എംജിക്ക് 50 കോടിയുടെ റൂസ പദ്ധതി സഹായം
കോട്ടയം: കേന്ദ്ര മാനവശേഷി വികസന മന്ത്രാലയം രണ്ടാംഘട്ട റൂസ പദ്ധതി ഗ്രാന്റായി എംജി സർവകലാശാലയ്ക്ക് 50 കോടി രൂപ അനുവദിച്ചു. നാക് അക്രഡിറ്റേഷനിൽ ലഭിച്ച ഉന്നതഗ്രേഡിന്റെയും എൻഐആർഎഫിൽ ലഭിച്ച ഉയർന്ന റാങ്കിന്േറയും അടിസ്ഥാനത്തിലാണ് കേന്ദ്രമാനവശേഷി വികസന മന്ത്രാലയം എംജി യൂണിവേഴ്സിറ്റിക്ക് ഈ പ്രത്യേക പദ്ധതി സഹായം അനുവദിച്ചത്. സർവകലാശാലയുടെ ഗവേഷണ, വികസന പദ്ധതികൾക്ക് ഈ തുക പ്രയോജനപ്പെടുത്തും. അടിസ്ഥാന സൗകര്യ വികസനം, ലബോറട്ടറി ഉപകരണങ്ങൾ, പ്രായോഗിക സാങ്കേതിക വിഷയങ്ങളിൽ ഹ്രസ്വകാല കോഴ്സുകൾ, കാന്പസ് പരിപാലനം തുടങ്ങിയ മേഖലകളിൽ സർവകലാശാല സമർപ്പിച്ച വിവിധ പദ്ധതികളുടെ അടിസ്ഥാനത്തിലാണ് ഈ റൂസ സഹായം അനുവദിച്ചിരിക്കുന്നത്. അടിസ്ഥാന വികസന മേഖലയിൽ, സൗരോർജ കാന്പസ് പദ്ധതിയിൽ ഏഴു കോടി രൂപ മുതൽ മുടക്കുള്ള സോളാർ പവർ പ്ലാന്റ്, 50 ലക്ഷം മുതൽ മുടക്കിൽ മഴവെള്ള സംഭരണ ടാങ്കുകൾ, ജൈവ വൈദ്യുതി ഉല്പാദനത്തിനുള്ള ഒരു കോടിയുടെ കേന്ദ്രീകൃത ബയോഗ്യാസ് പ്ലാന്റ്, ഇന്റർനെറ്റ് വിന്യാസത്തിനുള്ള 5.5 കോടിയുടെ പദ്ധതി, ഒരു കോടിയുടെ ആധുനിക റെക്കോർഡ് റൂം, ക്ലാസ്മുറികളുടെ സാങ്കേതിക നവികരണത്തിന് ഒരു കോടി, വൈഫൈ കാന്പസ് രണ്ടാംഘട്ടത്തിന് ഒരു കോടി, 3.5 കോടിയുടെ പ്രാദേശിക കൾച്ചറൽ മ്യൂസിയം, പഠനവകുപ്പുകളിൽ പഠനമൂല്യനിർണയ പ്രക്രിയകൾക്കായി ആധുനിക സാങ്കേതിക സംവിധാനങ്ങൾ, ഇകണ്ടന്റ്, റെക്കോർഡിംഗ് സ്റ്റുഡിയോ തുടങ്ങിയ അടിസ്ഥാന വികസനപദ്ധതികൾക്കായി 23 കോടി രൂപയുടെ വികസന പദ്ധതികളാണ് സർവകലാശാല നടപ്പാക്കുന്നത്. ജൈവ സർട്ടിഫിക്കേഷൻ ലബോറട്ടറി, നാനോ ബയോലാബ് ഉപകരണങ്ങൾ, പ്ലാസ്മ റിസർച്ച് ലാബ് ഉപകരണങ്ങൾ, നെറ്റ്വർക്ക് സെക്യൂരിറ്റി സിസ്റ്റംസ് എന്നിവയ്ക്കായി എട്ടു കോടി രൂപയുടെ ആർട്ടിഫിഷ്യൽ ഇന്റലിജൻസ്, ഇന്റർനെറ്റ് ഓഫ് തിങ്സ്, റോബോട്ടിക്സ്, ഫുഡ് ടെക്നോളജി, സിസ്റ്റം ബയോളജി, ഹരിതസാങ്കേതികവിദ്യ തുടങ്ങിയ വിഷയങ്ങളിൽ ഹ്രസ്വകാല കോഴ്സുകൾ ആരംഭിക്കുന്നതിനായി എട്ടു കോടി രൂപയുടെയും പദ്ധതികൾ സർവകലാശാല ഏറ്റെടുക്കും.
ഇന്റർനാഷണൽ അക്കാദമിക് കണ്വെൻഷൻ സെന്റർ, ഹോസ്റ്റലുകൾ, സെമിനാർ ഹാളുകൾ, അസംബ്ലി ഹാൾ എന്നിവയുടെ നവീകരണം, കണ്വർജന്റ് അക്കാദമിക് കോംപ്ലക്സ് എന്നിവയ്ക്കായി 11 കോടി രൂപയും, രണ്ടാംഘട്ട റൂസ പദ്ധതിയിൽ പൂർത്തിയാക്കുമെന്ന് വൈസ് ചാൻസലർ ഡോ. ബാബു സെബാസ്റ്റ്യൻ അറിയിച്ചു.
ബിടെക്, ബിആർക് മൂല്യനിർണയം
കഴിഞ്ഞ ഒന്പതിന് ആരംഭിച്ച ബിടെക്, ബിവോക് പരീക്ഷകളുടെ മൂല്യനിർണയ പ്രക്രിയകൾ വേഗത്തിലാക്കുന്നതിനുവേണ്ടി കോളജുകൾ ഉത്തരക്കടലാസുകൾ സിൽവർ ജൂബിലി പരീക്ഷാഭവൻ അനക്സ് കെട്ടിടത്തിൽ എത്തിക്കണം. അവസാന ഘട്ടം ഉത്തരക്കടലാസുകൾ ജൂണ് ആറിന് എത്തിക്കണം.