വാരാണസിയിൽ 13ന് മോദിയുടെ റോഡ് ഷോ ; 14ന് പത്രിക സമർപ്പിക്കും : Deepika.com National News |

Click here for detailed news of all items

വാരാണസിയിൽ 13ന് മോദിയുടെ റോഡ് ഷോ ; 14ന് പത്രിക സമർപ്പിക്കും

Saturday, May 4, 2024 2:02 AM IST

വാരാണസി: ഉത്തർപ്രദേശിലെ വാരാണസിയിൽനിന്നു മത്സരിക്കുന്ന പ്രധാനമന്ത്രി നരേന്ദ്ര മോദി 14ന് പത്രിക സമർപ്പിക്കും. ഇതിനു മുന്നോടിയായി 13നു മെഗാ റോഡ് ഷോ നടത്തും.

തെരഞ്ഞെടുപ്പിന്‍റെ ഏഴാം ഘട്ടമായ ജൂൺ ഒന്നിനാണു വാരാണസിയിൽ വോട്ടെടുപ്പ്. ഈ അന്തിമഘട്ട തെരഞ്ഞെടുപ്പിനുള്ള പത്രികാസമർപ്പണം ഏഴിന് ആരംഭിക്കും. 14വരെ പത്രിക സമർപ്പിക്കാം.

മുതിർന്ന നേതാവും കോൺഗ്രസ് സംസ്ഥാന അധ്യക്ഷനുമായ അജയ് റായ് ആണ് മണ്ഡലത്തിലെ ഇന്ത്യാ സഖ്യത്തിന്‍റെ സ്ഥാനാർഥി.

2014ലും 2019ലും അജയ് റായ് വാരാണസിയിൽ മോദിക്കെതിരേ മത്സരിച്ചിരുന്നു. 2019ൽ 4,79,505 വോട്ടിന്‍റെ ഭൂരിപക്ഷത്തിനാണ് മോദി വിജയിച്ചത്. മോദിക്ക് 6,74,664 വോട്ട് ലഭിച്ചപ്പോൾ തൊട്ടടുത്ത എതിരാളി സമാജ്‌വാദി പാർട്ടിയിലെ ശാലിനി യാദവിനു ലഭിച്ചത് കേവലം 1,95,159 വോട്ടാണ്.

2014ൽ 3.37 ലക്ഷം വോട്ടിന്‍റെ ഭൂരിപക്ഷത്തിനാണ് മോദി വിജയിച്ചത്. ആം ആദ്മി പാർട്ടി നേതാവ് അരവിന്ദ് കേജരിവാളായിരുന്നു തൊട്ടടുത്ത എതിരാളി. അന്ന് കോൺഗ്രസും സമാജ്‌വാദി പാർട്ടിയും ബിഎസ്പിയും മത്സരരംഗത്തുണ്ടായിരുന്നു.

2014ൽ വാരാണസിക്കു പുറമെ സ്വന്തം സംസ്ഥാനമായ ഗുജറാത്തി‌ലെ വഡോദരയിലും മോദി മത്സരിച്ചിരുന്നു. വഡോദരയിൽ കോൺഗ്രസിലെ മധുസൂദൻ മിസ്ത്രിയായിരുന്നു തൊട്ടടുത്ത എതിരാളി.

5.70 ലക്ഷം വോട്ടിന്‍റെ ഭൂരിപക്ഷത്തിനായിരുന്നു വിജയം. പിന്നീട് വഡോദര സീറ്റ് മോദി ഒഴിയുകയും വാരാണസി നിലനിർത്തുകയുമായിരുന്നു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.