ദോഹ: കേരള മദ്റസ എജുക്കേഷൻ ബോർഡ് (കെഎംഇബി) നടത്തിയ ഏഴാം ക്ലാസ് പൊതുപരീക്ഷയില്‍ ഖത്തറിലെ അല്‍ മദ്റസ അല്‍ ഇസ്‌ലാമിയ സ്ഥാപനങ്ങൾ മികച്ച വിജയം കൈവരിച്ചു.
വക്റ ശാന്തിനികേതൻ മദ്‌റസയിലെ ഉനൈസ് അനസ് 540-ൽ 539 മാർക്ക് നേടി ഒന്നാം റാങ്ക് കരസ്ഥമാക്കി. അൽഖോർ അൽ മദ്റസ അൽ ഇസ്‌ലാമിയയിലെ അമൽ ഫാതിമ മുജീബ് 537 മാർക്ക് നേടി മൂന്നാം റാങ്ക് നേടി.
വക്റ ശാന്തിനികേതൻ മദ്‌റസയിലെ തന്നെ വിദ്യാർഥികളായ നാജിഹ് ജവാദ് (536) നാലാം റാങ്ക്, മുഹമ്മദ് നസാൻ അൻവർ (535) അഞ്ചാം റാങ്ക്, സഹ്‌റാൻ അബീബ്‌ (534) ആറാം റാങ്ക്, 532 മാർക്ക് വീതം നേടി ലംഹ ലുഖ്‌മാൻ, സെബ ഖദീജ ഷാനിദ് എന്നിവർ എട്ടാം റാങ്കും നേടി.
ദോഹ മദ്‌റസയിലെ ഷസ്‍ഫ ഷുഹൈബ്, സെൻഫ ഹാഷിം എന്നിവർ 531 മാർക്ക് വീതം നേടി ഒൻപതാം റാങ്ക് പങ്കുവച്ചപ്പോൾ 530 മാർക്ക് നേടി ദോഹ മദ്‌റസയിലെ നിയ നിലോഫർ, സ്കോളേഴ്സ് മദ്‌റസയിലെ സൈറ മറിയം എന്നിവർ പത്താം റാങ്കും നേടി. നാല് മദ്റസകളിലായി ആകെ 207 വിദ്യാർഥികളാണ് പൊതുപരീക്ഷ എഴുതിയത്.
ആകെ 88 വിദ്യാർഥികൾ പരീക്ഷയെഴുതിയ അൽ മദ്റസ അൽ ഇസ്‌ലാമിയ ശാന്തിനികേതൻ വക്റ 100 ശതമാനം വിജയം രേഖപ്പെടുത്തി. എട്ട് വിദ്യാർഥികൾ ഫുൾ എ പ്ലസും 40 വിദ്യാർഥികൾ എ പ്ലസ് ഗ്രേഡും 33 പേർ എ ഗ്രേഡും നേടി.
84 വിദ്യാർഥികൾ പരീക്ഷയെഴുതിയ അൽ മദ്റസ അൽ ഇസ്‌ലാമിയ ദോഹ അഞ്ച് ഫുൾ എ പ്ലസും 11 എ പ്ലസ് ഗ്രേഡും 27 എ ഗ്രേഡും നേടി 100 ശതമാനം വിജയം രേഖപ്പെടുത്തി. 24 വിദ്യാർഥികൾ പരീക്ഷയെഴുതിയ അൽ മദ്റസ അൽ ഇസ്‌ലാമിയ സ്കോളേഴ്സ്, 11 വിദ്യാർഥികൾ പരീക്ഷയെഴുതിയ അൽ മദ്റസ അൽ ഇസ്‌ലാമിയ അൽഖോറും 100 ശതമാനം വിജയം കൈവരിച്ചു.
കേരളത്തിന് പുറമെ മറ്റ് സംസ്ഥാനങ്ങളിൽ നിന്നും ഗൾഫ് നാടുകളിൽ നിന്നുമായി ഏഴായിരത്തോളം വിദ്യാർഥികൾ പരീക്ഷ എഴുതിയതിൽ ഏറ്റവും കൂടുതല്‍ റാങ്കുകളും എ പ്ലസും എ ഗ്രേഡും നേടിയ സ്ഥാപനമെന്ന ബഹുമതി വക്റ ശാന്തിനികേതൻ മദ്‌റസയ്ക്ക് ലഭിച്ചു.
മികച്ച വിജയം നേടിയ വിദ്യാര്‍ഥികളെയും നേതൃത്വം നൽകിയ അധ്യാപകരെയും രക്ഷിതാക്കളെയും സെന്‍റർ ഫോർ ഇന്ത്യൻ കമ്യൂണിറ്റി ഖത്തർ പ്രസിഡന്‍റ് കാസിം ടി.കെ, വിദ്യാഭ്യാസ വിഭാഗം തലവൻ കെ.സി.അബ്ദുൽ ലത്തീഫ്, സെക്രട്ടറി മുഈനുദ്ധീൻ, മദ്റസ പ്രിൻസിപ്പൽമാരായ ഡോ. അബ്ദുൽ വാസിഹ്, എം.ടി. ആദം, കെ.എൻ. മുജീബ് റഹ്മാൻ വിവിധ മദ്റസ മാനേജ്മെന്‍റ് കമ്മിറ്റി പ്രസിഡന്‍റുമാരായ റഷീദ് അഹ്മദ്, ബിലാൽ ഹരിപ്പാട്, ഹാരിസ്.കെ, ഹാരിസ് അൽ ഖോർ തുടങ്ങിയവർ അനുമോദിച്ചു.