തിരുവനന്തപുരം: എൽഡിഎഫ് സർക്കാരിന്റെ കാലത്ത് കേരള ചലച്ചിത്ര അക്കാദമി ചെയർമാൻ സ്ഥാനത്തുനിന്ന് മാറ്റിയ നടൻ പ്രേംകുമാറിനെ ചലച്ചിത്ര വികസന കോർപറേഷൻ (കെഎസ്എഫ്ഡിസി) ചെയർമാനായി നിയമിച്ച് യുഡിഎഫ് സർക്കാർ.
ചലച്ചിത്ര അക്കാദമി അധ്യക്ഷസ്ഥാനത്തേക്ക് നടൻ രവീന്ദ്രനെ നിയമിച്ചതിനു പിന്നാലെയാണ് പ്രേംകുമാറിനെ കെഎസ്എഫ്ഡിസിയുടെ തലപ്പത്തേക്ക് എത്തിച്ചത്.
എൽഡിഎഫ് സർക്കാരിന്റെ കാലത്ത് ചലച്ചിത്ര അക്കാദമി ചെയർമാൻ സ്ഥാനത്ത്നിന്ന് സംവിധായകൻ രഞ്ജിത്ത് രാജിവച്ചതിനെത്തുടർന്ന് വൈസ് ചെയർമാനായിരുന്ന പ്രേംകുമാറിന് ചെയർമാന്റെ താത്കാലിക ചുമതല നൽകിയിരുന്നു. പിന്നീട് 2025 നവംബറിൽ ഓസ്കർ ജേതാവ് റസൂൽ പൂക്കുട്ടിയെ പുതിയ ചെയർമാനായി നിയമിച്ച് പുതിയ ഭരണസമിതി നിലവിൽ വന്നതോടെ പ്രേംകുമാർ സ്ഥാനമൊഴിഞ്ഞു.
തന്നെ മാറ്റിയ വിവരം ഔദ്യോഗികമായി അറിയിച്ചില്ലെന്നും പിൻഗാമി ചുമതലയേൽക്കുന്ന ചടങ്ങിലേക്ക് ക്ഷണിച്ചില്ലെന്നും പരസ്യമായി വ്യക്തമാക്കിയ പ്രേംകുമാർ സർക്കാരിനോടുള്ള അതൃപ്തി പ്രകടമാക്കുകയും ചെയ്തിരുന്നു. പ്രേംകുമാറിനെ ചലച്ചിത്ര അക്കാദമിയിൽ നിന്നും പടിയിറക്കിവിട്ട സംഭവം വലിയ വിവാദമാവുകയും ചെയ്തിരുന്നു.
ആശാ വർക്കർമാരുടെ സമരവുമായി ബന്ധപ്പെട്ട് സർക്കാർ ഇടപെടണമെന്നാവശ്യപ്പെട്ട് പ്രേംകുമാർ നടത്തിയ പരാമർശങ്ങളാണ് ഇടതു സർക്കാരിന്റെ അനിഷ്ടത്തിനും സ്ഥാനമാറ്റത്തിനും കാരണമായതെന്ന വിവരം പുറത്തുവന്നതിനു പിന്നാലെയാണ് സംഭവം വിവാദമായത്. എന്നാൽ, ഇക്കാര്യം സർക്കാർ നിഷേധിച്ചിരുന്നു. സർക്കാർ നിലപാടിനോട് പരസ്യമായി എതിർപ്പു പ്രകടിപ്പിച്ച പ്രേംകുമാർ പിന്നീട് യുഡിഎഫിനോട് അടുക്കുന്നതായുള്ള വാർത്തകളും പുറത്തുവന്നിരുന്നു.
പിന്നീട് പ്രേംകുമാർ സർക്കാരിനെതിരായ തന്റെ അതൃപ്തി കൂടുതൽ പരസ്യമാക്കിയിരുന്നു. തീരുമാനങ്ങളോട് വിയോജിക്കാനുള്ള സ്വാതന്ത്ര്യം വേണമെന്ന നിലപാടും അദ്ദേഹം വ്യക്തമാക്കിയിരുന്നു. ഇതോടെ അക്കാദമിയിലെ സ്ഥാനമാറ്റം വ്യക്തിപരമായും രാഷ്ട്രീയമായും ചർച്ചയായ പശ്ചാത്തലത്തിലാണ് ഇപ്പോഴത്തെ നിയമനം.
എൽഡിഎഫ് സർക്കാരിന്റെ കാലത്ത് കെഎസ്എഫ്ഡിസി ചെയർമാനായിരുന്ന കെ. മധു രാജിവച്ചതിനെത്തുടർന്നാണ് യുഡിഎഫ് സർക്കാർ ഈ സ്ഥാനത്തേക്ക് പ്രേംകുമാറിന് നിയമനം നൽകിയത്.
Deepika
E-paper LOGIN
LOGIN
