റോം: വലത് ശ്വാസകോശത്തിലെ അർബുദ ട്യൂമർ നീക്കംചെയ്യുന്നതിനുള്ള ശസ്ത്രക്രിയയ്ക്കുശേഷം റോമിലെ ജെമെല്ലി ആശുപത്രിയിൽ കഴിയുന്ന ലെയോ പതിനാലാമൻ മാർപാപ്പയുടെ ആരോഗ്യനില തൃപ്തികരമായി തുടരുന്നതായി സ്വകാര്യ ഡോക്‌ടർ ലൂയിജി കാർബണിയും ശസ്ത്രക്രിയയ്ക്കു നേതൃത്വം നൽകിയ പ്രഫ. സ്റ്റെഫാനോ മർഗാരിറ്റോറയും അറിയിച്ചു.
ഇന്നലെ നടത്തിയ രക്തപരിശോധനയിലും നെഞ്ചിന്‍റെ എക്സ്റേ ഫലങ്ങളിലും ആരോഗ്യനില മെച്ചപ്പെടുന്നതായി സ്ഥിരീകരിച്ചിട്ടുണ്ട്. നിലവിൽ അദ്ദേഹത്തിനു സ്വന്തമായി ദൈനംദിന കാര്യങ്ങൾ ചെയ്യാനാകുന്നുണ്ടെന്നും ശ്വസനസംബന്ധമായ ഫിസിയോതെറാപ്പി തുടരുകയാണെന്നും മെഡിക്കൽ സംഘം വ്യക്തമാക്കി.
അതിനിടെ, ശസ്ത്രക്രിയയ്ക്കുശേഷമുള്ള മാർപാപ്പയുടെ ചിത്രങ്ങൾ ഇതാദ്യമായി വത്തിക്കാൻ പുറത്തുവിട്ടു. ജെമെല്ലി ആശുപത്രിയിലെ പത്താം നിലയിലുള്ള ചാപ്പലിൽ മാർപാപ്പ വിശുദ്ധ കുർബാന അർപ്പിക്കുന്ന ചിത്രങ്ങളാണ് ഇന്നലെ പുറത്തുവിട്ടത്. പച്ച നിറത്തിലുള്ള തിരുവസ്ത്രമണിഞ്ഞ് പ്രാർഥനാപൂർവം നിൽക്കുന്ന മാർപാപ്പയുടെ ചിത്രങ്ങളാണ് വത്തിക്കാൻ മീഡിയ പങ്കുവച്ചത്.
വിശുദ്ധ കുർബാനയിൽ ആശുപത്രിയിലെ ഡോക്‌ടർമാർ, നഴ്സുമാർ, മറ്റു ജീവനക്കാർ, വത്തിക്കാൻ സുരക്ഷാ ഉദ്യോഗസ്ഥർ എന്നിവർ പങ്കെടുത്തു. രോഗബാധിതരെയും ആതുരസേവന രംഗത്തുള്ളവരെയും പരിപാലിക്കുന്നതിൽ ആരോഗ്യപ്രവർത്തകർ നടത്തുന്ന സേവനങ്ങൾക്ക് മാർപാപ്പ തന്‍റെ സന്ദേശത്തിൽ നന്ദി അറിയിച്ചു.
മാർപാപ്പ സുഖം പ്രാപിച്ചുവരികയാണെന്നും നാളത്തെ ത്രികാല പ്രാർഥനയ്ക്ക് അദ്ദേഹം നേതൃത്വം നൽകുമെന്നും വത്തിക്കാൻ അറിയിച്ചു. എന്നാൽ ഇത് ആശുപത്രിയിൽനിന്നാണോ വത്തിക്കാനിൽനിന്നാണോ എന്നു വ്യക്തമാക്കിയിട്ടില്ല. കഴിഞ്ഞ 13നായിരുന്നു മാർപാപ്പയ്ക്ക് അടിയന്തര ശസ്ത്രക്രിയ നടത്തിയത്.
Deepika
Corehub Solutions
E-paper LOGIN
LOGIN