ബംഗളൂരു: കര്ണാടക പബ്ലിക് കമ്മീഷന് (കെപിഎസ്സി) പരീക്ഷാ ക്രമക്കേടുമായി ബന്ധപ്പെട്ട കേസില് ഐഎഎസ് ഉദ്യോഗസ്ഥന് കസ്റ്റഡിയിലായി. വെറ്ററിനറി ഓഫീസര് തസ്തികയിലേക്കുള്ള പരീക്ഷയില് കൃത്രിമം കണ്ടെത്തിയതിനെ തുടര്ന്നാണ് 2016 ബാച്ച് ഐഎഎസ് ഉദ്യോഗസ്ഥനായ ഗ്യാനേന്ദ്ര കുമാര് ഗംഗ്വാറിനെ കസ്റ്റഡിയിലെടുത്തത്.
തുടര്ച്ചയായ രണ്ടു ദിവസത്തെ ചോദ്യം ചെയ്യലിനൊടുവിലാണ് നടപടി. അന്വേഷണത്തോട് സഹകരിക്കാന് അദ്ദേഹം വിസമ്മതിച്ചതായി ഉദ്യോഗസ്ഥര് വ്യക്തമാക്കി. വെള്ളിയാഴ്ച ഒമ്പത് മണിക്കൂറോളമാണ് സിഐഡി സംഘം അദ്ദേഹത്തെ ചോദ്യം ചെയ്തത്.
കര്ണാടക വ്യവസായ-വാണിജ്യ വകുപ്പില് എംഎസ്എംഇ ഡയറക്ടറായി സേവനമനുഷ്ഠിക്കുന്ന ഗംഗ്വാര്, ക്രമക്കേടുകള് നടന്ന സമയത്ത് കെപിഎസ്സിയില് പരീക്ഷാ കണ്ട്രോളറായിരുന്നു. ഈ വര്ഷം മാര്ച്ചിലാണ് അദ്ദേഹത്തെ ആ സ്ഥാനത്തു നിന്ന് മാറ്റിയത്. മൃഗസംരക്ഷണ വകുപ്പിലേക്ക് വെറ്ററിനറി ഓഫീസര്മാരെ നിയമിക്കുന്നതില് കെപിഎസ്സി ഉദ്യോഗസ്ഥര് വന്തോതില് ക്രമക്കേടുകള് നടത്തിയെന്നാണ് പ്രധാന ആരോപണം.
തുടക്കത്തില് വിധാന് സൗധ പോലീസ് സ്റ്റേഷനില് രജിസ്റ്റര് ചെയ്ത കേസ്, പിന്നീട് ജൂലൈ 28-നാണ് സിഐഡി അന്വേഷണത്തിന് കൈമാറിയത്. ഇതിന്റെ തുടര്ച്ചയായി, പരീക്ഷാ ക്രമക്കേടുകളുമായി ബന്ധപ്പെട്ട കള്ളപ്പണം വെളുപ്പിക്കല് അന്വേഷണത്തിന്റെ ഭാഗമായി ഓഗസ്റ്റ് 23-ന് എന്ഫോഴ്സ്മെന്റ് ഡയറക്ടറേറ്റ് (ഇഡി) ബംഗളൂരുവിലെയും ബറേലിയിലെയും ഗംഗ്വാറിന്റെ വസതികളില് റെയ്ഡ് നടത്തിയിരുന്നു.
Deepika
E-paper LOGIN
LOGIN
