ആർപ്പൂക്കര: മഴയ്ക്ക് ശമനമില്ലാതായതോടെ പടിഞ്ഞാറൻ പ്രദേശങ്ങൾ ദുരിതത്തിൽ.
അയ്മനം, ആർപ്പൂക്കര, കുമരകം, നീണ്ടൂർ തുടങ്ങിയ വിവിധ പ്രദേശങ്ങൾ വെള്ളത്തിൽനിന്നു മുക്തമായിട്ടില്ല.
ആർപ്പൂക്കരയിലെ മണിയാപറമ്പ്, മഞ്ചാടിക്കരി, കരിപ്പൂത്തട്ട്, കരിപ്പ തുടങ്ങിയ പ്രദേശങ്ങളിലെ വീടുകളിൽനിന്നും റോഡുകളിൽനിന്നും വെള്ളമിറങ്ങിയിട്ടില്ല. നീണ്ടൂരിലെ രാജീവ് ഗാന്ധി കോളനിയിലെ ഒരു ഭാഗം വെള്ളത്തിലാണ്.
ആർപ്പൂക്കര അയ്മനം, കുമരകം, നീണ്ടൂർ എന്നിവിടങ്ങളിൽ ദുരിതാശ്വാസ ക്യാമ്പ് പ്രവർത്തിക്കുന്നുണ്ട്.
നഷ്ടപരിഹാരത്തുക വർധിപ്പിക്കണം: വ്യാപാരി വ്യവസായി സമിതി
മണർകാട്: പ്രളയം മൂലം വ്യാപാരസ്ഥാപനങ്ങൾക്കുണ്ടായ നഷ്ടം പരിഹരിക്കാൻ അടിയന്തര നടപടി സ്വീകരിക്കണമെന്ന് വ്യാപാരി വ്യവസായി സമിതി അയർക്കുന്നം ഏരിയാ സമ്മേളനം ആവശ്യപ്പെട്ടു.
സർക്കാർ പ്രഖ്യാപിച്ച നഷ്ടപരിഹാര തുക അപര്യാപ്തമാണെന്നും നഷ്ടം കണക്കാക്കി ഉചിതമായ നഷ്ടപരിഹാരത്തുക പ്രഖ്യാപിക്കാൻ സർക്കാർ തയാറാകണമെന്നും സമ്മേളനം ആവശ്യപ്പെട്ടു. സമ്മേളനം വ്യാപാരി വ്യവസായി സമിതി ജില്ലാ സെക്രട്ടറി ജോജി ജോസഫ് ഉദ്ഘാടനം ചെയ്തു. ഏരിയ പ്രസിഡന്റ് നൈനാൻ ഏബ്രഹാം അധ്യക്ഷത വഹിച്ചു.
പ്രസിഡന്റായി കെ.വി. സെബാസ്റ്റ്യനെയും സെക്രട്ടറിയായി ടി.ബി. ബിജുവിനെയും ട്രഷററായി ടി.വി. കുഞ്ഞുമോനെയും തെരഞ്ഞെടുത്തു.