Movies
ക്വീന്സ്ലാന്ഡില് നിന്നുള്ള ആദ്യ മലയാള ചലച്ചിത്രമായ "ഗോസ്റ്റ് പാരഡൈസ്' ഈ മാസം 27 മുതല് ഓസ്ട്രേലിയയിലെ വിവിധ തിയറ്ററുകളില് പ്രദര്ശനത്തിനെത്തും. ബ്രിസ്ബെയ്നിലെ മൗണ്ട് ഗ്രവറ്റ് ഇവന്റ് സിനിമാസിന്റെ സ്ക്രീൻ രണ്ടിലാണ് ആദ്യ പ്രദര്ശനം നടക്കുന്നത്.
27ന് പ്രാദേശിക സമയം വൈകുന്നേരം ആറിന് നടക്കുന്ന പ്രദര്ശന ഉദ്ഘാടനത്തില് കലാ, ആത്മീയ രംഗത്തെ പ്രമുഖർ പങ്കെടുക്കും. ഡിസംബര് രണ്ടിന് വൈകുന്നേരം 5.45ന് ഹാര്ബര് ടൗണ് ഗോള്ഡ് കോസ്റ്റിലെ റീഡിംഗ് സിനിമാസിലാണ് രണ്ടാമത്തെ പ്രദര്ശനം.
തുടര്ന്ന് ഓസ്ട്രേലിയയിലെ വിവിധ തിയറ്ററുകളില് ചിത്രം പ്രദര്ശിപ്പിക്കും. കേരളത്തിലും ക്വീന്സ്ലാന്ഡിലുമായി ആണ് സിനിമ ചിത്രീകരിച്ചിരിക്കുന്നത്.
നടനും സംവിധായകനും ലോക റിക്കാര്ഡ് ജേതാവുമായ ജോയ് കെ. മാത്യുവാണ് ചിത്രത്തിന്റെ കഥ, തിരക്കഥ, സംഭാഷണം, സംവിധാനം എന്നിവ നിര്വഹിച്ചിരിക്കുന്നത്. ഗ്ലോബല് മലയാളം സിനിമയുടെ ബാനറില് ഓസ്ട്രേലിയന് മലയാളം ഫിലിം ഇന്ഡസ്ട്രിയുടെ സഹകരണത്തോടെയാണ് ചിത്രം പുറത്തിറക്കുന്നത്.
കെെലാഷ്, ശിവജി ഗുരുവായൂര്, സോഹന് സീനുലാല്, സാജു കൊടിയന്, മോളി കണ്ണമ്മാലി, ലീലാകൃഷ്ണന്, അംബിക മോഹന്, പൗളി വല്സന്, കുളപ്പുള്ളി ലീല, ടാസോ, അലന എന്നിവരാണ് മുഖ്യ വേഷങ്ങളിലെത്തുന്നത്.
ഷാമോന്, സാജു, ജോബി, ജോബിഷ്, ഷാജി, മേരി, ഇന്ദു, ആഷ, ജയലക്ഷ്മി, മാര്ഷല്, സൂര്യ, രമ്യ, പൗലോസ്, ടെസ, ശ്രീലക്ഷ്മി, ഷീജ, തോമസ്, ജോസ്, ഷിബു, റജി, ജിബി, സജിനി, അലോഷി, തങ്കം, ജിന്സി, സതി തുടങ്ങിയ 26 പുതുമുഖങ്ങൾ ചിത്രത്തിലൂടെ അരങ്ങേറ്റം കുറിക്കും.
ആദം കെ.അന്തോണി, സാലി മൊയ്ദീന് (ഛായാഗ്രഹണം), എലിസബത്ത്, ജന്നിഫര്, മഹേഷ് ചേര്ത്തല (ചമയം), മൈക്കിള് മാത്സണ്, ഷാജി കൂനമ്മാവ് (വസ്ത്രാലങ്കാരം), ഡോ.രേഖ റാണി, സഞ്ജു സുകുമാരന് (സംഗീതം), ഗീത് കാര്ത്തിക, ബാലാജി (കലാ സംവിധാനം), ഷാബു പോള് (നിശ്ചല ഛായാഗ്രഹണം), സലിം ബാവ (സംഘട്ടനം), ലിന്സണ് റാഫേല് (എഡിറ്റിംഗ്) ജുബിന് രാജ് (സൗണ്ട് മിക്സിംഗ്), സി.ആര്.സജയ് (കളറിസ്റ്റ്), കെ.ജെ. മാത്യു കണിയാംപറമ്പില് (എക്സിക്യൂട്ടീവ് പ്രൊഡ്യൂസര്), ജിജോ ജോസ് (ഫൈനാന്സ് കണ്ട്രോളര്), ക്ലെയര്, ജോസ് വരാപ്പുഴ (പ്രൊഡക്ഷന് കണ്ട്രോളര്), രാധാകൃഷ്ണന് ചേലേരി (പ്രൊഡക്ഷന് എക്സിക്യൂട്ടീവ്), യൂണിറ്റ് (മദര്ലാൻഡ് കൊച്ചി, മദര് വിഷന്), കാമറ (ലെന്സ് മാര്ക്ക് 4 മീഡിയ എറണാകുളം, മദര് വിഷന്), ഷിബിന് സി.ബാബു (പോസ്റ്റര് ഡിസൈന്), ഡേവിസ് വര്ഗീസ് (പ്രൊഡക്ഷന് മാനേജര്), നിതിന് നന്ദകുമാര് (അനിമേഷന്) എന്നിവരാണ് അണിയറ പ്രവര്ത്തകര്.
