ആരോഗ്യ സർവകലാശാല ബിരുദദാന ചടങ്ങ് 28 ന്
തൃശൂർ: കേരള ആരോഗ്യശാസ്ത്ര സർവകലാശാലയുടെ 13ാമത് ബിരുദദാന ചടങ്ങ് 28നു രാവിലെ 11നു വീഡിയോ കോൺഫറൻസ് (വെർച്വൽ) ആയി നടത്തും. സർവകലാശാലാ ചാൻസലറും കേരള ഗവർണറുമായ ആരിഫ് മുഹമ്മദ് ഖാൻ ബിരുദദാന പ്രസംഗം നിർവഹിക്കും. ആരോഗ്യമന്ത്രി കെ.കെ. ശൈലജ ടീച്ചർ പങ്കെടുക്കും. വൈസ് ചാൻസലർ പ്രഫ. ഡോ. മോഹനൻ കുന്നുമ്മൽ ബിരുദദാനം നിർവഹിക്കും.
സർവകലാശാലയ്ക്കു കീഴിലുള്ള സർക്കാർ/എയ്ഡഡ്/സ്വാശ്രയ മേഖലയിലെ കോളജുകളിൽനിന്നായി മെഡിസിനിൽ 3,986, ഡെന്റല് സയൻസസിൽ 1,485, ആയുര്വേദത്തില് 570, ഹോമിയോപ്പതിയിൽ 221, സിദ്ധയിൽ 24, നഴ്സിംഗിൽ 884, ഫാർമസിയിൽ 670, അലൈഡ് ഹെൽത്ത് സയൻസസിൽ 646 എന്ന ക്രമത്തിൽ ആകെ 8,486 വിദ്യാർഥികൾക്കാണ് ബിരുദം നല്കുന്നത്. ഇവരിൽ ബിരുദാനന്തര ബിരുദം/ബിരുദാനന്തര ഡിപ്ലോമ/മെഡിക്കല് സൂപ്പര് സ്പെഷാലിറ്റി നേടിയവര് 2150 പേരാണുള്ളത്.
വിവിധ കോഴ്സുകളിൽ ഒന്നാം റാങ്ക് നേടിയവർ:
മെഡിസിൻ മിഥുൻ അനിൽകുമാർ (എംബിബിഎസ് പത്തനംതിട്ട മൗണ്ട് സിയോൺ മെഡിക്കല് കോളജ് ), ഡെന്റിസ്ട്രി ഭാരതി ബാലൻ (ബിഡിഎസ് തിരുവനന്തപുരം പിഎംഎസ് കോളജ് ഓഫ് ഡെന്റൽ സയൻസസ് ആൻഡ് റിസർച്ച്), സിദ്ധ ആര്യ രവീന്ദ്രൻ (ബിഎസ്എംഎസ് ശാന്തിഗിരി സിദ്ധ മെഡിക്കൽ കോളജ്), ആയുർവേദം കെ.വി ജയറാം (ബിഎഎംഎസ് കോട്ടക്കൽ വൈദ്യരത്നം പി.എസ്. വാരിയർ ആയുർവേദ കോളജ്), ഹോമിയോപ്പതി ബി. ആൻഷ (ബിഎച്ച്എംഎസ് എറണാകുളം ഡോ. പടിയാർ മെമ്മോറിയൽ ഹോമിയോപ്പതിക് മെഡിക്കൽ കോളജ്).
നഴ്സിംഗ് എൻ. നൗഫിയ (ബിഎസ്സി നഴ്സിംഗ് കൊട്ടാരക്കര വിജയ കോളജ് ഓഫ് നഴ്സിംഗ്), പി.എൻ. ആര്യ (പോസ്റ്റ് ബേസിക് ബിഎസ്സി നഴ്സിംഗ് തിരുവനന്തപുരം കോ ഓപ്പറേറ്റീവ് കോളജ് ഓഫ് നഴ്സിംഗ്).
അലൈഡ് ഹെൽത്ത് സയൻസ് അഷ്ന അഗസ്റ്റിൻ (ബിസിവിടി കൊച്ചി മെഡിക്കൽ ട്രസ്റ്റ് ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ്), ബ്ലെസി കെ.ബാബു (ബിപിടി തിരുവനന്തപുരം ബഥനി നവജീവൻ കോളജ് ഓഫ് ഫിസിയോതെറാപ്പി), ഷെറിൻ ജോയ് (ബിഎഎസ്എൽപി ഷൊർണൂർ ഇൻസ്റ്റിറ്റ്യൂട്ട് ഓഫ് കമ്യൂണിക്കേറ്റീവ് ആൻഡ് കോഗ്നിറ്റീവ് ന്യൂറോ സയൻസസ്), ട്രിൻസി സെബാസ്റ്റ്യൻ (ബിഎസ്സിഎംആർടി തലശേരി മലബാർ കാൻസർ സെന്റർ), എം.ആർ. ജയശ്രീ (ബിസിവിടി കോട്ടയം ഗവ. മെഡിക്കൽ കോളജ്), എസ്. ആതിര (ബിഎസ്സി ഒപ്റ്റോമെട്രി അങ്കമാലി ലിറ്റില് ഫ്ലവർ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസ് ആൻഡ് റിസർച്ച് സെന്റർ), ഐശ്വര്യ ലാൽ (ബിഎസ്സി മെഡിക്കൽ മൈക്രോബയോളജി കോ ഓപ്പറേറ്റീവ് ഇൻസ്റ്റിറ്റ്യൂട്ട് ഓഫ് ഹെൽത്ത് സയൻസസ്), കോ ഓപ്പറേറ്റീവ് ഇൻസ്റ്റിറ്റ്യൂട്ട് ഓഫ് ഹെൽത്ത് സയൻസസിലെ എ.ടി. ടോംസി (ബിഎസ്സി മെഡിക്കൽ ബയോ കെമിസ്ട്രി), പി. മസ്റൂറ (ബിഎസ്സിഎംഎൽടി കണ്ണൂർ ഇൻസ്റ്റിറ്റ്യൂട്ട് ഓഫ് പാരാമെഡിക്കൽ സയൻസസ്), പി. മേഘ (ബിഫാം എംവിആർ ആയുർവേദ മെഡിക്കൽ കോളജ്).
ഡോ. സി.കെ. ജയറാം പണിക്കർ എൻഡോവ്മെന്റ് അവാർഡ്
തൃശൂർ: സെക്കൻഡ് എംബിബിഎസ് പരീക്ഷയിൽ മൈക്രോബയോളജി വിഷയത്തിന് ഏറ്റവും ഉയർന്ന മാർക്ക് ലഭിക്കുന്ന വിദ്യാർത്ഥിക്കു നൽകിവരുന്ന ഡോ. സി.കെ. ജയറാം പണിക്കർ എൻഡോവ്മെന്റ് അവാർഡ് പാലക്കാട് പി.കെ. ദാസ് ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസിലെ റോസ് ക്രിസ്റ്റി ജോസിക്കു സമ്മാനിക്കും.