4

മലയാളികളുടെ പ്രിയപ്പെട്ട താരദമ്പതികളായ പേളി മാണിയും ശ്രീനിഷ് അരവിന്ദും സോഷ്യൽ മീഡിയയിൽ എപ്പോഴും തരംഗമാകാറുണ്ട്. ബിഗ് ബോസ് മലയാളം എന്ന റിയാലിറ്റി ഷോയിലൂടെ തുടങ്ങിയ ഇവരുടെ പ്രണയവും പിന്നീട് നടന്ന വിവാഹവുമെല്ലാം ആരാധകർ വലിയ ആവേശത്തോടെയാണ് ഏറ്റെടുത്തത്.

ഇന്ന് രണ്ട് പെൺമക്കളുമായി സന്തോഷകരമായ കുടുംബജീവിതം നയിക്കുന്ന ഇവരുടെ വിശേഷങ്ങൾ അറിയാൻ മലയാളികൾക്ക് എന്നും കൗതുകമാണ്. എന്നാൽ പതിവ് വിശേഷങ്ങളിൽ നിന്ന് വ്യത്യസ്തമായി തികച്ചും വിചിത്രമായ ഒരു വീഡിയോയാണ് ഇപ്പോൾ സമൂഹമാധ്യമങ്ങളിൽ വൈറലായിരിക്കുന്നത്.

യഥാർത്ഥ ദൃശ്യങ്ങളല്ല, മറിച്ച് ആർട്ടിഫിഷ്യൽ ഇന്‍റലിജൻസ് ഉപയോഗിച്ച് നിർമ്മിച്ച ഒരു സാങ്കൽപ്പിക വീഡിയോയാണിത്. പേളിയും ശ്രീനിഷും തമ്മിൽ വീട്ടിൽ അതിരൂക്ഷമായ വഴക്കുണ്ടാക്കുന്നതായാണ് വീഡിയോയുടെ തുടക്കം. വീഡിയോയിൽ അതിവൈകാരികമായ രംഗങ്ങളാണ് ഉൾപ്പെടുത്തിയിരിക്കുന്നത്.

ദേഷ്യം നിയന്ത്രിക്കാനാവാതെ ശ്രീനിഷ് വീട്ടിലെ സാധനങ്ങൾ തല്ലിത്തകർക്കുന്നതും എല്ലാം പേളിയുടെ തെറ്റാണെന്ന് ആക്രോശിക്കുന്നതും കാണാം. വഴക്കിനൊടുവിൽ സങ്കടത്തോടെ വീടുവിട്ടിറങ്ങുന്ന പേളി ഒരു സ്കൂൾ ബസിൽ കയറി പോകുന്നതും, പിന്നീട് തെറ്റ് തിരുത്തി ശ്രീനിഷ് അവരെ തേടിച്ചെന്ന് ഒന്നിക്കുന്നതുമാണ് വീഡിയോയുടെ സാരം.

ഈ വീഡിയോ പുറത്തുവന്നതോടെ ആരാധകർക്കിടയിൽ വലിയ ചർച്ചകൾക്കാണ് വഴിതുറന്നത്. ഒരു വിഭാഗം ആളുകൾ ഇതിനെ വെറുമൊരു ക്രിയേറ്റീവ് പരീക്ഷണമോ തമാശയോ ആയി കണ്ടപ്പോൾ, മറ്റു ചിലർ ഇതിനെതിരെ ശക്തമായ വിമർശനവുമായി രംഗത്തെത്തി.

മനോഹരമായി ജീവിക്കുന്ന ഒരു കുടുംബത്തെ ഇത്തരത്തിൽ മോശമായി ചിത്രീകരിക്കുന്നത് ശരിയല്ലെന്നും എഐ സാങ്കേതികവിദ്യ ഇത്തരത്തിൽ ദുരുപയോഗം ചെയ്യരുതെന്നുമാണ് ഇവർ വാദിക്കുന്നത്. അതേസമയം വീഡിയോയിലെ സാങ്കേതികമായ അബദ്ധങ്ങൾ കണ്ടെത്തി ചിരി പടർത്തുന്നവരും കുറവല്ല.

എഐ നിർമ്മിത വീഡിയോ ആയതുകൊണ്ട് തന്നെ ദൃശ്യങ്ങളിൽ സ്വാഭാവികത കുറവായിരുന്നു. സങ്കടപ്പെട്ട് പോകുന്ന പേളി എന്തിനാണ് സ്കൂൾ ബസിൽ കയറിയതെന്നും, കരച്ചിലിനിടയിൽ എഐയുടെ പിഴവ് കാരണം താരത്തിന് മൂന്ന് കാലുകൾ പ്രത്യക്ഷപ്പെട്ടതുമെല്ലാം സോഷ്യൽ മീഡിയയിൽ വലിയ ട്രോളുകൾക്ക് കാരണമായി.

ഈ വിചിത്രമായ വീഡിയോ ശ്രദ്ധയിൽപ്പെട്ട പേളിയും ശ്രീനിഷും നേരിട്ട് തന്നെ കമന്‍റുകളുമായി എത്തിയതോടെ സംഭവം കൂടുതൽ ചർച്ചയായി. എഐ വിദ്യകൾ ഉപയോഗിച്ച് ഇത്തരത്തിൽ കഥകൾ മെനയുന്നതിലെ കൗതുകവും ആശങ്കയും ഒരുപോലെ പങ്കുവെക്കുകയാണ് സോഷ്യൽ മീഡിയയിപ്പോൾ.