ഏപ്രിൽ മുതൽ റേഷൻ പഞ്ചസാരയില്ല : Deepika.com Kerala News |

Click here for detailed news of all items

ഏപ്രിൽ മുതൽ റേഷൻ പഞ്ചസാരയില്ല

Friday, February 17, 2017 4:18 PM IST

തിരുവനന്തപുരം: ഏപ്രിൽ മുതൽ റേഷൻ പഞ്ചസാര ലഭിക്കില്ല. റേഷൻ കടവഴി ഏപ്രിൽ മുതൽ റേഷൻ പഞ്ചസാര വിതരണം ചെയ്യില്ലെന്ന് കേന്ദ്ര സർക്കാർ സംസ്ഥാനത്തെ അറിയിച്ചു.

സബ്സിഡി നിരക്കിൽ കൂടുതൽ പഞ്ചസാര ലഭ്യമാക്കണമെന്ന് സംസ്ഥാനം കേന്ദ്രസർക്കാരിനോട് ആവശ്യപ്പെട്ടപ്പോഴാണ് ഇക്കാര്യം അറിയിച്ചത്. സബ്സിഡി നിരക്കിൽ പഞ്ചസാര വിതരണത്തിനായി കേന്ദ്ര ബജറ്റിൽ 100 കോടി രൂപ മാത്രമാണ് നീക്കിവച്ചിട്ടുള്ളത്. ഇത്രയും തുക നേരത്തേ പഞ്ചസാര വാങ്ങിയതിനുള്ള കുടിശിക തീർക്കാനുള്ള കൂട്ടത്തിലാണ് വകയിരുത്തിയിട്ടുള്ളത്. കേരളത്തിനു പഞ്ചസാര നൽകിയ ഇനത്തിൽ മാത്രം 88 കോടി രൂപ കുടിശികയുണ്ട്.

നിലവിൽ ബിപിഎൽ, എപിഎൽ കാർഡ് ഉടമകളിൽ ഓരോ അംഗത്തിനും മാസം 250 ഗ്രാം പഞ്ചസാര വീതമാണ് നൽകുന്നത്. 250 ഗ്രാം പഞ്ചസാരക്ക് നാലു രൂപയാണ് വില. സംസ്ഥാനങ്ങൾക്ക് ആവശ്യമെങ്കിൽ സ്വന്തം ചെലവിൽ പഞ്ചസാര സബ്സിഡി നിരക്കിൽ വിതരണം ചെയ്യാമെന്നാണ് കേന്ദ്ര സർക്കാർ അറിയിച്ചിട്ടുള്ളത്. നിലവിലെ നിരക്കിൽ മുൻഗണനാ വിഭാഗം കാർഡ് ഉടമകൾക്ക് ഒരു മാസം പഞ്ചസാര നൽകാൻ 16 കോടി രൂപ വേണ്ടിവരും. ഇതുവഴി സംസ്ഥാന സർക്കാരിന് പ്രതിവർഷം 192 കോടി രൂപയുടെ ബാധ്യത വന്നുചേരും.ആറു സംസ്ഥാനങ്ങൾ മാത്രമാണ് റേഷൻ കാർഡ് ഉടമകൾക്ക് സബ്സിഡി നിരക്കിൽ പഞ്ചസാര നൽകിവരുന്നത്.

വൈ.എസ്. ജയകുമാർ

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.