ഡിട്രോയിറ്റ്: ലോകമെമ്പാടുമുള്ള സംഗീതാസ്വാദകരുടെ പ്രിയപ്പെട്ട ഓൺലൈൻ സംഗീത കൂട്ടായ്മയായ "സ്വർഗീയ സംഗീതം' പരമ്പരയുടെ 47-ാമത് വോളിയം ഇന്ന് ഓൺലൈൻ സംഗീത സായാഹ്നമായി അരങ്ങേറും.
ഈസ്റ്റേൺ സമയം രാത്രി 8.15ന് സൂം പ്ലാറ്റ്ഫോമിലൂടെയാണ് പരിപാടി സംപ്രേഷണം ചെയ്യുക. പ്രശസ്ത ഗായകനും സംഗീതസംവിധായകനും സൗണ്ട് എൻജിനിയറുമായ മോൻസി തോമസ് കാരയ്ക്കൽ പങ്കെടുക്കുന്ന "ഫേസ് ടു ഫേസ്' അഭിമുഖവും തത്സമയ ഗാനസന്ധ്യയുമാണ് പരിപാടിയുടെ പ്രധാന ആകർഷണം.
സുവിശേഷ-ആത്മീയ സംഗീതരംഗത്ത് നൂറിലധികം ഗാനങ്ങൾക്ക് സംഗീതസംവിധാനം നിർവഹിച്ചിട്ടുള്ള മോൻസി തോമസ് കാരയ്ക്കൽ നിരവധി ഗാനങ്ങളുടെ ഓർക്കസ്ട്രേഷനും നിർവഹിച്ചിട്ടുണ്ട്.
മാർത്തോമ്മാ ഇവാഞ്ചലിസ്റ്റിക് അസോസിയേഷന്റെ ഡോ. മാത്യൂസ് മാർ അത്തനാസിയോസ് മെമ്മോറിയൽ ഗോസ്പൽ ടീമിൽ കഴിഞ്ഞ 12 വർഷമായി അദ്ദേഹം സജീവ അംഗമാണ്.
ഏഷ്യയിലെ ഏറ്റവും വലിയ ക്രൈസ്തവ ആത്മീയ സംഗമമായ മാരാമൺ കൺവൻഷനിൽ അദ്ദേഹത്തിന്റെ സംഗീതസൃഷ്ടികൾ അവതരിപ്പിക്കപ്പെട്ടിട്ടുണ്ടെന്നും മാരാമൺ ക്വയറിലെ സജീവ സാന്നിധ്യമായും അദ്ദേഹം ശ്രദ്ധേയനാണെന്നും സംഘാടകർ അറിയിച്ചു.
എം.ജി. ശ്രീകുമാർ, കെ.ജി. മാർക്കോസ്, കെസ്റ്റർ, ഇമ്മാനുവൽ ഹെൻറി, അഭിജിത്ത് തുടങ്ങി പ്രമുഖ പിന്നണി - സുവിശേഷ ഗായകരുമായി സഹകരിച്ച് നിരവധി ശ്രദ്ധേയ ഗാനങ്ങൾ അദ്ദേഹം ഒരുക്കിയിട്ടുണ്ട്. ഭാര്യ സീനാമോളും മകൾ മരിയ റെയ്ച്ചലും ഉൾപ്പെടുന്ന കുടുംബത്തോടൊപ്പം തിരുവല്ലയിലാണ് താമസം.
സാം അലക്സിന്റെ പ്രാരംഭ പ്രാർഥനയോടെ ആരംഭിക്കുന്ന സംഗീതസായാഹ്നത്തിൽ റവ. ജേക്കബ് തോമസ് സമാപന പ്രാർത്ഥന നിർവഹിക്കും. സണ്ണി, റവ. സാം ലൂക്കോസ്, ജോജു, സാബു, ഷിജു, അജി, റിട്ടു, രജനി, ഷീബ, ജനിയ എന്നിവരും പരിപാടിയിൽ സഹപങ്കാളികളാകും.
ലോകത്തിന്റെ വിവിധ ഭാഗങ്ങളിലുള്ള ആത്മീയ സംഗീതാസ്വാദകരെ ഈ അനുഗ്രഹീത സംഗീതസന്ധ്യയിലേക്ക് സ്വാഗതം ചെയ്യുന്നതായി സംഘാടകർ അറിയിച്ചു.
സൂം ലൈവ് വിവരങ്ങൾ: മീറ്റിംഗ് ഐഡി: 769 374 4841, പാസ്കോഡ്: music.
Deepika
E-paper LOGIN
LOGIN
