മലയാള സിനിമയ്ക്ക് അഭിമാനമായി 31-ാമത് കേരള രാജ്യാന്തര ചലച്ചിത്രമേളയുടെ (ഐഎഫ്എഫ്കെ) രാജ്യാന്തര മത്സരവിഭാഗത്തിൽ അടൂർ ഗോപാലകൃഷ്ണന്റെയും ലിയോ തദേവൂസിന്റെയും ചിത്രങ്ങൾ.
അടൂരിന്റെ മമ്മൂട്ടി ചിത്രം ‘പദയാത്ര’യും ലിയോ തദേവൂസിന്റെ ‘ചെവിട്ടോർമ്മ’യും ഉൾപ്പെടെ നാല് ഇന്ത്യൻ ചിത്രങ്ങളാണ് 14 ചിത്രങ്ങളുടെ മത്സരപ്പട്ടികയിൽ ഇടംപിടിച്ചത്. തമിഴ് ചിത്രങ്ങളായ ‘സെൽവി’, ‘മെമ്പേഴ്സ് ഓഫ് ദ പ്രോബ്ലമാറ്റിക് ഫാമിലി’ എന്നിവയാണ് മറ്റ് രണ്ട് ഇന്ത്യൻ ചിത്രങ്ങൾ.
ഡിസംബർ 11 മുതൽ 18 വരെ തിരുവനന്തപുരത്ത് നടക്കുന്ന 31-ാമത് ഐഎഫ്എഫ്കെയുടെ രാജ്യാന്തര മത്സരവിഭാഗത്തിലേക്ക് പത്ത് രാജ്യങ്ങളിൽനിന്നുള്ള 14 ചിത്രങ്ങളാണു തെരഞ്ഞെടുത്തിരിക്കുന്നത്. ഇന്ത്യയെ പ്രതിനിധീകരിക്കുന്ന നാലു ചിത്രങ്ങളിൽ രണ്ടെണ്ണം മലയാളത്തിലും രണ്ടെണ്ണം തമിഴിലുമാണ്.