വർഗീയവാദിയെന്നു ചാപ്പ കുത്തുന്നത് ഇപിയുടെ ചർച്ച മറച്ചുവയ്ക്കാനാണെന്നു ഷാഫി പറന്പിൽ : Deepika.com Kerala News |

കോഴിക്കോട്: വടകര മണ്ഡലത്തിൽ യുഡിഎഫിന്‍റെ നേതൃത്വത്തിൽ കടുത്ത വർഗീയ പ്രചാരണം നടത്തിയെന്ന സിപിഎമ്മിന്‍റെ ആരോപണങ്ങൾക്കു മറുപടിയുമായി സ്ഥാനാർഥി ഷാഫി പറന്പിൽ. വടകരയിൽ വർഗീയ ധ്രുവീകരണത്തിനു താൻ നിന്നുകൊടുത്തിട്ടില്ലെന്നും അത്തരം ശ്രമങ്ങൾക്കെതിരേ യുഡിഎഫ് ജനകീയ കാന്പയിൻ നടത്തുമെന്നും അദ്ദേഹം കോഴിക്കോട് മാധ്യമ പ്രവർത്തകരോടു പ്രതികരിച്ചു.

എൽഡിഎഫ് കണ്‍വീനർ ഇ.പി. ജയരാജൻ ബിജെപി നേതാവ് പ്രകാശ് ജാവദേക്കറുമായി നടത്തിയ ചർച്ച മറച്ചു വയ്ക്കാനാണു തനിക്കെതിരായ വർഗീയ ആരോപണമെന്നും ഷാഫി ആരോപിച്ചു. എന്തിനാണ് ഇപി ബിജെപി പ്രഭാരിയുമായി ചർച്ച നടത്തിയത്? ഒരു മനുഷ്യക്കുഞ്ഞു പോലും അറിയാതെ നടത്തിയ രഹസ്യ ചർച്ചയാണത്. ആസൂത്രിതമായിരുന്നു ചർച്ച. ഇതിനു കൃത്യമായ ഉത്തരം പറയാതെ എന്‍റെ മേൽ വർഗീയ ചാപ്പ അടിച്ചതുകൊണ്ടു കാര്യമില്ല. ആ ചാപ്പയുടെ പരിപ്പ് ഇനി വേവില്ല. മതത്തെ കൂട്ടുപിടിച്ച് പ്രചാരണം നടത്തില്ലെന്നു ഞാൻ തെരഞ്ഞെടുപ്പിനു മുന്പു തന്നെ പറഞ്ഞതാണ്-ഷാഫി പറഞ്ഞു.

വടകര ജില്ലാ ജയിലിൽ നടക്കുന്നത് ഗുരുതര അനീതിയാണെന്നും ഷാഫി പറന്പിൽ ആരോപിച്ചു. തെരഞ്ഞെടുപ്പുമായി ബന്ധപ്പെട്ട സംഘർഷത്തിൽ ഇടിക്കട്ട കൊണ്ടു കോണ്‍ഗ്രസ് പ്രവർത്തകരെ ആക്രമിച്ചു. അവർക്ക് കൃത്യമായ ചികിത്സ ലഭ്യമാക്കുന്നില്ല. എന്നാൽ ഇതേ വകുപ്പുകൾ പ്രകാരം അറസ്റ്റ് ചെയ്യപ്പെട്ട സിപിഐഎം പ്രവർത്തകനു കൃത്യമായ ചികിത്സ നൽകുന്നുണ്ടെന്നും ഷാഫി പറഞ്ഞു.

വടകര ജയിലിൽ കഴിയുന്ന യുഡിഎഫ് പ്രവർത്തകരെ ഷാഫി പറന്പിൽ ഇന്നലെ സന്ദർശിച്ചു. സിപിഎം സംസ്ഥാന സമിതിയംഗം പി. ജയരാജൻ കഴിഞ്ഞ ദിവസം ഫേസ്ബുക്കിലുടെ ഷാഫി പറന്പിലിനെ കടുത്ത ഭാഷയിൽ വിമർശിച്ചിരുന്നു. അതിനുള്ള മറുപടിയാണ് ഷാഫി ഇന്നലെ നൽകിയത്.

സകല ദുഷിച്ച പ്രവർത്തനങ്ങളും ചെയ്യുകയും എല്ലാ തോന്ന്യാസങ്ങൾക്കും പിന്തുണ നൽകുകയും ചെയ്തിട്ട് തെരഞ്ഞടുപ്പ് കഴിഞ്ഞപ്പോൾ ഞാൻ ഹരിശ്ചന്ദ്രനാണെന്നും പറഞ്ഞു ഇറങ്ങിയിരിക്കുകയാണ് വടകരയിലെ യുഡിഎഫ് സ്ഥാനാർഥി ഷാഫി പറന്പിലെന്നാണ് പി. ജയരാജൻ പറഞ്ഞത്.