ന്യൂഡല്‍ഹി: ഇന്ത്യയിൽ ഉപഗ്രഹ അധിഷ്ഠിത ഇന്‍റർനെറ്റ് സേവനങ്ങൾ ആരംഭിക്കുന്നതിൽ സ്റ്റാർലിങ്ക് വിവേചനം നേരിടുന്നുവെന്ന അമേരിക്കൻ ശതകോടീശ്വരൻ ഇലോൺ മസ്കിന്റെ ആരോപണങ്ങൾ തള്ളി കേന്ദ്രസർക്കാർ.
രാജ്യത്തെ ടെലികോം നിയന്ത്രണ സംവിധാനങ്ങൾ അങ്ങേയറ്റം സുതാര്യവും വിവേചനരഹിതവുമാണെന്ന് കേന്ദ്ര വാർത്താവിനിമയ, വിവരസാങ്കേതികവിദ്യാ മന്ത്രാലയം വ്യക്തമാക്കി.
സ്വന്തം കുത്തകാവകാശം നിലനിർത്താൻ ആഗ്രഹിക്കുന്ന ചില വ്യവസായികളുടെ സമ്മർദം മൂലം വാണിജ്യാടിസ്ഥാനത്തിലുള്ള ഉപഗ്രഹ ആശയവിനിമയ സേവന പദ്ധതികൾ ഇന്ത്യ തടയുകയാണെന്നായിരുന്നു മസ്കിന്റെ ആരോപണം.
നിലവില്‍ ടെലികോം ലൈസന്‍സ് അനുവദിച്ചിട്ടുള്ളത് ഉപഗ്രഹങ്ങള്‍ വഴിയുള്ള ഗ്ലോബല്‍ മൊബൈല്‍ പേഴ്സണല്‍ കമ്യൂണിക്കേഷന്‍ സേവനങ്ങള്‍ നല്‍കുന്ന മൂന്ന് കമ്പനികള്‍ക്കാണ്.
ഈ മൂന്ന് കമ്പനികളുടെയും സുരക്ഷാപരിശോധനകള്‍ പുരോഗമിക്കുകയാണ്. പൂര്‍ത്തിയാകുന്ന മുറയ്ക്കു മാത്രമേ ലൈസന്‍സ് ലഭിച്ച കമ്പനികള്‍ക്ക് സ്‌പെക്‌ട്രം അനുവദിക്കുന്ന അടുത്ത ഘട്ടത്തിലേക്ക് കടക്കാനാകൂ.
ഈ സാഹചര്യത്തില്‍ ഉപഗ്രഹ ആശയവിനിമയ സേവനങ്ങള്‍ക്കായുള്ള നിയന്ത്രണ സംവിധാനമോ അതിന്‍റെ നടപടികളോ പക്ഷപാതപരവും വിവേചനപരവുമാണെന്ന പ്രചാരണം വസ്തുതാവിരുദ്ധവും തെറ്റിദ്ധാരണാജനകവുമാണെന്നും മന്ത്രാലയം വ്യക്തമാക്കി.
സ്റ്റാര്‍ലിങ്ക്, ഭാരതി എയര്‍ടെലിന്‍റെ യൂട്ടെല്‍സാറ്റ് വണ്‍വെബ്, ജിയോ സാറ്റലൈറ്റ് കമ്യൂണിക്കേഷന്‍സ് എന്നീ കമ്പനികള്‍ക്കാണ് ഇപ്പോള്‍ ലൈസന്‍സ് നല്‍കിയിരിക്കുന്നത്. ഉപയോക്താക്കളുടെയും അവര്‍ക്കു ലഭിക്കുന്ന ഡാറ്റയുടെയും സുരക്ഷ ഉറപ്പുവരുത്താനുള്ള വ്യവസ്ഥകള്‍ കമ്പനികള്‍ പൂര്‍ണമായും പാലിക്കേണ്ടതുണ്ട്.
Deepika
Corehub Solutions
E-paper LOGIN
LOGIN