കെഎസ്ആർടിസി പ്രഫഷണൽ ഗാനമേള ട്രൂപ്പ് വരുന്നു : Deepika.com Kerala News |

Click here for detailed news of all items

കെഎസ്ആർടിസി പ്രഫഷണൽ ഗാനമേള ട്രൂപ്പ് വരുന്നു

Wednesday, September 17, 2025 1:36 AM IST

ചാത്തന്നൂർ: കെഎസ്ആർടിസി പ്രഫഷണൽ ഗാനമേള ട്രൂപ്പ് രുപവത്കരിക്കുന്നതിനുള്ള നടപടികൾ ആരംഭിച്ചു. ജീവനക്കാരെയും അവരുടെ കുടുംബാംഗങ്ങളെയും ഉൾപ്പെടുത്തിയായിരിക്കും ഗാനമേള ട്രൂപ്പ്. കലാപ്രതിഭകൾക്ക് അവസരവും ആദരവും അതിലൂടെ വരുമാനവും നേടിയെടുക്കുകയാണ് ലക്ഷ്യം.

കന്നിമാസം കഴിഞ്ഞാൽ ക്ഷേത്രോത്സവങ്ങളുടെ സീസൺ തുടങ്ങുകയാണ്. കെഎസ്ആർടിസിയുടെ ഗാനമേള ട്രൂപ്പിനു ജനങ്ങളിൽനിന്നും സ്വീകാര്യത കിട്ടുമെന്ന പ്രതീക്ഷയാണുള്ളത്. മറ്റ് ഗാനമേള ട്രൂപ്പുകളേക്കാൾ നിരക്ക് വ്യത്യാസവും ഉണ്ടാകും.

മന്ത്രി കെ.ബി. ഗണേഷ്കുമാർ പങ്കെടുത്ത നിരവധി വേദികളിൽ ജീവനക്കാരും കുടുംബാംഗങ്ങളും മികച്ച രീതിയിൽ കലാപരിപാടികൾ അവതരിപ്പിച്ചിട്ടുണ്ട്. സിനിമാ താരംകൂടിയായ മന്ത്രി കെഎസ്ആർടിസിയിൽ കലാ സാംസ്കാരിക സംഘടന രൂപീകരിക്കുമെന്ന് നേരത്തേ പറഞ്ഞിരുന്നു. മന്ത്രിയുടെ നേരിട്ടുള്ള നിർദേശത്തിന്‍റെ അടിസ്ഥാനത്തിലാണ് സിഎംഡി പ്രമോജ് ശങ്കർ ഇപ്പോൾ ജീവനക്കാരിൽനിന്ന് എൻട്രികൾ സ്വീകരിക്കാൻ നടപടി എടുത്തത്.

വർഷങ്ങൾക്ക് മുമ്പ് കെഎസ്ആർടിസിയിൽ കലാ സാംസ്കാരിക സംഘടനയും മികച്ച ഫുട്ബോൾ, വോളിബോൾ ടീമുകളുമുണ്ടായിരുന്നു. ഈ വർഷം കെഎസ്ആർടിസി ജീവനക്കാർ സംസ്ഥാനാടിസ്ഥാനത്തിൽ ക്രിക്കറ്റ് ടൂർണമെന്‍റ് സംഘടിപ്പിച്ചിരുന്നു.

ജീവനക്കാരെയും കുടുംബാംഗങ്ങളെയും ഉൾപ്പെടുത്തുന്ന ഗാനമേള ട്രൂപ്പിലേക്ക് 29നകം എൻട്രികൾ അയയ്ക്കണം. പാട്ടിലും സംഗീതോപകരണങ്ങൾ പ്രവർത്തിപ്പിക്കുന്നതിലുമുള്ള പ്രാഗത്ഭ്യം തെളിയിക്കുന്നതിന് മൂന്നു മുതൽ അഞ്ച് മിനിറ്റ് വരെ ദൈർഘ്യമുള്ള വീഡിയോയും മുമ്പ് മികച്ച പ്രകടനത്തിനു സർട്ടിഫിക്കറ്റുകൾ ലഭിച്ചിട്ടുണ്ടെങ്കിൽ അതും അപേക്ഷയോടൊപ്പം ഹാജരാക്കണം.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.