ചണ്ഡീഗഡ്: 2027-ലെ നിയമസഭാ തെരഞ്ഞെടുപ്പിന് മുന്നോടിയായി പഞ്ചാബ് കോൺഗ്രസിൽ ഗ്രൂപ്പ് പോര് തടയാൻ പുതിയ തന്ത്രവുമായി നേതൃത്വം. ചരൺജിത് സിംഗ് ചന്നിയും അമരീന്ദർ സിംഗ് രാജ വാറിംഗും തമ്മിലുള്ള അധികാര വടംവലിയുടെ മുറിവുകൾ ഉണങ്ങുന്നതിന് മുൻപേ, മറ്റ് പാർട്ടികളിൽ നിന്ന് വരുന്നവരെ ഉൾക്കൊള്ളുന്നതിലൂടെ പുതിയ പൊട്ടിത്തെറികൾ ഉണ്ടാകാതിരിക്കാൻ പാർട്ടി നാലംഗ ഉന്നതതല സമിതി രൂപീകരിച്ചു.
പഞ്ചാബ് പിസിസി അധ്യക്ഷൻ പർഗത് സിംഗിന്റെ ഔദ്യോഗിക ഉത്തരവ് പ്രകാരമാണ് സമിതി നിലവിൽ വന്നത്. കോൺഗ്രസ് പ്രവർത്തക സമിതി അംഗം വിജയ് ഇന്ദർ സിംഗ്ല, നിയമസഭാ കക്ഷി ഉപനേതാവ് അരുണ ചൗധരി എംഎൽഎ, മുൻ എംഎൽഎ കുശാൽദീപ് സിംഗ് ധില്ലൺ, ഹർദേവ് സിംഗ് ലഡ്ഡി എംഎൽഎ എന്നിവരാണ് സമിതിയിലെ അംഗങ്ങൾ.
നിർണായകമായ 'കൂടിയാലോചന' വ്യവസ്ഥ
മറ്റ് പാർട്ടികളിൽ നിന്ന് കോൺഗ്രസിലേക്ക് വരാൻ താത്പര്യപ്പെടുന്ന നേതാക്കളുടെ പ്രവേശന നടപടികൾ ഏകോപിപ്പിക്കുകയാണ് സമിതിയുടെ പ്രധാന ചുമതല. എന്നാൽ, ഉത്തരവിലെ ഏറ്റവും ശ്രദ്ധേയമായ കാര്യം ഇതിലെ നിർബന്ധിത കൂടിയാലോചനാ വ്യവസ്ഥയാണ്.
ഏതൊരു നേതാവിനെയും പാർട്ടിയിലെടുക്കുന്നതിന് മുൻപ്, ബന്ധപ്പെട്ട നിയമസഭാ മണ്ഡലത്തിലെ മുതിർന്ന കോൺഗ്രസ് നേതാക്കളുമായും ജില്ലാ കോൺഗ്രസ് കമ്മിറ്റി അധ്യക്ഷനുമായും സമിതി നിർബന്ധമായും ചർച്ച നടത്തിയിരിക്കണം. മണ്ഡലത്തിൽ വർഷങ്ങളായി പ്രവർത്തിക്കുന്ന തങ്ങളുടെ വിശ്വസ്തരായ നേതാക്കളെ തഴഞ്ഞുകൊണ്ട് പുറത്തുനിന്നുള്ളവരെ കുത്തിനിറയ്ക്കുന്നു എന്ന പരാതി ഒഴിവാക്കാനാണിത്.
എന്തുകൊണ്ട് ഈ നീക്കം?
2027-ലെ തെരഞ്ഞെടുപ്പ് പോരാട്ടം കടുക്കാനിരിക്കെ, പ്രാദേശിക സ്വാധീനമുള്ള മറ്റ് പാർട്ടികളിലെ നേതാക്കളെ ഒപ്പം കൂട്ടുന്നത് വഴി എതിരാളികളെ ദുർബലപ്പെടുത്താനും സ്വന്തം സംഘടനാ സംവിധാനം ശക്തിപ്പെടുത്താനും കോൺഗ്രസ് ലക്ഷ്യമിടുന്നു. എന്നാൽ, പുറത്തുനിന്നുള്ളവരുടെ വരവ് സീറ്റ് വിഭജനത്തിലും നേതൃത്വത്തിലും പുതിയ തർക്കങ്ങൾക്ക് വഴിവെക്കുമോ എന്ന ആശങ്ക ഹൈക്കമാൻഡിനുണ്ട്. പ്രാദേശിക നേതൃത്വത്തിന് കൂടി തീരുമാനങ്ങളിൽ പങ്കാളിത്തം നൽകുന്നതിലൂടെ പാർട്ടി വിപുലീകരണം ഒരു ആഭ്യന്തര കലാപമായി മാറുന്നത് തടയാനാണ് നേതൃത്വം ശ്രമിക്കുന്നത്.
ചന്നി - വാറിംഗ് പോര് ഇപ്പോഴും സജീവം
തെരഞ്ഞെടുപ്പിന് മുൻപ് പഞ്ചാബ് കോൺഗ്രസിനെ ഏറ്റവും കൂടുതൽ അലട്ടുന്നത് ചരൺജിത് സിംഗ് ചന്നിയും രാജ വാറിംഗും തമ്മിലുള്ള ചേരിപ്പോരാണ്. ഈ വർഷം ആദ്യം തർക്കങ്ങൾ പരിഹരിക്കാൻ ഭൂപേഷ് ബാഗേലിനെ പഞ്ചാബിലേക്ക് അയച്ചിരുന്നു. പോര് രൂക്ഷമായതോടെ സെപ്റ്റംബറിൽ സച്ചിൻ പൈലറ്റിനെ പഞ്ചാബിന്റെ ചുമതലയേൽപ്പിച്ചു. തുടർന്ന് രാജ വാറിംഗ് സംസ്ഥാന അധ്യക്ഷ സ്ഥാനം ഒഴിയുകയും പർഗത് സിംഗ് പുതിയ അധ്യക്ഷനാകുകയും ചെയ്തു.
ഇത്രയൊക്കെ മാറ്റങ്ങൾ വരുത്തിയിട്ടും പാർട്ടിയിലെ ഉൾപ്പോര് പൂർണമായി ശമിച്ചിട്ടില്ല എന്നതിന്റെ തെളിവാണ് അടുത്തിടെ ചന്നിയുടെ നേതൃത്വത്തിൽ നടന്ന പ്രചാരണ പരിപാടിയിൽ നിന്ന് രാജ വാറിംഗ് വിട്ടുനിന്നത്. ഈ സാഹചര്യത്തിൽ, പുതിയതായി പാർട്ടിയിലേക്ക് വരുന്നവർ ഗ്രൂപ്പ് രാഷ്ട്രീയത്തിന്റെ ഭാഗമായി മാറാതിരിക്കാനുള്ള കരുതലോടെയാണ് പഞ്ചാബ് കോൺഗ്രസ് മുന്നോട്ട് നീങ്ങുന്നത്.