മമ്മൂക്ക‌‌യെ ലാലേട്ടൻ ഉമ്മ വയ്ക്കുന്ന സീൻ എങ്ങനെയെടുത്തു? ജോഷി സാർ തന്ന ഉത്തരം; അൽഫോൻസ് പറയുന്നു : Cinema News

സംവിധായകൻ ജോഷിയുമൊത്തുള്ള ഒരു സംഭാഷണത്തിന്‍റെ ഭാഗം പങ്കുവച്ച് അൽഫോൻസ് പുത്രൻ.

പ്രേമം ഇറങ്ങിയതിന് ശേഷം ഒരാൾ മാത്രമാണ് തന്നോട് സിനിമയുടെ മേക്കിംഗിനെക്കുറിച്ച് ചോദിച്ചതെന്നും അത് ഏറ്റവും സന്തോഷം നൽകിയ കാര്യമായിരുന്നുവെന്നും അൽഫോൻസ് പറയുന്നു.

അദ്ദേഹത്തോട് തന്‍റെ സംശയങ്ങൾ തിരിച്ചുചോദിച്ചെന്നും മനോഹരമായ ഉത്തരമാണ് ജോഷി നൽകിയതെന്നും അൽഫോൻസ് പറയുന്നു.

നമ്പർ 20 മദ്രാസ് മെയ്‍ൽ സിനിമയിലെ മനോഹര രംഗമായ മമ്മൂട്ടിയെ മോഹൻലാൽ ഉമ്മ വയ്ക്കുന്ന സീൻ എങ്ങനെയാണ് എടുത്തതെന്നായിരുന്നു അൽഫോൻസിന്‍റെ സംശയം.

മോഹൻലാലിന്‍റെ ചിന്തയിൽ വന്നൊരു സീന്‍ ആയിരുന്നു അതെന്നും തനിക്കും അത് ഇഷ്ടപ്പെട്ടതുകൊണ്ട് സിനിമയില്‍ ഉൾപ്പെടുത്തുകയായിരുന്നുവെന്നും ജോഷി പറയുന്നു.

അൽഫോൻസ് പുത്രന്‍റെ കുറിപ്പ്

ബാക് ടൂ 2015 …

പ്രേമം റിലീസിന് ശേഷം ജോഷി സാർ പ്രേമം മേക്കിംഗിനെക്കുറിച്ച് ചോദിച്ചപ്പോൾ എനിക്ക് സന്തോഷമായി.

ജോഷി സർ: മോൻ എങ്ങനാ ആണ് മൂന്ന് കാലഘട്ടവും ഷൂട്ട് ചെയ്തത് ?

ഞാൻ: സർ മൂന്നും ഒരോ കാലഘട്ടത്തിന്‍റെ സ്റ്റൈലിൽ ഷൂട്ട് ചെയ്തു

ജോഷി സർ: ആ ഡിഫറന്‍റ് ട്രീറ്റ്മെന്‍റ് ആണ് അതിന്‍റെ അഴക്.

ഞാൻ: താങ്ക് യു സർ. സർ എങ്ങനയാണ് നമ്പർ 20 മദ്രാസ് മെയിലിൽ ലാലേട്ടൻ മമ്മൂക്കേനെ ഉമ്മ വയ്ക്കണ സീൻ എടുത്തത് ?

ജോഷി സർ: അത് മോഹൻലാൽ ഇട്ട ഇംപ്രൊവൈസേഷൻ ആണ്. ഞാൻ അപ്പ്രൂവ് ചെയ്തു. ഞാൻ കൂടുതലും നൈസർഗികമായി വർക്ക് ചെയ്യുന്ന ആളാണ്. എനിക്ക് ലൊക്കേഷൻ വർക്ക് ആവണം, ഇല്ലെങ്കിൽ ആർട്ടിസ്റ്റിന്‍റെ പെർഫോമൻസ് എക്സൈറ്റ് ചെയ്യിക്കണം.

ഞാൻ: സാർ അടുത്ത ചോദ്യം. രണ്ട് സിനിമയിലാണ് ഞാൻ തിലകൻ സർ ഡോമിനേറ്റ് ചെയ്യാത്ത പടങ്ങൾ കണ്ടിട്ടുള്ളൂ. അത് ഒന്ന് ഗോഡ്ഫാദറും പിന്നെ നാടുവാഴികളും.

ജോഷി സാർ: ചിരിച്ചുകൊണ്ട്… മൂപ്പര് അനന്തന്‍റെ റോൾ ചോദിച്ചു. പക്ഷേ എനിക്കെന്തോ ആ റോൾ മധു സർ തന്നെ ചെയ്യണം എന്ന് തോന്നി.

അപ്പോഴേക്കും പരിപാടിയുടെ വേദി എത്തി. സാറും ഞാനും എന്‍റെ അമ്മായിച്ചൻ ആൽവിൻ ആന്‍റണിയും കാറിൽ നിന്ന് ഇറങ്ങി.

ജോഷി സർ : സീ യു മോനെ.

ഞാൻ: താങ്ക് യു സർ. സർ മാത്രമാണ് ഇന്ത്യൻ ഫിലിം ഇൻഡസ്ട്രിയിൽ ഈ സിനിമയുടെ മേക്കിംഗ് ചോദിച്ചത്. നന്ദി സർ. അന്നും ഇന്നും നന്ദി സർ.