വാഴക്കുളം: കാർഷിക മേഖലയിലെ വിവിധ പ്രതിസന്ധികൾക്ക് അടിയന്തര പരിഹാരം കാണണമെന്ന ആവശ്യവുമായി ഇൻഫാം സംസ്ഥാനതലത്തിൽ മൂന്നു കേന്ദ്രങ്ങളിലായി സമരപ്രഖ്യാപന കണ്‍വൻഷനുകൾ നടത്തും. ഉത്തര മേഖലയിൽ കണ്ണൂരും തെക്കൻ മേഖലയിൽ തിരുവനന്തപുരത്തും കണ്‍വൻഷൻ നടത്താനാണു തീരുമാനം.
ഇൻഫാം കോട്ടയം റീജണിന്‍റെ ആഭിമുഖ്യത്തിൽ മധ്യകേരളത്തിലെ കണ്‍വൻഷൻ 30ന് ഉച്ചകഴിഞ്ഞ് 2.30ന് ഭരണങ്ങാനത്ത് ഇൻഫാം വിജ്ഞാന വ്യാപാരഭവനിൽ നടത്തുമെന്നു സംസ്ഥാന ഡയറക്ടർ ഫാ.ജോസ് മോനിപ്പിള്ളിൽ, കണ്‍വീനർ ജോസ് എടപ്പാട്ട് എന്നിവർ അറിയിച്ചു. കോട്ടയം, ഇടുക്കി, എറണാകുളം, പത്തനംതിട്ട മേഖലകളിലെ കർഷക പ്രതിനിധികൾ പങ്കെടുക്കുന്ന ഭരണങ്ങാനം സമര പ്രഖ്യാപന കണ്‍വൻഷനിൽ ദേശീയ സെക്രട്ടറി ജനറൽ ഷെവലിയർ വി.സി. സെബാസ്റ്റ്യൻ മുഖ്യപ്രഭാഷണം നടത്തും.
കാർഷിക മേഖലയിലെ വിലത്തകർച്ച , കർഷകവിരുദ്ധ രാജ്യാന്തര കരാറുകൾ, റബർ നയത്തിൽ നിന്നുളള പിന്മാറ്റം, റബർ നിയമം റദ്ദാക്കൽ, വിള ഇൻഷ്വറൻസ് പദ്ധതിയിലെ അഴിമതി, ബാങ്കുകളുടെ ചൂഷണം, കുടിയേറ്റ കർഷകരുടെ പ്രശ്നങ്ങൾ തുടങ്ങിയ വിഷയങ്ങൾ സമരപ്രഖ്യാപന കണ്‍വൻഷനുകളിൽ ചർച്ച ചെയ്യും.
ദേശീയ ചെയർമാൻ ഫാ. ജോസഫ് ഒറ്റപ്ലാക്കൽ, വൈസ് ചെയർമാൻ കെ. മൈതീൻ ഹാജി, ജനറൽ സെക്രട്ടറി ഫാ. ആന്‍റണി കൊഴുവനാൽ, ട്രസ്റ്റി എം.സി. ജോർജ്, പാലാ രൂപത ഡയറക്ടർ ഫാ. ജോസ് തറപ്പേൽ, കോട്ടയം ജില്ലാ പ്രസിഡന്‍റ് മാത്യു മാന്പറന്പിൽ, സെക്രട്ടറി ബേബി പന്തലാനി തുടങ്ങിയവർ ഭരണങ്ങാനം കണ്‍വൻഷനു നേതൃത്വം നൽകും.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.