കേജരിവാളിന് ഇടക്കാല ജാമ്യം പരിഗണിക്കാമെന്ന് സുപ്രീംകോടതി : Deepika.com National News |

Click here for detailed news of all items

കേജരിവാളിന് ഇടക്കാല ജാമ്യം പരിഗണിക്കാമെന്ന് സുപ്രീംകോടതി

Saturday, May 4, 2024 2:05 AM IST

ന്യൂഡൽഹി: ലോക്സഭാ തെരഞ്ഞെടുപ്പ് പ്രചാരണത്തിനായി ഡൽഹി മുഖ്യമന്ത്രി അരവിന്ദ് കേജരിവാളിന് ഇടക്കാല ജാമ്യം നൽകുന്നതു പരിഗണിക്കാമെന്ന് സുപ്രീംകോടതി.

ഡൽഹി മദ്യനയക്കേസിലെ ഇഡി അറസ്റ്റ് ചോദ്യം ചെയ്തു കേജരിവാൾ സമർപ്പിച്ച ഹർജിയിലാണ് ജസ്റ്റീസ് സഞ്ജീവ് ഖന്ന, ദീപാങ്കർ ദത്ത എന്നിവരടങ്ങിയ ബെഞ്ച് ഇക്കാര്യം അറിയിച്ചത്. എന്നാൽ, ഇത് അന്തിമ തീരുമാനമല്ലെന്നും വാദം പൂർത്തിയായില്ലെങ്കിൽ ഇക്കാര്യം പരിഗണിക്കാമെന്നും ബെഞ്ച് വ്യക്തമാക്കി. ഹർജി വീണ്ടും ഏഴിന് പരിഗണിക്കും.

യാതൊരു തെളിവുമില്ലാതെയാണ് ഇഡി അറസ്റ്റ് ചെയ്തതെന്നും അറസ്റ്റ് നിയമവിരുദ്ധമാണെന്നും കേജരിവാളിനുവേണ്ടി ഹാജരായ മുതിർന്ന അഭിഭാഷകൻ മനു അഭിഷേക് സിംഗ്വി വ്യക്തമാക്കി. ഇഡി അയച്ച ഒന്പത് സമൻസുകൾക്കും മറുപടി നൽകിയെന്നും ഹാജരാകാൻ കഴിയാത്തത് അറസ്റ്റിനുള്ള മാർഗമല്ലെന്നും സിംഗ്വി ചൂണ്ടിക്കാട്ടി.

എന്നാൽ, കേജരിവാളിന്‍റെ അറസ്റ്റ് പെട്ടെന്ന് അന്വേഷണ ഉദ്യോഗസ്ഥൻ കൈക്കൊണ്ട തീരുമാനമല്ലെന്നും സ്പെഷൽ കോടതി ജഡ്ജിയുടെ അനുമതിയോടെയാണ് അറസ്റ്റ് ചെയ്തതെന്നും ഇഡിക്കുവേണ്ടി ഹാജരായ അഡീഷണൽ സോളിസിറ്റർ ജനറൽ എസ്.വി. രാജു ചൂണ്ടിക്കാട്ടി.

അറസ്റ്റിനെതിരേ ഡൽഹി ഹൈക്കോടതി ഡിവിഷൻ ബെഞ്ചിനെ സമീപിച്ചെങ്കിലും രേഖകൾ പരിശോധിച്ച കോടതി കേസിൽ ഇടപെടാനില്ലെന്നു വ്യക്തമാക്കിയെന്നും എസ്.വി. രാജു കോടതിയിൽ പറഞ്ഞു.

ഡൽഹി മദ്യനയവുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ മാർച്ച് 21നാണ് കേജരിവാളിനെ ഇഡി അറസ്റ്റ് ചെയ്തത്. ഇദ്ദേഹം നിലവിൽ തിഹാർ ജയിലിൽ ജുഡീഷൽ കസ്റ്റഡിയിലാണ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.