ബെലഗാവി: എസ്ഐആറിന്‍റെ മറവിൽ കർണാടകയിലെ ബെളഗാവി ജില്ലയിൽ മുസ്‌ലിംകളുടെ വോട്ടുകൾ കൂട്ടത്തോടെ വെട്ടാൻ ശ്രമിച്ച ബിജെപി നേതാവ് രവി പാട്ടീലിനും മറ്റു നേതാക്കൾക്കും എതിരേ എഫ്ഐആർ രജിസ്റ്റർ ചെയ്തു. എസ്ഐആർ നടപടിക്കിടെ ഫോം-7 ഉപയോഗിച്ച് 198 മുസ്‌ലിം വോട്ടർമാരുടെ പേര് നീക്കം ചെയ്യാനായിരുന്നു ബിജെപി നേതാക്കളുടെ ശ്രമം.
ബെളഗാവി മാർക്കറ്റ് പൊലിസ് സ്റ്റേഷനിലാണ് രവി പാട്ടീലിനെതിരേ കേസ് രജിസ്റ്റർ ചെയ്തത്. ബൂത്ത് ലെവൽ ഏജന്‍റ് മീരാസാബ് സാനഡിയുടെ പരാതിയിലായിരുന്നു കേസെടുത്തത്.
മുസ്‌ലിം വോട്ടർമാരെ മാത്രം നീക്കം ചെയ്യാൻ രവി പാട്ടീൽ, ശങ്കർ ബീരപ്പ നായിക്, പാശന്ത് ദീപക് മുഡിൻമണി എന്നിവരും മറ്റ് ഇരുപത്തഞ്ചോളം പേരും വ്യാജ രേഖയുണ്ടാക്കി ബിഎൽഒയ്ക്കു സമർപ്പിച്ചതായി പരാതിക്കാരൻ ചൂണ്ടിക്കാട്ടി. മൈസൂരുവിലും ബിദറിലും സമാന പരാതികളിൽ കേസെടുത്തിട്ടുണ്ട്.
ബിദറിൽ താൻ ഉൾപ്പെടെ 3244 വോട്ടർമാരെ സ്ഥലംമാറിയവരുടെയും ഹാജരില്ലാത്തവരുടെയും പട്ടികയിൽ ഫോം 7 ഉപയോഗിച്ച് ഉൾപ്പെടുത്തിയെന്ന് ആരോപിച്ച് ബിസിനസുകാരനായ മുഹമ്മദ് അതീഖ് പരാതി സമർപ്പിച്ചു. തുടർന്ന് 32 പേർക്കെതിരേ വ്യാഴാഴ്ച കേസ് രജിസ്റ്റർ ചെയ്തു.
മൈസൂരുവിൽ സാമൂഹിക പ്രവർത്തകനായ സയിദ് ഹസ്രത് ഉല്ല നൽകിയ പരാതിയിലാണു കേസെടുത്തത്. ഇദ്ദേഹവും കുടുംബവും രജിസ്ട്രേഡ് മേൽവിലാസത്തിൽ താമസിക്കുന്നില്ലെന്ന് ചൂണ്ടിക്കാട്ടിയായിരുന്നു ഫോം 7 വഴി വ്യാജപരാതി നല്കിയത്.
സയിദ് ഹസ്രത് ഉല്ലയുടെ പരാതിയിൽ അനിൽ തോമസ് (ബിജെപി ന്യൂനപക്ഷ വിഭാഗം പ്രസിഡന്‍റ്), സി. ഹരീഷ്കുമാർ, എം. രാഘവേന്ദ്ര എന്നിവർക്കെതിരേ നരസിംഹരാജ പൊലിസ് സ്റ്റേഷനിൽ കേസ് രജിസ്റ്റർ ചെയ്തു.
Deepika
E-paper LOGIN
LOGIN
