ന്യൂഡൽഹി: രാജ്യത്തെ തെരഞ്ഞെടുപ്പ് ക്രമക്കേടുകളിൽ മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ട് ഗാന്ധിജയന്തി ദിനത്തിൽ ഡൽഹിയിൽ വിദ്യാർഥി-യുവജന സംഘടനകളുടെ വൻ പ്രതിഷേധം.
ജന്തർ മന്തറിൽ സമരാനുമതി നിഷേധിച്ച് കടുത്ത നിയന്ത്രണങ്ങളും ഇന്‍റർനെറ്റ് വിച്ഛേദനവും ഏർപ്പെടുത്തിയിരുന്നെങ്കിലും വിലക്കുകൾ ലംഘിച്ച് ആയിരക്കണക്കിനു പ്രവർത്തകർ തെരുവിലിറങ്ങി.
മൂന്നു മാസം മുമ്പ് കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെട്ട് കോക്രോച്ച് ജനതാ പാർട്ടി (സിജെപി) നടത്തിയ സമരത്തിനു പിന്നാലെ, "ജന്തർ മന്തർ 2.0' എന്നപേരിൽ പ്രതിപക്ഷ കൂട്ടായ്മ പ്രഖ്യാപിച്ച പ്രതിഷേധമാണു തലസ്ഥാനത്തെ പ്രകന്പനം കൊള്ളിച്ചത്.
രാവിലെ മുതൽ വൈകുന്നേരം വരെ നീണ്ടുനിന്ന പ്രതിഷേധങ്ങളിൽ നേതാക്കളും വിദ്യാർഥികളും ഉൾപ്പടെ ഏഴുനൂറിലധികം പേരെ ഡൽഹി പൊലിസ് കസ്റ്റഡിയിലെടുത്തു. സമരം പൊതുവെ സമാധാനപരമായിരുന്നെങ്കിലും ജന്തർ മന്തറിലേക്കു കടക്കാൻ ശ്രമിച്ച പ്രവർത്തകരെ ബലം പ്രയോഗിച്ചാണു പൊലിസ് നീക്കിയത്.
ചില പൊലിസുകാരുടെ യൂണിഫോമിൽ നെയിം പ്ലേറ്റുകൾ ഇല്ലായിരുന്നുവെന്നും പ്രവർത്തകരെ വലിച്ചിഴച്ചാണു ബസുകളിൽ കയറ്റിയതെന്നും ആരോപണമുണ്ട്. എങ്കിലും ലാത്തിച്ചാർജ്, കണ്ണീർവാതകം തുടങ്ങിയ അടിയന്തര നടപടികളിലേക്ക് പൊലിസ് കടന്നില്ല.
ചേരിതിരിഞ്ഞ് പ്രതിഷേധം, സ്തംഭിച്ച് തലസ്ഥാനം
ലക്ഷ്യം ഒന്നായിരുന്നെങ്കിലും വിവിധ സമയങ്ങളിൽ ഒറ്റയ്ക്കൊറ്റയ്ക്കാണു പ്രതിപക്ഷ യുവജന-വിദ്യാർഥി സംഘടനകൾ തെരുവിലിറങ്ങിയത്. ജന്തർ മന്തറിനു ചുറ്റും ഒരാൾപ്പൊക്കത്തിൽ പൊലിസ് ബാരിക്കേഡുകൾ സ്ഥാപിച്ചതിനെത്തുടർന്ന് തൊട്ടടുത്തുള്ള കേരള ഹൗസ് സ്ഥിതി ചെയ്യുന്ന ജൻപഥ് റോഡാണ് ഇടതുപക്ഷ സംഘടനകളും ആം ആദ്മി പാർട്ടിയും എംഎസ്എഫും പ്രതിഷേധത്തിനായി തെരഞ്ഞെടുത്തത്.
ദേശീയ പ്രസിഡന്‍റ് ഉദയ് ഭാനു ചിബിന്‍റെ നേതൃത്വത്തിൽ യൂത്ത് കോൺഗ്രസ് ഓഫിസിൽനിന്ന് ആരംഭിച്ച മാർച്ച് പൊലിസ് ബാരിക്കേഡുകൾ വച്ച് തടഞ്ഞു. ബാരിക്കേഡ് മറികടക്കാൻ ശ്രമിച്ച പ്രവർത്തകരെ പൊലിസ് കസ്റ്റഡിയിലെടുത്തു.
ഡിവൈഎഫ്ഐ, എസ്എഫ്ഐ, എഐഎസ്എഫ് പ്രവർത്തകർ നടത്തിയ മാർച്ചിൽ സിപിഎം നേതാക്കളായ എം.എ. ബേബി, വൃന്ദ കാരാട്ട്, എ.എ. റഹീം, പി. സന്തോഷ് കുമാർ എന്നിവർ പങ്കെടുത്തു.
Deepika
Corehub Solutions
E-paper LOGIN
LOGIN