Movies
സിനിമാ ടിക്കറ്റിലെ കൊള്ളനിരക്കിന് കടിഞ്ഞാണിടാനൊരുങ്ങി കർണാടക സർക്കാർ. സിനിമ ടിക്കറ്റ് നിരക്കിന് ഈടാക്കാവുന്ന തുകയിൽ പരിധി നിശ്ചയിച്ചു കൊണ്ടാണ് പുതിയ തീരുമാനം.
മള്ട്ടിപ്ലെക്സ് അടക്കം എല്ലാ തിയറ്ററുകളിലും 200 രൂപയാണ് നിശ്ചയിച്ച പരമാവധി ടിക്കറ്റ് നിരക്ക്. വിനോദ നികുതി അടക്കമുള്ള തുകയാണിത്. ഇതിനായി കര്ണാടക സിനിമ (റെഗുലേഷന്) നിയമം 2014 ഭേദഭഗതി ചെയ്തിട്ടുണ്ട്.
മൾട്ടിപ്ലക്സുകൾ ഉൾപ്പെടെ സംസ്ഥാനത്തെ എല്ലാ തിയറ്ററുകളിലെയും ഓരോ ഷോയുടെയും ടിക്കറ്റിന്റെ വില വിനോദ നികുതി ഉൾപ്പെടെ 200 രൂപയിൽ കൂടരുതെന്നാണ് നിയമം പറയുന്നത്. റിലീസ് ചിത്രങ്ങൾക്ക് ടിക്കറ്റ് നിരക്ക് കൂട്ടുന്ന പ്രവണതക്കും കടിഞ്ഞാണിടും. എല്ലാ ഭാഷയിലുള്ള ചിത്രങ്ങൾക്കും ഈ നിരക്ക് പരിധി ബാധകമായിരിക്കും.
സിനിമാ സംഘടനകൾക്ക് എതിർപ്പുണ്ടെങ്കിൽ 15 ദിവസത്തിനകം സർക്കാരിനെ അറിയിക്കാം. 15 ദിവസത്തിന് ശേഷം അന്തിമ വിജ്ഞാപനം പുറത്തിറക്കുമെന്നും സർക്കാർ വ്യക്തമാക്കിയിട്ടുണ്ട്. സംസ്ഥാനമൊട്ടാകെ ടിക്കറ്റ് നിരക്ക് ഏകീകരിക്കുമെന്ന് മുഖ്യമന്ത്രി സിദ്ധരാമയ്യ മാർച്ചിലെ ബജറ്റ് പ്രസംഗത്തില് വ്യക്തമാക്കിയിരുന്നു. ഇതിന് പിന്നാലെയാണ് തീരുമാനം.
2017-ൽ ആദ്യമായി മുഖ്യമന്ത്രിയായ കാലത്ത് സിദ്ധരാമയ്യ മൾട്ടിപ്ലെക്സുകൾ ഉൾപ്പെടെ എല്ലാ തിയറ്ററുകളിലും സിനിമാ ടിക്കറ്റ് നിരക്ക് 200 രൂപയായി നിശ്ചയിച്ചിരുന്നു. ഇതിനെതിരെ തിയറ്റര് ഉടമകളില് നിന്ന് വലിയ സമ്മര്ദ്ദമാണ് സര്ക്കാര് നേരിട്ടത്.
മൾട്ടിപ്ലക്സ് ഉടമകൾ വരുമാന നഷ്ടം ചൂണ്ടിക്കാട്ടി തീരുമാനത്തിനെതിരെ കർണാടക ഹൈക്കോടതിയെ സമീപിക്കുകയായിരുന്നു. പിന്നാലെ സര്ക്കാര് തീരുമാനത്തില് നിന്നും പിന്നോട്ട് പോവുകയും തിയറ്റര് ഉടമകള് സ്വന്തം രീതിയില് നിരക്ക് ഈടാക്കുകയുമായിരുന്നു.