വേമ്പനാട്ട് കായലും അതിനോടു ചേർന്നുകിടക്കുന്ന തണ്ണീർത്തടങ്ങളും നേരിടുന്ന പാരിസ്ഥിതിക വെല്ലുവിളികളെയും കാർഷിക പ്രതിസന്ധികളെയും മറികടക്കാൻ ഇനി നമുക്കു മുന്നിലുള്ളത് കൂട്ടായ പ്രവർത്തനത്തിന്റെയും ശാസ്ത്രീയമായ പരിഹാരങ്ങളുടെയും വഴിയാണ്. വേന്പനാട്ട് കായലിന്റെ ജലസംഭരണശേഷി ഗണ്യമായി കുറഞ്ഞതാണ് ഏറ്റവും വലിയ പ്രതിസന്ധി. മീനച്ചിലാർ, പന്പ, അച്ചൻകോവിലാർ, മണിമലയാർ, മൂവാറ്റുപുഴ തുടങ്ങിയ നദികളിലൂടെ ഒഴുകിയെത്തുന്ന എക്കലും ചെളിയും അടിഞ്ഞുകൂടി കായലിന്റെയും നദികളുടെയും അടിത്തട്ട് ഉയർന്നിരിക്കുന്നു.
ഇതിനു പരിഹാരമായി, കായലിലും നദികളിലും അടിഞ്ഞുകൂടിയ എക്കലും ചെളിയും നീക്കം ചെയ്യാനുള്ള ഒറ്റത്തവണ പദ്ധതി തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തിൽ നടപ്പിലാക്കണം. സർക്കാരിന് അധിക സാന്പത്തിക ബാധ്യതയില്ലാതെതന്നെ, നീക്കം ചെയ്യുന്ന മണ്ണും ചെളിയും നിർമാണ ആവശ്യങ്ങൾക്കും മറ്റും വിനിയോഗിക്കുന്നതിലൂടെ ഈ പദ്ധതി ലാഭകരമായി നടപ്പാക്കാൻ സാധിക്കും. കൂടാതെ, കായലിന്റെ ജലസംഭരണശേഷി വീണ്ടെടുക്കാൻ ശാസ്ത്രീയമായ ഡ്രഡ്ജിംഗ് അനിവാര്യമാണ്. ഡ്രഡ്ജിംഗ് ചെയ്തെടുക്കുന്ന കട്ടയും ചെളിയും വേന്പനാട് തണ്ണീർത്തടത്തിന്റെ സുരക്ഷയ്ക്കും നിർമാണത്തിനുമായി ഉപയോഗിക്കണം.
തോടുകളുടെ പുനരുജ്ജീവനവും ജലഗതാഗതവും
വേന്പനാട് തണ്ണീർത്തടത്തിലെ പല പഞ്ചായത്തുകളിലും നൂറുകണക്കിന് കിലോമീറ്റർ ദൈർഘ്യമുണ്ടായിരുന്ന തോടുകൾ നികത്തപ്പെടുകയോ പോളയും പായലും കുളവാഴയും മാലിന്യവും തിങ്ങിനിറഞ്ഞ് ഒഴുക്ക് നിലയ്ക്കുകയോ ചെയ്തിട്ടുണ്ട്. പായലിനൊപ്പം ചെളിയിൽ വേരുറപ്പിക്കുന്ന പ്രത്യേക തരം പുല്ലുകളും ജലപ്രവാഹത്തെ തടസപ്പെടുത്തുന്നു. നിലവിലുള്ള എല്ലാ തോടുകളും സംരക്ഷിക്കുന്നതിനായി ഒരു സമഗ്ര മാസ്റ്റർ പ്ലാൻ തയാറാക്കണം. കൈയേറ്റങ്ങൾ കർശനമായി ഒഴിപ്പിക്കുകയും തോടുകൾക്കു കുറുകെ വള്ളങ്ങളുടെ ഗതാഗതത്തിന് തടസമാകുന്ന രീതിയിൽ നിർമിച്ചിട്ടുള്ള താഴ്ന്ന പാലങ്ങളും ബണ്ടുകളും പൊളിച്ചുമാറ്റി ഉയരം കൂട്ടുകയും വേണം.
ചെറുവള്ളങ്ങൾക്ക് ഉള്ളിലേക്കു കടന്നുവരാനും ചരക്കുഗതാഗതം നടത്താനും സാധിക്കുന്ന വിധത്തിൽ തോടുകളെ മാറ്റിയെടുത്താൽ, കായലിന്റെ ഉൾപ്രദേശങ്ങളിലേക്കും വെള്ളത്തിന്റെ ഒഴുക്ക് സുഗമമാകും. തൊഴിലുറപ്പ് പദ്ധതി പോലുള്ള സംവിധാനങ്ങളെ കൃത്യമായി വിനിയോഗിച്ച് ഓരോ വർഷവും നിശ്ചിത പ്രദേശങ്ങളിലെ തോടുകൾ വൃത്തിയാക്കുന്നതിലൂടെ ജലമലിനീകരണം ഒരു പരിധിവരെ തടയാനാകും.
