മണര്കാട്: അന്ത്യോഖ്യാ പാത്രിയര്ക്കീസ് ബാവയ്ക്ക് മണര്കാട് കത്തീഡ്രലില് ഊഷ്മള സ്വീകരണം.
വിശുദ്ധ കുര്ബാന അര്പ്പിക്കാന് ഇന്നലെ രാവിലെ ഒമ്പതിന് പള്ളി കവാടത്തില് എത്തിയ ഇഗ്നാത്തിയോസ് അഫ്രേം ദ്വിതീയന് പാത്രിയര്ക്കീസ് ബാവയെയും ശ്രേഷ്ഠ കാതോലിക്കാ ബസേലിയോസ് ജോസഫ് ബാവയെയും തുറന്ന വാഹനത്തില് കത്തീഡ്രലിലേക്ക് ആനയിച്ചു.
റോഡിന്റെ ഇരുവശങ്ങളിലുമായി കുരുത്തോലകളും പൂക്കളുമായി വനിതസമാജം പ്രവര്ത്തകരും സ്ത്രീകളും കുട്ടികളും വിശ്വാസികളും കാത്തുനിന്നു. കത്തീഡ്രലിന്റെ മുറ്റത്തെത്തിയ ബാവമാര് പള്ളിക്കുള്ളിലേക്കു പ്രവേശിച്ചു. പ്രഭാതനമസ്കാരം പൂര്ത്തിയായ നിമിഷമാണ് ബാവ എത്തിച്ചേര്ന്നത്.
മദ്ബഹായിലേക്ക് പ്രവേശിച്ച ബാവ വിശുദ്ധ കുര്ബാന അര്പ്പിച്ചു. യാക്കോബായ സുറിയാനി സഭയിലെയും സുറിയാനി ഓര്ത്തഡോക്സ് സഭയിലെയും മെത്രാപ്പോലീത്തമാര് സഹകാര്മികരായിരുന്നു. ഇന്നലെ രാവിലെ ഏഴു മുതല് ആയിരങ്ങള് പള്ളി പരിസരത്ത് ബാവയെ സ്വീകരിക്കാന് കാത്തിരുന്നു.
ഇടവക വികാരി കെ. കുര്യാക്കോസ് കോര്എപ്പിസ്കോപ്പ കിഴക്കേടത്തിന്റെ നേതൃത്വത്തില് കവാടത്തില് പള്ളി ഭരണസമിതി ബാവമാരെ സ്വീകരിച്ചു.
വിശുദ്ധ കുര്ബാനയ്ക്കുശേഷം പള്ളിമുറ്റത്ത് പ്രത്യേകം സജീകരിച്ചിരുന്ന വേദിയില് പരിശുദ്ധ പാത്രിയര്ക്കീസ് ബാവ വിശ്വാസസമൂഹത്തെ ആശീര്വദിച്ച് അനുഗ്രഹപ്രഭാഷണം നടത്തി. കോട്ടയം ഭദ്രാസനത്തിന്റെ 150-ാം വാര്ഷികാഘോഷങ്ങളുടെ ഭാഗമായി തയാറാക്കിയ ലോഗോയുടെ പ്രകാശനവും മണര്കാട് സെന്റ് മേരീസ് കോളജില് പുതുതായി നിര്മിച്ച ബ്ലോക്കിന്റെ ഉദ്ഘാടനവും മാലത്ത് പണികഴിപ്പിച്ച കുരിശിന്തൊട്ടിയില് സ്ഥാപിക്കുന്നതിനുള്ള കുരിശിന്റെ ആശിര്വാദവും പാത്രിയര്ക്കീസ് ബാവാ നിര്വഹിച്ചു.
കോപ്റ്റിക് ഓര്ത്തഡോക്സ് സഭയുടെ പരമാധ്യക്ഷന് തവദ്രോസ് ദ്വിതീയന് പാപ്പായുടെ പ്രതിനിധിയായി അല് ഖൂസിയ, മെയര് ഭദ്രാസനാധിപന് അന്ബാ തോമസ് മെത്രാപ്പോലീത്തയും അര്മേനിയന് ഓര്ത്തഡോക്സ് സഭയുടെ അരാം പ്രഥമന് കാതോലിക്കാ ബാവായുടെ പ്രതിനിധിയായി അലപ്പോ അതിഭദ്രാസനാധിപന് മഗാര് അഷ്കേറിയന് മെത്രാപ്പോലീത്തയും അര്മേനിയന് ഓര്ത്തഡോക്സ് സഭയുടെ കരേക്കിന് ദ്വിതീയന് കാതോലിക്കാ ബാവയുടെ പ്രതിനിധിയായി കെയ്റോ അതിഭദ്രാസനാധിപന് അഷൂദ് മനത്സാകന്യന് മെത്രാപ്പോലീത്തയും വിശുദ്ധ കുര്ബാനയിലും സമ്മേളനത്തിലും പങ്കെടുത്തു.