രാജാക്കാട്: പഞ്ചായത്തിലെ ഗവ.ഹോമിയോ ആശുപത്രിയുടെ പുതിയ കെട്ടിടനിര്മാണം നിലച്ചിട്ട് വർഷങ്ങൾ പിന്നിടുന്നു. നിര്മാണം ആരംഭിച്ച് ആറു വര്ഷം പിന്നിടുമ്പോഴും ഇത് എങ്ങുമെത്തിയിട്ടില്ല. എന്നു പൂർത്തീകരിക്കാനാകുമെന്ന് കരാറുകാരനോ പഞ്ചായത്ത് അധികൃതർക്കോ പറയാനും കഴിയുന്നില്ല.
ഹോമിയോ ആശുപത്രിയുടെ പ്രവര്ത്തനം ഇപ്പോഴും ഐ എച്ച് ആർ ഡി ബിൽഡിംഗിലെ ഇടുങ്ങിയ മുറിക്കുള്ളിലാണ്. ആശുപത്രിക്ക് അടിസ്ഥാന സൗകര്യമുള്ള കെട്ടിടം വേണമെന്ന ആവശ്യത്തിന് വർഷങ്ങളുടെ പഴക്കമുണ്ട്. പ്രതിഷേധങ്ങള്ക്കും പരാതികള്ക്കുമൊടുവില് 2019ൽ ആശുപത്രി കെട്ടിടം നിർമിക്കുന്നതിനുള്ള സ്ഥലം ഏറ്റെടുത്ത് സ്ഥല ലഭ്യത ഉറപ്പായതോടെ 2020 ൽ അന്നത്തെ ഉടുമ്പൻചോല എംഎൽഎയുടെ ആസ്തിവികസന ഫണ്ടിൽനിന്നു കെട്ടിടംനിർമിക്കുന്നതിനായി 40 ലക്ഷം രൂപയും അനുവദിച്ച് ടെണ്ടർ നടപടികൾ പൂർത്തീകരിച്ച് കരാറുകാരൻ നിർമാണപ്രവർത്തനങ്ങളും ആരംഭിച്ചു. എന്നാൽ, പ്രവർത്തനം ആരംഭിച്ച് ആറു വർഷം കഴിഞ്ഞിട്ടും നിര്മാണം പൂര്ത്തിയാക്കാന് കരാറുകാരന് കഴിഞ്ഞിട്ടില്ല.
ഇതോടൊപ്പം നിർമാണം ആരംഭിച്ച സമീപ പഞ്ചായത്തുകളിലെ ആശുപത്രിക്കെട്ടിടങ്ങൾ നിർമാണം പൂർത്തികരിച്ച് പ്രവർത്തനം ആരംഭിച്ചു. അതേസമയം ഇടതുപക്ഷം പഞ്ചായത്ത് ഭരിക്കുമ്പോള് നിര്മാണം ഇഴഞ്ഞുനീങ്ങുന്നെന്ന ആരോപണം ഉന്നയിച്ച് നിലവിലെ മെമ്പറടക്കം പ്രതിഷേധം നടത്തിയിരുന്നു. എന്നാൽ, ഇവർ ഭരണത്തിലെത്തിയപ്പോള് തിരിഞ്ഞുനോക്കുന്നില്ലെന്ന ആരോപണമാണ് ഉയരുന്നത്.
ആശുപത്രിയുടെ കരാറുകാരൻതന്നെയാണ് പഞ്ചായത്ത് കെട്ടിടം നിർമിക്കാനും കരാർ എടുത്തിരിക്കുന്നത്. ഇതിന്റെ നിർമാണവും ഇഴഞ്ഞുനീങ്ങുന്നതിനെതിരേ പ്രതിഷേധം ഉയർന്നതോടെ പഞ്ചായത്ത് കെട്ടിടത്തിന്റെ നിർമാണപ്രവർത്തനങ്ങൾ പുനരാരംഭിച്ചു. എന്നാൽ, ഹോമിയോ ആശുപത്രിയുടെ കെട്ടിടനിർമാണത്തിന് ചെറുവിരൽ പോലും അനക്കാൻ കരാറുകാരനോ ബന്ധപ്പെട്ട അധികൃതരോ തയാറാകുന്നില്ല.