എപ്രിൽ മുതൽ എംജിയിൽ പേപ്പർ രഹിത ഭരണസംവിധാനം
കോട്ടയം: എംജി യൂണിവേഴ്സിറ്റി ഏപ്രിൽ മുതൽ ഫയൽ നടപടികൾ ഡിജിറ്റൽ സംവിധാനത്തിലേക്ക് മാറ്റി കടലാസ് രഹിത ഭരണസംവിധാനം നിലവിൽ വരും. ഇഗവേണൻസ് നടപ്പാക്കുന്നതിന്റെ ഭാഗമായി കേരളത്തിലെ എല്ലാ സർവകലാശാലകളും ഭരണനടപടികൾ കംപ്യൂട്ടർവത്കരിക്കുന്നതിനോടനുബന്ധിച്ചാണിത്. ഡിജിറ്റൽ ഡേറ്റാ ഫയൽ സിസ്റ്റം (ഡിഡിഎഫ്എസ്) എന്ന സോഫ്റ്റ്വെയർ സംവിധാനമാണ് ഈ പദ്ധതിയ്ക്കായി ഉപയോഗിക്കുന്നത്. ഇത് നിലവിൽ വരുന്നതോടെ ഭരണ സംവിധാനത്തിന്റെ ഭാഗമായുളള ഫയൽ നടപടികൾ കംപ്യൂട്ടറധിഷ്ടിതമാകുകയും ഭരണ നടപടികൾ സുതാര്യവും കാര്യക്ഷമവും അതിവേഗതയുളളതുമായി മാറും. സർവകലാശാലകളിൽ ഇഗവേർണൻസ് നടപ്പാക്കുന്നതോടെ, വിവിധ തട്ടുകളിൽ ഫയൽ നീക്കം നിരീക്ഷിക്കുന്നതിനും തീരുമാനങ്ങൾ സമയബന്ധിതമായി നടപ്പാക്കുന്നതിനും സാധിക്കും.
കേരളത്തിലെ സർവകലാശാലകളിൽ ഇഗവേർണൻസ് പദ്ധതി നടപ്പാക്കുന്നതിനുളള സാങ്കേതിക സംവിധാനങ്ങൾ ഒരുക്കുന്നതിനായി കെൽട്രോണിനെ ചുമതലപ്പെടുത്തുകയും മ വൈസ് ചാൻസലർ ഡോ. ബാബു സെബാസ്റ്റ്യൻ ചെയർമാനായുളള കമ്മിറ്റി രൂപീകരിക്കുകയും ചെയ്ത് സർക്കാർ ഉത്തരവിറക്കിയിരുന്നു.
സർവകലാശാലയിൽ ഇപ്പോൾ പരീക്ഷാ ചോദ്യപേപ്പറുകളുടെ വിതരണം, വിദ്യാർഥികളുടെ വിവിധ ഫീസുകൾ, അധ്യാപകരുടെയും ജീവനക്കാരുടെയും പ്രോവിഡന്റ് ഫണ്ട് അക്കൗണ്ടുകൾ, ശന്പള വിതരണം തുടങ്ങിയവ ഓണ് ലൈൻ സംവിധാനത്തിലൂടെയാണ് നിർവഹിക്കപ്പെടുന്നത്.
ഇഗവേർണൻസ് നടപ്പാക്കുന്നതിനായി 540 കംപ്യൂട്ടറുകൾ നെറ്റ് വർക്കിംഗ് നടത്തി വിന്യസിക്കുന്ന പ്രവ്യത്തികൾ 31നകം പൂർത്തിയാക്കും.
ഇഗവേർണൻസ് നടപ്പാക്കുന്നതിനോടനുബന്ധിച്ച്. ജീവനക്കാർക്ക് 15 ദിവസത്തെ പരിശീലന പരിപാടിയും രജിസ്ട്രാറുടെ നേത്യത്വത്തിൽ നടപ്പിലാക്കും. മേയ് ഒന്നു മുതൽ സന്പൂർണമായും ഇഗവേണൻസ് നടപ്പിലാക്കുന്ന കേരളത്തിലെ ആദ്യ സർവകലാശാലയായി മഹാത്മാഗാന്ധി സർവകലാശാല മാറും. 31നകം കാന്പസ് വൈഫൈ, ഇക്ലാസ് റൂം എന്നിവ 14 പഠനവകുപ്പുകളിലും നിലവിൽ വരും. 400 കി വാട്ട് സൗരോർജ പ്ലാന്റ് പദ്ധതിയും പൂർത്തിയാക്കുന്നതിനു വൈസ് ചാൻസലർ ഡോ. ബാബുസെബാസ്റ്റ്യൻ, പ്രൊ വൈസ്ചാൻസലർ പ്രഫ. സാബു തോമസ്, സിൻഡിക്കേറ്റിന്റെ പ്ലാനിംഗിനും ഡവലപ്മെന്റിനുമായുളള സമിതി കണ്വീനർ ഡോ. കെ.ക്യഷ്ണദാസ്, ധനകാര്യ ഉപസമിതി കണ്വീനർ ഡോ. കെ. ഷെറഫുദ്ദീൻ എന്നിവർ പങ്കെടുത്ത യോഗത്തിൽ തീരുമാനിച്ചു.
പരീക്ഷാ ഫലം
2017 ഒക്ടോബർ മാസം സ്കൂൾ ഓഫ് പെഡഗോഗിക്കൽ സയൻസസിൽ നടത്തിയ നാലാം സെമസ്റ്റർ എം.എഡ് (ദ്വിവത്സരം) പരീക്ഷയുടെ ഫലം പ്രസിദ്ധപ്പെടുത്തി.
സിൻഡിക്കറ്റ് യോഗം
സർലകലാശാല സിൻഡിക്കറ്റ് യോഗം ് 24നു രാവിലെ 10.30ന് സിൻഡിക്കറ്റ് ഹാളിൽ് നടത്തും.
എറുഡൈറ്റ് പ്രഭാഷണം
നാനോസയൻസ് പഠന കേന്ദ്രം, സംസ്ഥാന ഉന്നത വിദ്യാഭ്യാസ കൗണ്സിൽ എന്നിവയുടെ സംയുക്ത ആഭിമുഖ്യത്തിൽ, ഫ്രാൻസിലെ റാപ്സോഡി റിസർച്ച് ലബോട്ടറി ഡയറക്ടറും പ്രശസ്ത മെറ്റീരിയൽ സയൻസ് ശാസ്ത്രജ്ഞനുമായ പ്രഫ. ആൻഗേനെഗാഷി എറുഡൈറ്റ് പ്രഭാഷണങ്ങൾ നടത്തും. റീ സൈക്ലിംഗിലെ നൂതന പ്രവണതകൾ, ബയോചാർ ഉല്പാദനം, കന്പോസ്റ്റ് നിർമാണം, തുടങ്ങിയ വിഷയങ്ങളിലാണ് പ്രഭാഷണം. സ്കൂൾ ഓഫ് കെമിക്കൽ സയൻസ് സെമിനാർ ഹാളിൽ നാളെ വരെ ഉച്ചകഴിഞ്ഞ് മൂന്നു മുതൽ അഞ്ചു വരെയാണ് പ്രഭാഷണം.