൈക്രോസോഫ്റ്റിന്റെ ഇ മെയിൽ, കലണ്ടർ, കോൺടാക്ട് സംവിധാനങ്ങൾ നിയന്ത്രിക്കുന്ന എക്സ്ചേഞ്ച് ഓൺലൈൻ പ്ലാറ്റ്ഫോമിലെ തകരാറാണു പ്രധാനമായും മൈക്രോസോഫ്റ്റ് 365 സേവനങ്ങളെ ബാധിച്ചതെന്നാണ് വിശദീകരണം.
അടിസ്ഥാനസൗകര്യങ്ങളുടെ ഭാഗങ്ങളിലുണ്ടായ തിരക്കും കണക്ടിവിറ്റി പ്രശ്നങ്ങളുമാണ് തടസ കാരണമെന്ന് മൈക്രോസോഫ്റ്റ് അറിയിച്ചു.