പുനലൂർ: ചെങ്കോട്ട-പുനലൂർ പാതയുടെ പ്രകൃതിരമണീയമായ കാഴ്ചകൾ ആസ്വദിച്ചുകൊണ്ടുള്ള ട്രെയിൻ യാത്ര വീണ്ടും നീട്ടുന്നു. യാത്രക്കാരുടെ വലിയ ജനപ്രീതിയാണ് സർവീസ് നീട്ടാൻ വഴിയൊരുക്കിയത്. യാത്രക്കാരിൽനിന്നും പൊതുജനങ്ങളിൽനിന്നും വലിയ സ്വീകാര്യത ലഭിച്ചതിനെ തുടർന്നാണ് ചെങ്കോട്ട - പുനലൂർ - കൊല്ലം റെയിൽവെ പാതയിലൂടെ സർവീസ് നടത്തുന്ന വിസ്റ്റാഡോം കോച്ചുകളുടെ സർവീസ് കാലാവധി നീട്ടിയത്.
നേരത്തെ 2027 ജനുവരി 15 വരെയായിരുന്നു വിസ്റ്റാഡോം കോച്ച് സർവീസ് പ്രഖ്യാപിച്ചിരുന്നത്. എന്നാൽ ഇപ്പോൾ ഇതിന് ശേഷമുള്ള തീയതികളിലേക്കുള്ള ടിക്കറ്റ് ബുക്കിംഗ് കൂടി ആരംഭിച്ചിട്ടുണ്ട്.
മധുര - ഗുരുവായൂർ എക്സ്പ്രസിൽ വ്യാഴം, വെള്ളി, ശനി, ഞായർ ദിവസങ്ങളിലും ഗുരുവായൂർ - മധുര എക്സ്പ്രസിൽ വെള്ളി, ശനി, ഞായർ, തിങ്കൾ ദിവസങ്ങളിലുമാണ് നിലവിൽ വിസ്റ്റാഡോം കോച്ച് സർവീസ് ലഭ്യമാക്കിയിട്ടുള്ളത്.
ചെങ്കോട്ട - പുനലൂർ റെയിൽവേ പാതയിലെ യാത്രയുടെ പ്രധാന ആകർഷണമായ പശ്ചിമഘട്ട മലനിരകളുടെയും ആര്യങ്കാവ്, തെന്മല പ്രദേശങ്ങളുടേയും പ്രകൃതിരമണീയമായ കാഴ്ചകൾ അടുത്തറിയാൻ വിസ്റ്റാഡോം കോച്ച് യാത്രക്കാർക്ക് അപൂർവ അവസരമാണ് ഒരുക്കുന്നത്. മലനിരകൾ, തുരങ്കങ്ങൾ, പാലങ്ങൾ, വനമേഖലകൾ, താഴ്വരകൾ, വെള്ളച്ചാട്ടങ്ങൾ തുടങ്ങി പ്രകൃതിയുടെ വിസ്മയക്കാഴ്ചകൾ ആസ്വദിച്ചുകൊണ്ടുള്ള യാത്ര വിനോദസഞ്ചാരികൾക്കും പ്രകൃതിസ്നേഹികൾക്കും ഒരുപോലെ പ്രിയപ്പെട്ടതാണ്.
സർവീസ് ആരംഭിച്ചത് മുതൽ വിസ്റ്റാഡോം കോച്ചുകൾക്ക് വലിയ ജനപ്രീതിയാണ് ലഭിച്ചുകൊണ്ടിരിക്കുന്നത്. ടിക്കറ്റുകൾ ലഭ്യമല്ലാത്ത സാഹചര്യം ആയിരുന്നു ഉണ്ടായിരുന്നത്. യാത്രക്കാരുടെ ഈ വലിയ ആവശ്യകതയാണ് സർവീസ് നീട്ടുന്നതിന് പ്രധാനമായും വഴിയൊരുക്കിയത്. വിസ്റ്റാഡോം കോച്ചുകളുടെ സർവീസ് നീട്ടിയതോടെ ചെങ്കോട്ട - പുനലൂർ - കൊല്ലം പാതയുടെ പ്രകൃതിഭംഗി ആസ്വദിച്ചുകൊണ്ടുള്ള ട്രെയിൻ യാത്രയ്ക്ക് കൂടുതൽ യാത്രക്കാർക്ക് വീണ്ടും അവസരം ലഭിക്കുകയാണ്. കേരളത്തിലെ ഏറ്റവും മനോഹരമായ റെയിൽവെ യാത്രാനുഭവങ്ങളിലൊന്നായ ഈ സർവീസ് മേഖലയിലെ വിനോദസഞ്ചാര വികസനത്തിനും കൂടുതൽ കരുത്തേകുമെന്നാണ് പ്രതീക്ഷിക്കുന്നത്.