ലണ്ടൻ: എട്ടാമത് യുക്മ കേരളപൂരം വള്ളംകളി 2026ന്റെ ഒരുക്കങ്ങൾ ദ്രുതഗതിയിൽ ആരംഭിച്ചതായി യുക്മ ഭാരവാഹികൾ അറിയിച്ചു. യുക്മ പ്രസിഡന്റ് അഡ്വ. എബി സെബാസ്റ്റ്യൻ, ജനറൽ സെക്രട്ടറി ജയകുമാർ നായർ, ട്രഷറർ ഷീജോ വർഗീസ് എന്നിവരുടെ നേതൃത്വത്തിലാണ് തയാറെടുപ്പുകൾ പുരോഗമിക്കുന്നത്.
മത്സരത്തിൽ പങ്കെടുക്കുന്നതിനുള്ള രജിസ്ട്രേഷൻ നടപടികൾ ഇതിനോടകം പൂർത്തിയായിട്ടുണ്ട്. വള്ളംകളിയുമായി ബന്ധപ്പെട്ട മറ്റ് അണിയറ പ്രവർത്തനങ്ങൾ അതിവേഗം മുന്നോട്ട് നീങ്ങുകയാണെന്ന് അധികൃതർ വ്യക്തമാക്കി.
ഓഗസ്റ്റ് 15ന് റോഥർഹാമിലെ മാൻവേഴ്സ് തടാകത്തിൽ വച്ചാണ് യൂറോപ്പിലെ മലയാളി സമൂഹത്തിന്റെ ഏറ്റവും വലിയ കായിക മാമാങ്കമായ യുക്മ വള്ളംകളി അരങ്ങേറുന്നത്.
ഇത്തവണത്തെ കേരളപൂരം വള്ളംകളിയുടെ ഔദ്യോഗിക ബീവറേജ് പാർട്ട്ണറായി സഹകരിക്കുന്നത് ലോകത്താദ്യമായി വാണിജ്യാടിസ്ഥാനത്തിൽ നിർമാണം തുടങ്ങിയ ഇന്ത്യൻ അറാക്ക് വാറ്റായ ‘മണവാട്ടി’ ആണ്.
കൊച്ചി കടവന്ത്ര സ്വദേശിയായ ജോൺ സേവ്യർ യുകെയിൽ സ്ഥാപിച്ച 'ലണ്ടൻ ബാരൺ' എന്ന കമ്പനിയാണ് മണവാട്ടി നിർമിക്കുന്നത്.
യുക്മ ദേശീയ ഭാരവാഹികളായ വർഗീസ് ഡാനിയൽ, സ്മിത തോട്ടം, സണ്ണിമോൻ മത്തായി, റെയ്മോൾ നിധീരി, പീറ്റർ താണോലിൽ, വള്ളംകളി രജിസ്ട്രേഷൻ ചുമതല വഹിക്കുന്ന ജോർജ് തോമസ് എന്നിവരും വിവിധ ദേശീയ സമിതിയംഗങ്ങളും ചേർന്നാണ് വള്ളംകളി മഹോത്സവത്തിന്റെ വിപുലമായ ഒരുക്കങ്ങൾക്ക് നേതൃത്വം നൽകുന്നത്.
കൂടുതൽ വിവരങ്ങൾക്ക്: അഡ്വ. എബി സെബാസ്റ്റ്യൻ (പ്രസിഡന്റ്) - 07702862186, ജയകുമാർ നായർ (ജനറൽ സെക്രട്ടറി) - 07403223066.