തിരുവനന്തപുരം: തൊഴിലിടങ്ങളിലേക്ക് പോകുന്ന സ്ത്രീകള്ക്ക് കൂടുതല് സുരക്ഷിതത്വവും സൗകര്യവും ഉറപ്പാക്കുമെന്നു ഗതാഗത മന്ത്രി സി.പി. ജോണ്. യുഡിഎഫ് സര്ക്കാരിന്റെ 100 ദിന കര്മപരിപാടികളുടെ ഭാഗമായി പ്രഖ്യാപിച്ച "പിങ്ക് ബസ് ലേഡീസ് ഒണ്ലി’ പദ്ധതിയുടെ സംസ്ഥാനതല ഉദ്ഘാടനം തിരുവനന്തപുരം സെന്ട്രല് ഡിപ്പോയില് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
സ്ത്രീകള്ക്ക് സ്വതന്ത്രമായി യാത്ര ചെയ്യാനുള്ള സാഹചര്യമൊരുക്കുകയാണ് സര്ക്കാരിന്റെ പ്രധാന ലക്ഷ്യം. നിലവില് രാത്രി കാലങ്ങളില് സുരക്ഷിതമായ യാത്രാസൗകര്യങ്ങള് കുറവായതിനാല് ഉയര്ന്ന തുക നല്കി മറ്റ് വാഹനങ്ങളെ ആശ്രയിക്കേണ്ടി വരുന്ന വനിതകള്ക്ക് പുതിയ പദ്ധതി വലിയ ആശ്വാസമാകും.
രാത്രി ഒന്പതിനു ശേഷമായിരിക്കും പിങ്ക് ബസ് പ്രധാനമായും സര്വീസ് നടത്തുക. ഐടി മേഖലയില് രാത്രി പത്തിനും രാവിലെ അഞ്ചിനും ഇടയില് ജോലി കഴിഞ്ഞ് മടങ്ങുന്നവര്, ആശുപത്രി ജീവനക്കാര്, രാത്രി സിനിമ കഴിഞ്ഞ് പോകുന്നവര്, ട്രെയിന് മാര്ഗം തമ്പാനൂരില് എത്തുന്ന രോഗികളും കൂട്ടിരിപ്പുകാരും ഉള്പ്പെടെയുള്ള വലിയൊരു വിഭാഗം യാത്രക്കാര്ക്ക് ഇത് പ്രയോജനപ്പെടും.
ടെക്നോപാര്ക്ക് പോലെയുള്ള സ്ഥാപനങ്ങളിലെ ജീവനക്കാര്ക്ക് രാത്രി എട്ടിനും പത്തിനും ഇടയില് പ്രത്യേക സര്വീസുകള് ലഭ്യമാക്കും. വരും ദിവസങ്ങളില് മറ്റ് ജില്ലകളിലേക്കും പദ്ധതി വ്യാപിപ്പിക്കുമെന്നും മന്ത്രി കൂട്ടിച്ചേര്ത്തു.
രാത്രിയില് മാത്രമല്ല, പകല് സമയങ്ങളിലും പിങ്ക് ബസിന്റെ സേവനം ലഭ്യമാണ്.
E-paper LOGIN
LOGIN