ശാസ്ത്രീയ കൃഷിരീതികളും രാസവള നിയന്ത്രണവും
കുട്ടനാട്ടിലെ അമിതമായ രാസവള-കീടനാശിനി പ്രയോഗം കായലിലെ മത്സ്യസന്പത്തിനെയും സൂക്ഷ്മജീവികളെയും നശിപ്പിക്കുകയാണ്. മണ്ണുപരിശോധന നടത്തി ശാസ്ത്രീയ കൃഷിരീതി കർശനമാക്കണം. പരന്പരാഗതമായി കർഷകർ ചെയ്തിരുന്നതുപോലെ, കൃഷിയില്ലാത്ത സമയങ്ങളിൽ പാടശേഖരങ്ങളിലേക്ക് കായൽവെള്ളം കയറ്റിയിറക്കുന്ന രീതി പുനഃസ്ഥാപിക്കേണ്ടതുണ്ട്. പുറംമടകൾ തുറന്നിട്ട് കായലിലെ വെള്ളം പാടങ്ങളിലൂടെ ഒഴുകിപ്പോകാൻ അനുവദിക്കുന്നത് മണ്ണിലെ അമ്ലത്വം കുറയ്ക്കാനും കീടങ്ങളെ നശിപ്പിക്കാനും സഹായിക്കും. കാലാവസ്ഥാ വ്യതിയാനം കണക്കിലെടുത്ത് കൃഷികലണ്ടർ പരിഷ്കരിക്കുകയും ഒക്ടോബറിൽതന്നെ കൃഷിയിറക്കി ഫെബ്രുവരിയോടെ കൊയ്ത്ത് പൂർത്തിയാക്കുകയും ചെയ്താൽ വേനൽക്കാലത്തെ ഉപ്പുവെള്ളഭീഷണിയിൽനിന്ന് വിളകളെ രക്ഷിക്കാനാകും. മാർച്ച് അവസാനത്തോടെ തണ്ണീർമുക്കം ബണ്ട് തുറക്കാൻ സാധിച്ചാൽ പാടങ്ങളിൽ ഉപ്പുവെള്ളം കയറ്റാൻ സാധിക്കും.
ഉത്തരവാദിത്വ ടൂറിസം
വലിയ ഹൗസ് ബോട്ടുകളുടെയും വിനോദസഞ്ചാര യാനങ്ങളുടെയും അനിയന്ത്രിതമായ സഞ്ചാരം മത്സ്യത്തൊഴിലാളികളുടെ വലകൾ നശിപ്പിക്കുകയും കായലിൽ എണ്ണയും മാലിന്യങ്ങളും കലരാൻ കാരണമാവുകയും ചെയ്യുന്നു. ഇതിനു പരിഹാരമായി, കായലിൽ വിനോദസഞ്ചാര ബോട്ടുകൾക്കായി പ്രത്യേക ജലപാതകൾ നിശ്ചയിക്കുകയും മത്സ്യബന്ധന മേഖലകളെ സംരക്ഷിക്കുകയും വേണം. ടൂറിസത്തിൽനിന്നുള്ള വരുമാനത്തിന്റെ ഒരു വിഹിതം കായൽ സംരക്ഷണത്തിനായി മാറ്റിവയ്ക്കണം. വിദേശ വിനോദസഞ്ചാരികളിൽനിന്നു ലഭിക്കുന്ന ഈ തുക ഉപയോഗിച്ച് കായലിലെ മാലിന്യ സംസ്കരണ പ്ലാന്റുകൾ സ്ഥാപിക്കാനും ജലശുദ്ധീകരണ പ്രവർത്തനങ്ങൾ നടത്താനും സാധിക്കും. കൂടാതെ, ആർ ബ്ലോക്ക്, കൈനകരി തുടങ്ങിയ പ്രദേശങ്ങളെ ബന്ധിപ്പിച്ചുകൊണ്ട് പരിസ്ഥിതി സൗഹൃദമായ വിനോദസഞ്ചാര പദ്ധതികൾ ആവിഷ്കരിക്കാവുന്നതാണ്. മലരിക്കൽ ആന്പൽ ടൂറിസത്തെ മാതൃകയാക്കി ബൃഹത്തായ കുട്ടനാട് ടൂറിസം സിറ്റി എന്ന ആശയവും നടപ്പിലാക്കാവുന്നതാണ്.