ഒപ്ടോമെട്രിയിൽ ഡിപ്ലോമ
ഒപ്ടോമെട്രിയിൽ രണ്ടു വർഷത്തെ ഡിപ്ലോമ കോഴ്സിനു തെലുങ്കാന സർക്കാരിനു കീഴിൽ ഹൈദരാബാദിലുള്ള സരോജനി ദേവി ഐ ഹോസ്പിറ്റൽ അപേക്ഷ ക്ഷണിച്ചു. ബയോളജി/ മാത്തമാറ്റിക്സ് പഠിച്ച് പ്ലസ്ടു പാസായവർക്ക് അപേക്ഷിക്കാം. പ്രായം 2017 നു ജൂലൈ ഒന്നിനു 17 നും 25നും മധ്യേ. ആശുപത്രി സൂപ്രണ്ടിന്റെ പേരിൽ ഹൈദരാബാദിൽ മാറാവുന്ന 100 രൂപയുടെ ഡിഡിയും മേൽവിലാസം എഴുതി അഞ്ചു രൂപയുടെ സ്റ്റാമ്പ് ഓട്ടിച്ച കവറും സഹിതം അപേക്ഷിച്ചാൽ അപേക്ഷാ ഫോം ലഭിക്കും. പൂരിപ്പിച്ച അപേക്ഷകൾ ഓഗസ്റ്റ് 16നകം ലഭിക്കണം.
വിലാസം: സൂപ്രണ്ട്, സരോജിനി ദേവി ഐ ഹോസ്പിറ്റൽ, ഹൈദരാബാദ്.
ഡിപ്ലോമക്കാർക്ക് അപ്രന്റീസ് ട്രെയിനിംഗ്
സംസ്ഥാനത്തെ വിവിധ സർക്കാർ/പൊതുമേഖലാ/സ്വകാര്യ സ്ഥാപനങ്ങളിൽ നിലവിലുള്ള ഒഴിവുകളിലേക്ക് ടെക്നീഷ്യൻ അപ്രന്റീസുകളെ തെരഞ്ഞെടുക്കുന്നതിനായി കേന്ദ്രസർക്കാരിന്റെ കീഴിലുള്ള ചെന്നൈയിലെ ദക്ഷിണമേഖലാ ബോർഡ് ഓഫ് അപ്രന്റിസ്ഷിപ്പ് ട്രെയിനിംഗും സംസ്ഥാന സാങ്കേതിക വിദ്യാഭ്യാസ വകുപ്പിന് കീഴിലുള്ള കളമശേരിയിലെ സൂപ്പർവൈസറി ഡെവലപ്മെന്റ് സെന്ററും സംയുക്തമായി, കളമശേരി ഗവണ്മെന്റ് പോളിടെക്നിക് കോളജിൽ ഓഗസ്റ്റ് 19 ന് വാക്ഇൻഇന്റർവ്യൂ നടത്തും. ഏകദേശം ആയിരം ഒഴിവുകൾ പ്രതീക്ഷിക്കുന്നു.
പോളിടെക്നിക് ഡിപ്ലോമ നേടി മൂന്നു വർഷം കഴിയാത്തവർക്കും അപ്രന്റീസ് ആക്ട് പ്രകാരം പരിശീലനം ലഭിക്കാത്തവർക്കും ഇന്റർവ്യൂവിൽ പങ്കെടുക്കാം. സൂപ്പർവൈസറി ഡെവലപ്മെന്റ് സെന്ററിൽ രജിസ്റ്റർ ചെയ്തവർക്കാണ് ഇന്റർവ്യൂവിന് സൗകര്യം ഒരുക്കിയിട്ടുള്ളത്. 3542 രൂപയാണ് കുറഞ്ഞ പ്രതിമാസ സ്റ്റൈപ്പന്റ്. ട്രെയിനിംഗിന് ശേഷം കേന്ദ്രസർക്കാർ നൽകുന്ന പ്രൊഫഷൻസി സർട്ടിഫിക്കറ്റ് അഖിലേന്ത്യാ തലത്തിൽ തൊഴിൽ പരിചയമായി പരിഗണിച്ചിട്ടുണ്ട്. പരിശീലന കാലത്തെ പ്രാവീണ്യം കണക്കിലെടുത്ത് പല സ്ഥാപനങ്ങളും സ്ഥിരം ജോലിക്കും അവസരമൊരുക്കുന്നുണ്ട്.
സർട്ടിഫിക്കറ്റുകളുടെയും മാർക്ക്ലിസ്റ്റുകളുടെയും അസലും മൂന്നു പകർപ്പുകളും വിശദമായ ബയോഡാറ്റയുടെ മൂന്നു പകർപ്പുകളും സഹിതം ഓഗസ്റ്റ് 19 ന് രാവിലെ ഒന്പതിന് തെരഞ്ഞെടുപ്പ് കേന്ദ്രത്തിലെത്തണം. സൂപ്പർവൈസറി ഡെവലപ്മെന്റ് സെന്ററിൽ ഇതുവരെ രജിസ്റ്റർ ചെയ്യാത്തവർ ഇന്റർവ്യൂ തീയതിക്കു മുമ്പ് രജിസ്റ്റർ ചെയ്യണം. അപേക്ഷാ ഫോമും രജിസ്റ്റർ ചെയ്യുന്നതിനുള്ള മാർഗനിർദേശങ്ങളും www.sdcentre.org ൽ ലഭ്യമാണ്.
രജിസ്റ്റർ ചെയ്യുന്നതിന് അപേക്ഷകർ നേരിട്ടു വരേണ്ടതില്ല. തപാലിൽ അയയ്ക്കുകയോ അപേക്ഷകരോ അധ്യാപകരോ മുൻകൈയെടുത്ത് അപേക്ഷകൾ ശേഖരിച്ച് നേരിട്ട് എസ്ഡി സെന്ററിൽ എത്തിക്കുകയോ ചെയ്യണം. ഇന്റർവ്യൂ നടക്കുന്ന ദിവസം രജിസ്ട്രേഷൻ ഉണ്ടായിരിക്കില്ല. എസ്ഡി സെന്റർ നൽകുന്ന രജിസ്ട്രേഷൻ കാർഡോ ഇമെയിൽ പ്രിന്റോ ഇന്റർവ്യൂവിന് വരുന്പോൾ നിർബന്ധമായും ഹാജരാക്കണം
പങ്കെടുക്കുന്ന കമ്പനികളുടേയും ഒഴിവുകളുടേയും വിവരങ്ങൾ www.sdcentre.org യിൽ പ്രസിദ്ധീകരിക്കും.