കൊച്ചി: നടിയെ ആക്രമിച്ച കേസില് മെമ്മറി കാര്ഡും പെന്ഡ്രൈവും ഹൈക്കോടതിയില് ഹാജരാക്കാന് നിര്ദേശം. ഒരു മാസത്തിനകം സീല് വച്ച കവറില് മെമ്മറി കാര്ഡും പെന്ഡ്രൈവും ഹൈക്കോടതി രജിസ്ട്രാര്ക്ക് മുന്നില് ഹാജരാക്കാന് എറണാകുളം പ്രിന്സിപ്പല് സെഷന്സ് കോടതിക്ക് ഹൈക്കോടതി നിര്ദേശം നല്കി.
അതിജീവിതയുടെ ഹര്ജി ഫയലില് സ്വീകരിച്ചു കൊണ്ടാണ് ജസ്റ്റീസ് സി.എസ്. ഡയസ് അധ്യക്ഷനായ സിംഗിള് ബെഞ്ചിന്റെ ഉത്തരവ്. അതിജീവിത ഉന്നയിച്ച വാദങ്ങളെല്ലാം പ്രഥമദൃഷ്ട്യാ നിലനില്ക്കുമെന്നാണ് ഹൈക്കോടതി സിംഗിള് ബെഞ്ചിന്റെ വിലയിരുത്തല്.
മെമ്മറി കാര്ഡിന്റെ ഹാഷ് വാല്യൂ മാറിയതില് നേരത്തെയുള്ള അന്വേഷണ റിപ്പോര്ട്ട് റദ്ദ് ചെയ്ത് ഫോറന്സിക് വിദഗ്ധര് ഉള്പ്പെടുന്ന എസ്ഐടി രൂപീകരിച്ച് അന്വേഷണം നടത്തണമെന്നാണ് അതിജീവിതയുടെ ആവശ്യം. ഇതില് കോടതി പ്രോസിക്യൂഷനോട് നിലപാട് തേടി. ഒരു മാസത്തിനകം മറുപടി നല്കാനാണ് ഹൈക്കോടതി ആവശ്യപ്പെട്ടിരിക്കുന്നത്.
അതേസമയം, അതിജീവിതയുടെ ഹര്ജി പരിഗണിക്കുന്നതില് നിന്നും രണ്ടു ജഡ്ജിമാര് പിന്മാറിയിരുന്നു. ജസ്റ്റീസ് ജോബിന് സെബാസ്റ്റ്യനും കൗസര് ഇടപ്പഗത്തുമാണ് സാങ്കേതിക കാരണങ്ങളെ തുടര്ന്ന് കേസ് പരിഗണിക്കുന്നതില് നിന്നും പിന്മാറിയത്.
E-paper LOGIN
LOGIN
