വനിതാ ശാക്തീകരണം ലക്ഷ്യമാക്കി കൂടുതൽ കോഴ്സുകൾ ആരംഭിക്കും: വൈസ് ചാൻസലർ
തേഞ്ഞിപ്പലം: കാലിക്കട്ട് സർവകലാശാല ആജീവനാന്ത പഠനവകുപ്പിൽ വനിതാ ശാക്തീകരണം ലക്ഷ്യമാക്കി കൂടുതൽ കോഴ്സുകൾ ആരംഭിക്കുമെന്ന് വൈസ് ചാൻസലർ ഡോ.കെ. മുഹമ്മദ് ബഷീർ. വനിതകൾക്കായി നടത്തിയ ത്രൈമാസ ബ്യൂട്ടികൾച്ചർ തൊഴിൽ പരിശീലന കോഴ്സിന്റെ സമാപന ചടങ്ങിൽ പ്രസംഗിക്കുകയായിരുന്നു അദ്ദേഹം.
ഇതേ വിഷയത്തിൽ ആറു മാസത്തെ അഡ്വാൻസ് ലെവൽ കോഴ്സ് കൂടി നടത്തുന്ന കാര്യം പരിഗണനയിലാണ്. സ്വയം തൊഴിൽ കണ്ടെത്തുന്നതിന് വനിതകൾക്ക് സഹായകമാകുന്ന 25 കോഴ്സുകൾ ലൈഫ്ലോംഗ് ലേണിംഗ് വകുപ്പിൽ അനുവദിച്ചിട്ടുണ്ട്. കോഴ്സ് പൂർത്തിയാക്കുന്നവർക്ക് വിദഗ്ധ തൊഴിൽ പരിചയവും സർവകലാശാലയുടെ സർട്ടിഫിക്കറ്റും ലഭിക്കുന്നു. ചടങ്ങിൽ ലൈഫ്ലോംഗ് ലേണിംഗ് പഠനവകുപ്പ് മേധാവി ഡോ.ഇ.എം. മനോജം അധ്യക്ഷത വഹിച്ചു. പബ്ലിക് റിലേഷൻസ് ഓഫീസർ എം.വി. സക്കറിയ, പഠനവിഭാഗം സെക്ഷൻ ഓഫീസർ കെ. പ്രശാന്ത്, സി.ടി. സജിത്ത്കുമാർ, പരിശീലകരായ എം.കെ. നിഷ, വിജയ തുടങ്ങിയവർ പങ്കെടുത്തു.