ന്യൂഡൽഹി: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടുള്ള തുടർപ്രതിഷേധങ്ങൾ ചർച്ച ചെയ്യാൻ പ്രതിപക്ഷ ഇന്ത്യ സഖ്യം നിശ്ചയിച്ചിരുന്ന യോഗം മാറ്റി.
കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ നേതൃത്വത്തിൽ ഇന്നലെ വൈകുന്നേരം ഓൺലൈനായി നടത്താനിരുന്ന യോഗമാണു ചില നേതാക്കളുടെ അസൗകര്യം മൂലം മാറ്റിവച്ചത്. അടുത്ത യോഗത്തെക്കുറിച്ച് തീരുമാനമായിട്ടില്ല.
പ്രതിപക്ഷ നേതാവ് രാഹുൽ ഗാന്ധി വിദേശത്താണെന്നു ചൂണ്ടിക്കാട്ടി ബിജെപി ആരോപണം കടുപ്പിക്കുന്നതിനിടെയാണ് ഗ്യാനേഷിനെതിരേയുള്ള പ്രതിപക്ഷ സമരം ചെറുതായൊന്നു മയപ്പെട്ടത്. എന്നാൽ നവംബർ ഒന്നിനു നടക്കുന്ന ഇന്ത്യ സഖ്യത്തിന്‍റെ മഹാറാലിയോടെ സമരം വീണ്ടും കടുക്കും.
ദസറ അവധിക്കുശേഷം സുപ്രീംകോടതി കൂടി വിഷയം പരിഗണിക്കുന്നതോടെ, അല്പം മയപ്പെട്ട പ്രതിഷേധം വീണ്ടും ശക്തിപ്രാപിച്ചേക്കും. ഗ്യാനേഷിനെതിരായ നീക്കത്തിൽ പ്രതിപക്ഷ പാർട്ടികളെല്ലാം ഒറ്റക്കെട്ടായി നീങ്ങുന്നത് കേന്ദ്രസർക്കാരിന് കൂടുതൽ പ്രതിസന്ധിയാണ്.
അടുത്ത മാസം പാർലമെന്‍റിന്‍റെ ശീതകാല സമ്മേളനം ആരംഭിക്കാനിരിക്കേ വിഷയം എത്രയും വേഗം പരിഹരിക്കാനുള്ള നീക്കവും അണിയറയിൽ ശക്തമാണ്.
കഴിഞ്ഞ 16ന് കോക്രോച്ച് ജനതാ പാർട്ടിയുടെ നേതൃത്വത്തിൽ നടത്തിയ തിരംഗ മാർച്ച് പൊലിസ് പൂർണമായി തടഞ്ഞതിനുശേഷം കാര്യമായ പ്രതിഷേധം ഡൽഹിയിൽ അരങ്ങേറിയിട്ടില്ല. എങ്കിലും പ്രതിഷേധഭൂമിയായിരുന്ന ജന്തർ മന്തർ ഉൾപ്പടെ പൊലിസ് വലയത്തിലാണ്. പ്രധാന മേഖലകളിലെല്ലാം സുരക്ഷ ശക്തമായി തുടരുകയാണ്.
Deepika
Corehub Solutions
E-paper LOGIN
LOGIN
