മെക്സിക്കോയിൽ പത്രാധിപരെ വെടിവച്ചുകൊന്നു : Deepika.com International News |

Click here for detailed news of all items

മെക്സിക്കോയിൽ പത്രാധിപരെ വെടിവച്ചുകൊന്നു

Tuesday, May 16, 2017 11:23 AM IST

മെക്സിക്കോസിറ്റി: അവാർഡ് ജേതാവായ മെക്സിക്കൻ മാധ്യമപ്രവർത്തകൻ ഹാവിയർ വാൾഡെസിനെ അക്രമി വെടിവച്ചുകൊന്നു.

മയക്കുമരുന്നു സംഘങ്ങളുടെ വിഹാരഭൂമിയായ സിനലോവ എന്ന പടിഞ്ഞാറൻ സംസ്ഥാനത്താണു സംഭവം. റിയോഡോച്ചെ എന്ന വാരികയുടെ സ്ഥാപകനും പത്രാധിപരുമായിരുന്നു വാൾഡെസ്.

സംസ്ഥാന തലസ്ഥാനമായ കുലിയാകാനിൽ വാൾഡെസ് കാറോടിച്ചുപോകുന്പോൾ തടഞ്ഞുനിർത്തി കാറിൽനിന്നിറക്കി വെടിവച്ചുകൊല്ലുകയായിരുന്നു. ഘാതകൻ ഒറ്റയ്ക്കായിരുന്നു.

ഈ വർഷം ഇതിനകം മെക്സിക്കോയിൽ ആറു മാധ്യമപ്രവർത്തകർ വധിക്കപ്പെട്ടിട്ടുണ്ട്. മയക്കുമരുന്നു മാഫിയകളെപ്പറ്റിയും ക്രിമിനൽ സംഘങ്ങളെപ്പറ്റിയും റിപ്പോർട്ടുചെയ്തിരുന്നവരാണ് ഇവരിലേറെയും. വാൾഡെസും മാഫിയകൾക്കെതിരേ തൂലിക ചലിപ്പിച്ചയാളാണ്. എഎഫ്പി എന്ന വാർത്താ ഏജൻസിയുടെ ലേഖകനായും അദ്ദേഹം പ്രവർത്തിച്ചിട്ടുണ്ട്.

മെക്സിക്കോ മാധ്യമങ്ങൾക്ക് അപായനാട്

മാധ്യമപ്രവർത്തകർക്ക് ഏറ്റവും അപായകാരിയായ നാടാണു മെക്സിക്കോ. മാധ്യമപ്രവർത്തകരെ കൊല്ലുന്നവരെയും ആക്രമിക്കുന്നവരെയും കണ്ടുപിടിച്ചു ശിക്ഷിക്കാൻ സർക്കാർ ഉത്സാഹിക്കാറില്ല.

കഴിഞ്ഞയാഴ്ച ഗ്വെറേറോ സംസ്ഥാനത്ത് ഏഴു മാധ്യമപ്രവർത്തകരെ നൂറോളം വരുന്ന അക്രമിസംഘം തടഞ്ഞുവച്ചു മർദിക്കുകയും കൊള്ളയടിക്കുകയും ചെയ്തു.

ഏതാനും മാസം മുന്പ് ചിഹ്വാഹ്വാ നഗരത്തിൽ മിറോസ്ലാവ ബ്രീച്ച് എന്ന മാധ്യമപ്രവർത്തക മകനെ കാറിൽ സ്കൂളിലേക്കു കൊണ്ടുപോകുന്പോൾ വെടിയേറ്റു മരിച്ചു. ഈ സംഭവത്തെത്തുടർന്നു ബ്രീച്ചിന്‍റെ റിപ്പോർട്ടുകൾ പ്രസിദ്ധീകരിച്ചിരുന്ന നോർട്ടെ എന്ന പത്രം പ്രസിദ്ധീകരണംതന്നെ അവസാനിപ്പിച്ചു.

1992-നു ശേഷം മെക്സിക്കോയിൽ 42 മാധ്യമപ്രവർത്തകർ റിപ്പോർട്ടുകളുടെ പേരിൽ വധിക്കപ്പെട്ടിട്ടുണ്ട്. വേറെ 50 മാധ്യമപ്രവർത്തകരെ കൊലപ്പെടുത്തിയതിന് അവരുടെ റിപ്പോർട്ടുകൾ കാരണമായിട്ടുണ്ടോ എന്നു വ്യക്തമല്ല.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.