കൊച്ചി: പോക്സോ കേസുകളില്‍ ഹാജരാകാന്‍ മാത്രമായി സ്‌പെഷ്യല്‍ പബ്ലിക് പ്രോസിക്യൂട്ടര്മാരെ നിയമിക്കണമെന്നു ഹൈക്കോടതി. മറ്റു കേസുകളുടെ ചുമതല ഇവര്‍ക്കു നല്‍കരുത്.
മറ്റ് ചുമതലകള്‍ക്കൂടി നല്‍കി പുറപ്പെടുവിക്കുന്ന സര്‍ക്കാര്‍ ഉത്തരവുകള്‍ നിലനില്‍ക്കാത്തതാണെന്നും പോക്സോ കേസുകള്‍ കൈകാര്യം ചെയ്യാന്‍ മാത്രമായി ആറാഴ്ചയ്ക്കകം പ്രത്യേക പ്രോസിക്യൂട്ടര്മാരെ നിയമിക്കണമെന്നും ചീഫ് ജസ്റ്റീസ് സൗമെന്‍ സെന്‍, ജസ്റ്റീസ് വി.എം. ശ്യാംകുമാര്‍ എന്നിവരടങ്ങുന്ന ഡിവിഷന്‍ ബെഞ്ച് സര്‍ക്കാരിനോടു നിര്‍ദേശിച്ചു.
പോക്സോ കേസ് പ്രോസിക്യൂട്ടര്മാര്ക്കു ബാലനീതി നിയമപ്രകാരമുള്ള കേസുകളുടെയടക്കം അധിക ചുമതല നല്‍കി 2025ല്‍ പുറപ്പെടുവിച്ച സര്‍ക്കാര്‍ ഉത്തരവ് ചോദ്യംചെയ്ത് തൊടുപുഴ മുട്ടം ജില്ലാ കോടതി ബാര്‍ അസോസിയേഷനും സെക്രട്ടറി ഷാജി ജോസഫും നല്‍കിയ പൊതുതാത്പര്യ ഹര്‍ജിയാണു കോടതി പരിഗണിച്ചത്.
എന്നാല്‍ പോക്സോ കോടതികളില്‍ കുട്ടികളുടെ മനഃശാസ്ത്രം അറിഞ്ഞ് പെരുമാറാന്‍ പ്രത്യേക പരിശീലനം ലഭിച്ച പ്രോസിക്യൂട്ടര്മാരുടെ സേവനം അനിവാര്യമാണെന്ന സുപ്രീംകോടതി ഉത്തരവിനു വിരുദ്ധമാണ് സര്‍ക്കാര്‍ ഉത്തരവെന്ന് കോടതി ചൂണ്ടിക്കാട്ടി.
എറണാകുളം ഒഴികെ ശേഷിക്കുന്ന 13 ജില്ലകളിലും സ്ഥിരം പോക്സോ കോടതികള്‍ സ്ഥാപിക്കുന്ന കാര്യം സര്‍ക്കാര്‍ പരിഗണിക്കണമെന്നും നിലവിലെ കോടതികളില്‍ അടിസ്ഥാനസൗകര്യങ്ങള്‍ ഒരുക്കുകയും ആവശ്യമായ സാമ്പത്തികസഹായം സര്‍ക്കാര്‍ നല്‍കുകയും വേണമെന്നും കോടതി നിര്‍ദേശിച്ചു.
Deepika
Corehub Solutions
E-paper LOGIN
LOGIN